ۋنيۆەرسيادادا 100 مەترگە جۇگىرۋدەن انتيرەكورد تىركەلدى (ۆيدەو)

قىتايدىڭ چەندۋ قالاسىندا ءوتىپ جاتقان ۋنيۆەرسيادادا انتيرەكورد تىركەلدى. ولاي دەيتىنىمىز، 100 مەترگە جۇگىرۋدەن ايەلدەر اراسىنداعى جارىستا سومالي ەلىنىڭ سپورتشى-ستۋدەنتى ناسىر ءالي ابۋكار مارەگە ارەڭ دەگەندە ەڭ سوڭعى بولىپ جەتتى.

ول جارىس جەڭىمپازىنان 10 سەكۋندقا قالىپ، 100 مەتردى 21،81 سەكۋندتا جۇگىرىپ ءوتتى. Fox Sports اقپاراتى بويىنشا، مۇنداي جاعداي ۋنيۆەرسيادا تاريحىندا ەشقاشان بولماعان. بۇل ەشكىم كۇتپەگەن وقيعا. 100 مەترگە جۇگىرۋدەگى رەكوردپەن سالىستىرا قارايتىن بولساق، ايەلدەر اراسىنداعى الەم رەكوردى 10،49 سەكۋند، ال ستۋدەنتتەر اراسىنداعى ۇزدىك ناتيجە 11 سەكۋند بولعان. ياعني، جارىسقا قاتىسۋشىلار وسىنماشا سەكۋندتا 100 مەترگە جۇگىرگەن.

بيىلعى ۋنيۆەرسياداداعى انتيرەكورد تۋرالى اقپارات تا جان-جاققا تاراپ جاتىر. ونىڭ ۆيدەوسى عالامتوردا جىلدام تاراپ كەتتى. ۆيدەودان 20 جاستاعى سوماليلىك ستۋدەنتتىڭ (ەگەر ول ستۋدەنت بولسا، — رەد.) جۇگىرۋدەن حابارى از، جارىسقا اسا قاتتى دايىندالماعانىن دا كورۋگە بولادى.

وسى وقيعادان كەيىن ءسوماليدىڭ سپورت ءمينيسترى باررە موحامۋد كوپشىلىك الدىندا كەشىرىم سۇرادى دەگەن شىقتى. سونداي-اق ول ەلدىڭ جەڭىل اتلەتيكا فەدەراتسياسى باسشىسىن قىزمەتىنەن بوساتقانىن حابارلادى. كەيبىر باق انتيرەكورد جاساعان ناسىر ءالي ابۋكاردى سومالي جەڭىل اتلەتيكا فەدەراتسياسى باسشىسىنىڭ جيەنى ەكەن دەپ جازىپ جاتىر.

سوماليدەگى ۋنيۆەرسيتەتتەر وداعى قىتايداعى ۋنيۆەرسيادا ويىندارىنا ارنايى سپورتشى جىبەرمەگەنىن حابارلاعان. سپورت ءمينيسترى دە بۇعان قاتىسى جوق ەكەنىن مالىمدەگەن. ونىڭ ايتۋىنشا، سپورتشى  موگاديشو ۋنيۆەرسيتەتىنىڭ ستۋدەنتى. ول ەلدە ۋنيۆەرسياداعا ىرىكتەۋ بولماعان سوڭ، جەر-جۇزىندەگى ۋنيۆەرسيتەتتەردە وقيتىن سوماليلىك ستۋدەنتتەر اراسىنان تاڭداپ الىنعان.

داستان كەنجالين،

استانا