SportPress.kz قازاقستان سپورت جاڭالىقتارى
فۋتبولدان قازاقستان ۇلتتىق قۇراما كومانداسىنىڭ باس جاتتىقتىرۋشىسى رەسەيلىك ماگومەد اديەۆ «رابينەرۆ» YouTube-ارناسىنا بەرگەن سۇحباتىندا ەۋروپا چەمپيوناتىنا ىرىكتەۋ تۋرنير اياقتالعان سوڭ، قازاقستان ازاماتتىعىن الۋى مۇمكىن ەكەنىن ايتتى.
قازاقستان فۋتبول فەدەراتسياسى مەنىڭ وسى ەلدىڭ ازاماتى بولعانىمدى قالاپ وتىر. مەنىڭ ەستۋىمشە، فەدەراتسيا وسى اڭگىمەنى ءارى قاراي قوزعاپ، ۇلكەن شەنەۋنىكتەرگە، مادەنيەت جانە سپورت مينيسترىنە ايتقىسى كەلىپ وتىرعان كورىنەدى. بىراق مەن ازاماتتىق تۋرالى تۇپكىلىكتى شەشىم قابىلداعان جوقپىن. ازاماتتىق الۋ كەرەك پە، كەرەك ەمەس پە، ونى مەن ءوزىم بىلەمىن عوي. ال ەگەر ماعان ازاماتتىق بەرىلىپ جاتسا، ول ەندى مەن ءۇشىن زور مارتەبە، ۇلكەن قۋانىش، – دەدى ول.
ونىڭ ايتۋىنشا، رەسەي فەدەراتسياسىنىڭ ازاماتى رەتىندە ەۋروپا ەلدەرى مەن باسقا دا مەملەكەتتەرگە ۆيزا الۋ وڭاي ەمەس. سول ءۇشىن فەدەراتسيا تەزدەتىپ قازاقستان ازاماتتىعىن الىپ بەرگىسى كەلەدى. بىراق ءدال قازىر ول ازاماتتىق تۋرالى ويلاعىسى كەلمەيدى.
قازىر مەن ازاماتتىق تۋرالى ويلاپ جۇرگەن جوقپىن. فەدەراتسيا باسشىلىعىنا ەۋروپا چەمپيوناتىنا ىرىكتەۋ ءتۋرنيرى اياقتالعانشا ازاماتتىق ماسەلەسىن ايتپاۋدى ءوتىندىم. ودان كەيىن قازاقستان ازاماتى بولامىن با، بولمايمىن با، ونى ءوزىم بىلەمىن.
ارينە، قازىر ماعان عانا ەمەس، رەسەيدىڭ بارلىق حالقىنا وڭاي ەمەس. ەگەر ازاماتتىق الساق، «مىنە، كوردىڭدەر مە، ەلدەن تاعى ءبىر ادام قاشتى»، دەپ ايتادى. ال ەلدەن قاشۋ دەگەن مەنىڭ تابيعاتىمدى مۇلدەم جوق. مەن ونداي ادام ەمەسپىن. كەزىندە شەشەن سوعىسىندا دا قازىرگىدەي جاعداي بولعان جوق. سوندىقتان ماعان ازاماتتىق الۋ دەگەن وڭاي شارۋا ەمەس. قازاقستاندا قوس ازاماتتىققا رۇقسات بەرىلمەيدى. بۇل جەردە وعان قاتاڭ تىيىم سالىنعان، – دەدى اديەۆ.
باس جاتتىقتىرۋشىنىڭ ايتۋىنشا، ازىرشە ول ەۋروپا ەلدەرىنە ۆيزا الىپ ءجۇر. بىراق كوماندانىڭ باسقا مۇشەلەرى سياقتى ەمەس، ۆيزانى ۇزاق كۇتەدى. ول ءۇشىن حات جازىپ، ءبىراز ۋاقىتىن كەتىرەدى.
ۆيزا الۋ وڭاي ەمەس. مەنىڭ اكەم الماتىدا تۋعان. ءبىزدىڭ وتباسىمىز ءبىرشاما ۋاقىت الماتىدا تۇرعان. سول ءۇشىن ازداپ جەڭىلدىك بولىپ جاتىر. ۋەفا سونى دا ەسكەرىپ جاتىر ەكەن. ەندى فينليانديامەن، دانيامەن جانە سلوۆەنيامەن ويىنعا ۆيزا بەرەتىن شىعار. سوعان ۇمىتتەنەمىن، – دەدى ماگومەد اديەۆ «رابينەرۆ» YouTube-ارناسىنا بەرگەن سۇحباتىندا.
قازىر رەسەي ازامماتتارىنا ەۋروپا ەلدەرىنە ۆيزا الۋ ماسەلەسى وڭاي بولماي جاتىر. ماسەلەن، جاقىندا ارمەنيانىڭ «پيۋنيك» كلۋبىندا وينايتىن رەسەيدىڭ ميحايل كوۆالەنكو دەگەن فۋتبولشىسىنا ەستونياعا ۆيزا بەرىلمەگەن. سونىڭ كەسىرىنەن ول كونفەرەنتسيا ليگاسىنىڭ ماتچتارىنان قالۋعا ءماجبۇر بولعان. سول سياقتى بىلتىر گەرمانيانىڭ «بايەر» كلۋبىنىڭ قاقپاشىسى اندرەي لۋنەۆ تە ۇلىبريتانياعا ۆيزا الا الماعان.
داستان كەنجالين،
استانا
