Chempıondar lıgasy: «Astana» Tbılısıde kambek jasady (VIDEO)

Astananyń «Astana» fýtbol klýby Chempıondar lıgasynyń irikteý týrnıriniń birinshi satysynda Tbılısıdiń «Dınamo» komandasyn syrt alańda 2:1 esebimen jeńip, kelesi kezeńge shyqty.

Buǵan deıin 12 shildede komandalardyń Astanadaǵy alǵashqy matchy 1:1 esebimen teń aıaqtalǵan edi.

Kavkaz elindegi ekinshi match Tbılısıdiń Borıs Paıchadze atyndaǵy stadıonynda boldy. Keńes odaǵy kezinde munda «Dınamo» klýby 1964, 1978 jyldary el chempıon atanǵan. 1990 jyldan beri Grýzııanyń chempıonatyn 18 ret jeńgen. Sol kezderi osy alańda dop tepken «dınamoshylar» 1981 jyly UEFA kýbok ıegerleri kýbogynyń ıegeri atanǵan. Sóıtip, búkil Eýropanyń komandalary sanasatyn komanda bolǵan.

Al keshegi matchta alań ıeleri Chempıondar lıgasynyń birinshi irikteý týrnırindegi ekinshi oıynyn KSRO kezindegi «dınamoshylar» sııaqty jeńiske degen jigermen bastady. Matchtyń birinshi taımynda jergilikti komanda qonaqtardyń qaqpasyna alystan da jaqyn jerden de kózdep otyrdy. Sol sebepti «Astana» qorǵanysqa kóbirek kóńil bólip, alań ıelerine esepti birinshi bolyp ashýǵa múmkindik beremýge tyrysty. Alaıda  grýzın fýtbolshylary shabýylǵa biraz den qoıyp,  sonyń nátıjesin 22-mınýtta kórdi. Birinshi taımanyń bel ortasyna kelgende «Dınamonyń» shabýylshysy Ýsman Kamara esep ashyp ketti. Biraq «Astana» klýby gol jiberip alsa da oǵan bola ashýǵa boı bergen joq. Kerisinshe, ilezde jınalyp, esepti teńestirý úshin qarsy shabýylǵa shyǵýǵa tyrysty.

Matchtyń ekinshi taımynyń basynda oıyn múldem ózgerip ketti. «Dınamonyń» oıynshylary  1:0 degen esepke bosańsyp, qonaqtardyń eki birdeı qarsy shabýylyna shara qoldana almaı qaldy. «Astana» klýbynda birinshi bolyp kóptiń arasynda kórine almaı júrgen Abzal Beısebekov kózge tústi. Ol 50-mınýtta grýzınderdiń qaqpasynyń aldynda gol salýǵa óte qıyn sátte jol taýyp, esepti teńestirip ketti.  Aleks Amanovıchtiń aıyp dop alaǵyna alystan asyrǵan pasy Abzal Beısebekov yńǵaıyna kelip qalyp, ol dopty oń aıaǵymen qaqpanyń sol jaq buryshyna dál jiberdi.

«Astana» klýbynyń ekinshi goly, kombınaııa jaǵynan alyp qaraǵanda, tipten jaqsy gol boldy. Arada bir mınýt ótkende Aleks Amanovıch taǵy da ekinshi doptyń assıstenti bolyp, gol salýǵa múmkindik jasady. Ol bizdiń qaqpanyń mańaıynan «Dınamonyń» alańynda eshkimniń qaraýynsyz qalǵan Dembo Darbony baıqap, alystan pas berdi. Darbo osy dopty oń aıaǵymen toqtatyp, sosyn grýzınderdiń qaqpasyna qaraı ilip áketip,  aıyp alańyna kirgen boıda qaqpanyń «toǵyzdyǵyna» dál qadady. Esep – 2:1.

Osydan keıin alań ıeleriniń birneshe ret gol salýǵa múmkindigi boldy. Alaıda odan nátıje shyqpady. Sóıtip, «Astana» bıylǵy Chempıondar lıgasyndaǵy alǵashqy kambágin jasap, syrt alańda jeńiske jetti.

Endi «Astana» irikteý týrnıriniń ekinshi satysynda Horvatııanyń astanasy – Zagrebke bet alady. Munda «Dınamo» klýbymen kezdesedi. Birinshi oıyn 25 shildede Zagrebte, ekinshi match 2 tamyzda Astanada bolady.

Dastan KENJALIN,

ASTANA