Boks: tórtinshi kúngi kórsetkish – bir jeńis, bir jeńilis

Tashkentte ótip jatqan bokstan álem chempıonatynyń tórtinshi kúni bizdiń bir atlet jeńiske jetip, taǵy bir sportshy jeńilis tapty. Bul týraly rast.kz habarlady.

Búgin 48, 51, 63,5 kelilerge deıingi jáne 92 keliden aýyr salmaqtardaǵy atletter ózara kúsh synasty.

Kúndizgi sessııada sharshy alańǵa shyqqan 63,5 kıloǵa deıingi salmaqtaǵy Sanatáli Tóltaev mavrıkıılik Rıcharno Kolın Lýıspen qolǵap túıistirdi. О́kinishke qaraı, bul jekpe-jekte belsendilik tanytqan afrıkalyq jigit jeńisti tartyp áketti. Tartysty ótken básekeniń qorytyndysynda tóreshiler solaı dep sheshti.

Osymen, Qazaqstan quramasy sapynan ekinshi bylǵary qolǵap sheberi jarys jolynan shyǵyp qalyp otyr. Keshe mundaı sátsizdikke 60 kelige deıingi salmaqtaǵy Talǵat Syrymbetov ushyraǵan edi. Biraq ol óziniń mıllıondaǵan otandastarynyń kózqarasynsha, Azııa chempıony, ıordanııalyq Mohammed Abý Djadjedten utyla qoıǵan joq. Bizdiń oǵlan sonyń aldyndaǵy, 1/32 fınaldyq irikteý saıysynda taı Sakda Rýamthamdy 5:2 esebimen utqan bolatyn.

Al keshki sessııanyń eń sońǵy jubynda shaıqastyń shańyn shyǵarǵan 92 keliden aýyr salmaqtaǵy Qamshybek Qońqabaev reseılik Alekseı Dronovtan 4:1 esebimen basym tústi. Jekpe-jektiń birinshi raýndynda onyń qarsylasy 3:2 esebimen alǵa shyǵyp ketti. Sodan keıin Qamshybek shynymen qamshyny basty. Sóıtip, ekinshi raýndta-aq tarazy basyn ózine qaraı aýdaryp aldy. Al úshinshi raýndta osy qarqynnan aıyrylǵan joq, bul joly tipti bir ret básekelesin nokdaýnǵa túsirdi.

Endi Qamshybek 7 mamyr kúni 1/8 fınaldyq shaıqasqa sırııalyq Mohammad Mlaıespen shyǵady. Odan asa alsa, shırek fınalda medaldar aýyly úshin shaıqasady. Sol kezde ózbek Bahodır Jalolovpen betpe-bet kelip qalýy múmkin.

Bul kúni basqa elderdiń namysyn qorǵap júrgen taǵy úsh qazaq jigiti jeńiske jetti. Atap aıtqanda, 90 keliden aýyr salmaqtaǵy qytaılyq qazaq Danabek Baıǵazy kúndizgi sessııada 2021 jylǵy álem chempıonatynyń kúmis júldegeri, armıan Davıd Chaloıandy joldan shyǵaryp tastap, sensaııa jasady. О́zbekstan quramasy sapyndaǵy jergilikti qazaq, Azııanyń 2022 jylǵy chempıony Rýslan Abdýllaev 63,5 kelige deıingi salmaqta ıspanııalyq Konde Oıeer Ibarechcheni birinshi raýnda eki ret nokdaýnǵa jiberdi. Sodan keıin onyń qarsylasynyń sekýndanttary ortaǵa aq oramal tastap, shaıqasty toqtattyrdy.

Keshki sessııada budan birqatar ýaqyt buryn Bahreın azamattyǵyn alǵan burynǵy jerlesimiz Azat Mahmetov 51 kelige deıingi salmaqta ıtalıan Alesso Kamıolany 4:1 esebimen tize búktirdi. Ol boks jolyn jalǵastyrý úshin osyndaı qadamǵa barǵan edi.

Erteń, 5 mamyrda úsh jigitimiz shyǵady. Sonyń ishinde 57 kelige deıingi salmaqtaǵy Serik Temirjanov – malılik Abdýl Karım Bathılımen, 80 kelige deıingi salmaqtaǵy Nurbek Oralbaı – ázerbaıjan Mýrad Allahverdıevpen, al 92 kelige deıingi salmaqtaǵy Aıbek Oralbaı ıtalııalyq Azız Abbes Moýhıdınmen shaıqasady. Bulardyń arasynda Serik kúndizgi sessııada shyqsa, aǵaıyndy egizder Nurbek pen Aıbek keshki sessııada baqtaryn synaıdy.

Kúndizgi sessııa – saǵat 13:00-16:00, keshki sessııa saǵat 18:00-21:00 aralyǵynda ótedi.

Sol ýaqyttarda Qazsport telearnasynan tikeleı efırde kórsetiledi.