كوشپەندىلەر ويىندارىنا شەتەلدىك ەرىكتىلەردەن دە ءوتىنىش ءتۇسىپ جاتىر

استانادا 8-14 قىركۇيەك ارالىعىندا وتەتىن V دۇنيەجۇزىلىك كوشپەندىلەر ويىندارىنا وسى جارىستى ۇيىمداستىرۋ ديرەكتسياسى ەرىكتىلەردى ىرىكتەپ جاتىر، دەپ حابارلادى قالا اكىمدىگى.

وسى جىلدىڭ قاڭتارىندا ۆولونتەرلىك وتىنىمدەردى قابىلداۋ باستالدى. V دۇنيەجۇزىلىك كوشپەندىلەر ويىندارىن دايىنداۋ جانە وتكىزۋ ديرەكتسياسىنىڭ اقپاراتى بويىنشا، بۇل جۇمىسپەن استانانىڭ 13 جوعارى وقۋ ورنى قامتىلعان. ونىڭ ىشىندە Turan-Astana ۋنيۆەرسيتەتى، Maqsut Narikbayev University، «قازاق تەحنولوگيا جانە بيزنەس ۋنيۆەرسيتەتى» اق، دەنە شىنىقتىرۋ جانە بۇقارالىق سپورت اكادەمياسى، «استانا» مەديتسينا ۋنيۆەرسيتەتى، Astana IT University، م.ۆ. لومونوسوۆ اتىنداعى ممۋ قازاقستاندىق فيليالى، ل.ن. گۋميلەۆ اتىنداعى ەۋرازيا ۇلتتىق ۋنيۆەرسيتەتى، ESIL University، «استانا» حالىقارالىق ۋنيۆەرسيتەتى، س.سەيفۋللين اتىنداعى قازاق اگروتەحنيكالىق زەرتتەۋ ۋنيۆەرسيتەتى جانە ا.قۇسايىنوۆ اتىنداعى ەۋرازيا گۋمانيتارلىق ينستيتۋتى بار.

V دۇنيەجۇزىلىك كوشپەندىلەر ويىندارىن دايىنداۋ جانە وتكىزۋ ديرەكتسياسى باسشىسىنىڭ ورىنباسارى ابىلاي قوندىباەۆتىڭ ايتۋىنشا، ناۋرىز ايىندا ستۋدەنتتەردى ەرىكتىلەر قاتارىنا شاقىرۋ بويىنشا استانا قالاسىنىڭ 29 كوللەدجىندە كەزدەسۋلەر وتكىزىلدى. سونداي-اق، استانا قالاسىنىڭ ەسىل، الماتى، نۇرا، سارىارقا جانە بايقوڭىر اۋداندارىنداعى بەلسەندى ۇزاق ءومىر ءسۇرۋ ورتالىقتارىنىڭ قىزمەت الۋشىلارىمەن V دۇنيەجۇزىلىك كوشپەندىلەر ويىندارى تۋرالى اقپارات بەرۋ جانە ەرىكتىلەر قاتارىنا شاقىرۋ ماقساتىندا كەزدەسۋلەر بولدى. اتالعان ورتالىقتاردان 20 ءوتىنىم كەلىپ ءتۇستى. بۇگىنگى تاڭدا كەلىپ تۇسكەن وتىنىمدەردىڭ جالپى سانى – 4683.

ويىنعا ەرىكتىلەردى تارتۋ ماقساتىندا بارلىعى 12 مىڭنان استام ستۋدەنتتى قامتيتىن 95 كەزدەسۋ وتكىزىلدى، — دەدى ول.

سونىمەن بىرگە ول وتىنىمدەردىڭ قىرعىزستان، رەسەي فەدەراتسياسى، وزبەكستان، ۆەتنام، تۇركيا، گەرمانيا، فرانتسيا، يسپانيا، كورەيا، تۇرىكمەنستان، بەلارۋس پەن گانا رەسپۋبليكالارى سياقتى ەلدەردىڭ تۇرعىندارىنان دا ءتۇسىپ جاتقانىن ايتتى.