SportPress.kz Qazaqstan sport jańalyqtary
Tashkentte ótip jatqan bokstan álem chempıonatynyń jetinshi kúni Qazaqstan boksshylarynyń úsheýi jeńiske jetip, bireýi utylyp qaldy. Bul týraly rast.kz habarlady.
Búgin 51 jáne 75 kelige deıingi salmaqtaǵylar – 1/16 fınaldyq, al 57 kelige deıingi jáne 92 keliden aýyr salmaqtaǵylar 1/8 fınaldyq shaıqastaryn ótkizdi.
Bizdiń boksshylardan Tashkent rıngine birinshi ret shyǵyp turǵan Sáken Bıbosynov (51 kg) – úndistandyq Dıpak Dıpakpen, Nurqanat Raıys (75 kg) domınıkandyq Vırgılııa de Los-Santos Delgadomen qolǵap túıistirse, buǵan deıin bir-bir qarsylasyn utyp shyqqan Serik Temirjanov (57 kg) – venger Roland Verespen, Qamshybek Qońqabaev (+92 kg) sırııalyq Mohammad Mlaıespen kezdesti. Bulardyń aldyńǵy úsheýi kúndizgi sessııada, al Qamshybek keshki sessııada óner kórsetti.
О́kinishke qaraı, bul kúni birinshi bolyp rıngke kóterilgen álem chempıony Sáken jeńiliske dýshar boldy. Biraq aldyńǵy eki raýndta da básekelesinen basym túsken (3:2, 4:1) onyń sońǵy raýndtyń qorytyndysymen qalaısha jeńiliske ushyraǵany túsiniksizdeý bolyp qaldy. Budan keıin sharshy alańdy shaıqaǵan Serik venger boksshysyn taktıkalyq jaǵynan óte ádemi etip utty. Onyń sońynan domınıkandyq atletpen taıtalasqa túsken Nurqanat bir ret nokdaýnǵa túsip qalǵanyna qaramastan, ekinshi-úshinshi raýndtardy qarqyndy aıaqtap, jeńisti tartyp áketti.
Keshki sessııada sırııalyq alyppen aıqasqan Qamshybektiń jekpe-jegi óziniń aqyryna deıin jankúıerlerin qatty alańdatyp otyrdy. Olaı bolatyny, bizdiń baǵlan raýnd saıyn artyq shyǵyp turǵanyna qaramastan, salmaǵy da aýyr, judyryǵy da jýan sırııalyqtyń qapııada tıgen oqys soqqysy bárin bir mezette sheship ketpes pe eken degen qaýip seıile qoıǵan joq. Degenmen, ár múmkindikten tıisti upaı jınaı bilgen Qamshybek judyryǵymen jel shaıqap júrgen jigittiń surapyl siltesi sátteriniń bárinen sytylyp shyǵyp ketip, gújban gúrziniń bar pármenimen jumsalýyna mursat bergen joq.
Osylaısha, Serik pen Qamshybek 10 mamyrda oınalatyn shırek fınalǵa shyqty. Sol kúni Serik kýbalyq Del-Reı Saıdel Orta Rodrıgespen, Qamshybek ózbek Bahodır Jalolovpen shaıqasady. Al Nurqanat 9 mamyrda brazılııalyq Ýandereı Pereıra 1/8 fınaldyq jekpe-jek ótkizedi.
Sonymen, Qazaqstan quramasy sapynan osy kezge deıin Sáken Bıbosynov (51 kg), Talǵat Syrymbetov (60 kg), Sanatáli Tóltaev (63, kg) jáne Aıbek Oralbaı (92 kg) esimdi jigitter jarys jolynan shyǵyp qaldy. Top talasynda áli toǵyz sańlaǵymyz júr.
Erteń, 8 mamyr, chempıonattyń segizinshi kúni 48, 54, 60, 86 jáne 92 kelige deıingi salmaqtardaǵy atletter 1/8 fınaldyq shaıqastarǵa qatysady. Bulardyń qataryna bizden Sanjar Táshkenbaı (48 kg), Mahmýd Sabyrhan (54 kg), Saǵyndyq Toǵambaı (86 kg) qıqý qosady. Osy sanattaǵy Sanjar men Mahmýd chempıonattaǵy birinshi urystaryn ótkizedi. Al Saǵyndyq 2 mamyr kúni 1/16 fınaldyq irikteý synynda Kongo Demokratııalyq Respýblıkasynyń ókili Mbelın Nlandýdy úshinshi raýndta tehnıkalyq nokaýtpen jeńgen edi.
Sonymen, erteń Mahmýd Sabyrhan kúndizgi sessııada venger Ishtvan Zakamen kezdesse, keshki sessııada Sanjar Táshkenbaı ózbek Shodıerjon Melıkýzıevpen, Saǵyndyq Toǵambaı ózbek Shohjahon Abdýllaevpen judyryq siltesedi.
Kúndizgi sessııa shaıqastary – saǵat 14:00-17:00, keshki sessııa saǵat 18:00-21:00 aralyǵynda ótedi.
