باسكەتبولدان ايەلدەر قۇراماسى ازيا كۋبوگىنا دايىندالىپ جاتىر

باسكەتبول قازاقستان ايەلدەر قۇراماسى ەلوردادا ازيا كۋبوگى قارساڭىندا وقۋ-جاتتىعۋ جيىنىن وتكىزىپ جاتىر، دەپ حابارلادى مəدەنيەت جəنە سپورت مينيسترلىگى سپورتتى دامىتۋ ديرەكتسياسىنىڭ ءباسپاسوز قىزمەتى.

قازاقستان ۇلتتىق قۇراماسى باس جاتتىقتىرۋشى ۆيتالي سترەبكوۆتىڭ جەتەكشىلىگىمەن  بىر اپتادان كەيىن جاتتىعۋدى اياقتاپ، تايلاندتىڭ استاناسى – بانگكوك قالاسىنا اتتانادى.

استانا قالاسىنداعى قازىرگى جيىن كوماندانىڭ ويىن مانەرىن جەتىلدىرىپ، كومبيناتسيالاردى شىڭداۋعا باعىتتالعان.

كەشە ۇلتتىق باسكەتبول فەدەراتسياسىنىڭ پرەزيدەنتى اباي الپامىسوۆ ويىنشىلارمەن جانە جاتتىقتىرىشىلار قۇرامىمەن كەزدەسىپ، بايراقتى باسەكەدە ساتتىلىك تىلەدى.

«ۆ» ديۆيزيونىندا قازاقستان قۇراماسى ءبىر توپتا شري-لانكا (13 تامىز)، تايلاند (14 تامىز) جانە يوردانيامەن 15 تامىزدا باق سىنايدى. ال «ا» توبىندا يندونەزيا، يران، مالايزيا مەن موڭعوليا بار.

بۇل دايىندىق ەكى اپتاعا جوسپارلانعان. بۇل ءبىز ءۇشىن از ۋاقىت. سوعان قاراماستان بارىنشا ءتيىمدى وتكىزۋگە تىرىسىپ جاتىرمىز. تاعى ءبىر وكىنىشتىسى، كوشباسشىلاردىڭ ءبىرى زارينا كۋرازوۆا اۋىر جاراقات الىپ قالدى. الداعى ازيا كۋبوگى مەن قىتايداعى ازيا ويىندارىندا ويناي المايدى. وعان وتادان سوڭ قالپىنا كەلۋى ءۇشىن 5-6 اي قاجەت. نەگىزگى قۇرامداعى باسقا ويىنشىلار وسىندا. بىزدە ۇلتتىق قۇراماعا سپورتشىلاردى شاقىرۋ قيىن بولعان جوق.

ماقسات — بارلىق ماتچتا جاقسى ويناپ، ۇپاي الۋ. قارسىلاستاردىڭ ويىنىن تالداپ ۇلگەردىك. وسىدان ەكى اي بۇرىن وڭتۇستىك-شىعىس ازيا ەلدەرى ويىندارى وتكەن. سونداعى جازبالاردى كوردىك. شري-لانكا ءبىزدىڭ قۇراماعا قاتتى قاۋقار تانىتا الاتىن ەل ەمەس. ال جارىس قوجايىنى تايلاند پەن يوردانيامەن قيىن كەزدەسۋ كۇتىپ تۇر. العاشقىسىنا جانكۇيەرلەر قىزۋ قولداۋ كورسەتەدى. ءبىز ولاردان جەڭىلگەن جوقپىز. ال يوردانيا قۇراماسى امەريكالىق ويىنشىلاردى العان ەكەن.  وزدەرىندە دە مىقتى باسكەتبولشىلار شىعىپ كەلەدى، — دەدى ۇلتتىق قۇرامانىڭ باس جاتتىقتىرۋشىسى ۆيتالي سترەبكوۆ.

ايتا كەتەيىك، ءار توپتا ءبىرىنشى ورىن العان قۇراما تىكەلەي جارتىلاي فينالعا شىعادى. ولاردىڭ قارسىلاسى توپتا ەكىنشى جانە ءۇشىنشى ورىن العان كوماندالار اراسىنان ىرىكتەلەدى. «ا» ديۆيزيونىنا تەك ءبىر عانا ەل جولداما الادى.

شامكەن بايىربەك،

استانا