قاجىمۇقان سپورت مەكتەبى – مينيسترلىك كۋبوگىنىڭ ەكى دۇركىن يەگەرى (فوتو)

قاجىمۇقان مۇڭايتپاسوۆ اتىنداعى وليمپيادا رەزەرۆىنىڭ رەسپۋبليكالىق مامانداندىرىلعان مەكتەپ-ينتەرنات-كوللەدجىنىڭ 2007 — 2008 جىلدارى تۋعان  سپورتشىلارى دزيۋدو، تاەكۆوندو، ەركىن كۇرەس، بوكس، گرەك-ريم كۇرەسىنەن وتكەن مادەنيەت جانە سپورت مينيسترلىگىنىڭ كۋبوگىن جەڭىپ الدى.

16-22 ءساۋىر ارالىعىندا تالدىقورعان قالاسىندا ەلىمىزدىڭ 17 سپورت-ينتەرناتتار اراسىندا سپورتتىڭ بەس تۇرىنەن ۇيىمداستىرىلعان ءدۇبىرلى دودادا سپورت ورداسىنىڭ وقۋشىلارى وسىمەن ەكىنشى رەت مادەنيەت جانە سپورت مينيسترلىگىنىڭ كۋبوگىنىڭ يەگەرى اتاندى.

بۇل جارىستىڭ ءوزى دە بيىل ەكىنشى رەت ءوتتى. كۋبوك جولىنداعى تۋرنير اسا تارتىستى جانە قىزىقتى بولدى. ىرىكتەۋ سىنىندا ۇجىمدار ءتورت توپقا ءبولىنىپ جەڭىمپازدى انىقتادى. اۋەلى جۇزدەن جۇيرىك، مىڭنان تقلپان شىققاندار جارتىلاي فينالعا جولداما الىپ، فينالعا شىقتى. فينالدا الاڭ يەلەلەرى — جەتىسۋ وبلىسىنىڭ سپورت ينتەرناتى مەن بىلتىرعى، ياعني، تۇڭعىش وسى كۋبوكتىڭ يەگەرى – قاجىمۇقان مۇڭايتپاسوۆ اتىنداعى سپورت ورداسى سىنعا ءتۇستى. ولار فينالدا دزيۋدو، گرەك-ريم، تاەكۆوندو مەن بوكستان باسىم ءتۇسىپ، بىلتىرعى اتاعىن قورعاپ قالدى. ال جەتىسۋ وبلىسىنىڭ جاقسىلىق ۇشكەمپىروۆ اتىنداعى وليمپيادا رەزەرۆىنىڭ وبلىستىق مەكتەپ-ينتەرنات-كوللەدجى بۇل تەكەتىرەستە تەك ەركىن كۇرەستەن عانا الدا بولدى.

فينالدا قاجىمۇقان سپورت مەكتەبىنىڭ سايىپقىراندارى باسىمدىق تانىتىپ، ەكىنشى رەت كۋبوكتىڭ يەگەرى اتاندى.

جەڭىمپاز بەن جۇلدەگەرلەردى مادەنيەت جانە سپورت مينيسترلىگى سپورت جانە دەنە شىنىقتىرۋ ىستەرى كوميتەتى سپورت رەزەرۆى باسقارماسىنىڭ باسشىسى امانباي نۇرمۇحانبەتوۆ، سپورتتى دامىتۋ ديرەكتسياسى ديرەكتورىنىڭ ورىنباسارى ازامات يماشەۆ، اتلانتا وليمپياداسىنىڭ قولا جۇلدەگەرى ماۋلەن مامىروۆ، جەتىسۋ وبلىسى دەنە شىنىقتىرۋ جانە سپورت باسقارماسىنىڭ باسشىسى ۇلان رىسقۇل ماراپاتتادى.

بۇل باسەكەنىڭ دىتتەگەنى — دارىندى بالالاردىڭ كوزگە تۇسۋىنە جاعداي جاساپ، سپورت مەكتەپ-ينتەرنات-كوللەدجدەر اراسىنداعى باسەكەلەستىكتى ارتتىرۋ. ارالارىڭىزدا كوبىڭىز ەرت.ەڭگى ۇلتتىق قۇراما وكىلىسىزدەر. ءبىز سىزدەرگە زور سەنىم ارتامىز. حالىقارالىق جارىستاردا جۇلدەلى بولىپ، جانكۇيەرلەرىمىزدى قۋانتقاندارىڭىزدى قالايمىز. وسى جارىس اتالعان داڭعىل جولدا تاجىريبە جيناۋعا زور سەپتىگىن تيگىزەدى دەپ ويلايمىن، — دەپ ايتتى فينال قارساڭىنداعى كوماندالار شەرۋىندە امانباي نۇرمۇحانبەتوۆ.

ال قولا جۇلدەگە جامبىل وبلىسىنىڭ مەكتەپ-ينتەرنات-كوللەدجى يە بولدى. ولار بوكس، تاەكۆوندو مەن ەركىن كۇرەستەن جەڭىسكە جەتسە، قالعان گرەك-ريم كۇرەسى مەن دزيۋدو باسەكەسى بەكزات ساتتارحانوۆ اتىنداعى دارىندى بالالاردىڭ سپورت مەكتەپ-ينتەرناتىنىڭ (تۇركىستان وبلىسى) پايداسىنا شەشىلدى.

بيىل كۋبوكتىڭ جالپى جۇلدە قورى – 10 ميلليون تەڭگە. جەڭىمپاز 5 ميلليونعا يە بولسا، 2-ورىنعا ءۇش، قولا مەدال العان كومانداعا 2 ميلليون بەرىلەدى.

ايتا كەتەيىك، بيىل 17 سپورت وقۋ ورداسىنان كەلگەن 450-دەن استام ءجاسوسپىرىم دزيۋدو، بوكس، تاەكۆوندو، گرەك-ريم جانە ەركىن كۇرەستەن سىنعا ءتۇستى. تاەكۆوندو جارىس باعدارلاماسىنا العاش رەت قوسىلدى. ونىڭ ىشىندە بوكستا 7، قالعان سپورتتان 5 سالماقتا جەڭىمپاز انىقتالدى. بيىل 2007-2008 جىلدارى دۇنيەگە كەلگەن شاكىرتتەر باق سىنادى.

بارلىق كوماندا ىرىكتەۋدە 4 توپقا ءبولىنىپ، اينالمالى جۇيە بويىنشا ءبىر-بىرىمەن كەزدەستى. ءار توپتا 1-ورىن العان وقۋ ورداسى عانا جارتىلاي فينالعا جولداما العان. سوسىن، ا مەن س توبىنىڭ، تاعى ۆ مەن D توبىنىڭ ۇزدىگى اقتىق سىنعا شىعۋ ءۇشىن تالاستى.

انىقتاما: كەشەندى جارىستى  مادەنيەت جانە سپورت مينيسترلىگى ۇيىمداستىرادى. بىلتىر ىرىكتەۋى 4 قالادا، ال فينالى استانادا وتكەن العاشقى جارىستا ق.مۇڭايتپاسوۆ اتىنداعى وليمپيادا رەزەرۆىنىڭ رەسپۋبليكالىق مامانداندىرىلعان مەكتەپ-ينتەرنات-كوللەدجى چەمپيون اتانعان.

 

ارداق توعىموۆ،

فوتو: مادەنيەت جانە سپورت مينيسترلىگىنىڭ سپورتتى دامىتۋ ديرەكتسياسى

استانا