Qazaqstan Azııa chempıonatynda alty júlde aldy

Ońtústik Koreıanyń Tegý qalasynda ótip jatqan pnevmatıkalyq qarýmen nysana kózdeýden XV Azııa chempıonatynyń sońǵy kúni Qazaqstan quramasy kúmis júldeni ıelendi.

Irına Iýnýsmetova men Valerıı Rahımjan juby 10 metrden tapanshamen nysana kózdeýde ekinshi oryn aldy. Bul — bizdiń mergenderdiń osy sary qurlyq básekesindegi altynshy júldesi.

Osyǵan deıin vıntovkamen 10 metrden nysana kózdeýde Elızaveta Bezrýkova men Islam Ýseınov juby aralas synda qola medal jeńip alǵan edi. Al komandalar arasyndaǵy saıysta elimizdiń erler quramasy kúmis, áıelder quramasy qola júldeger atandy. Onyń aldynda Konstantın Malınovskıı men Aleksandra Le jekeleı baǵdarlamada úzdik úshtikti túıindegen.

Bıyl Azııadaǵy 25 eldiń 285 tańdaýly mergeni jańa reıtıng túzý júıesi boıynsha synǵa tústi.

Dastan KENJALIN,

ASTANA