نىسانا كوزدەۋدەن ءاچ: قازاقستان قۇراماسى قولا مەدال الدى (فوتو)

بۇگىن ازەربايجاننىڭ استاناسى – باكۋ قالاسىندا ءوتىپ جاتقان نىسانا كوزدەۋدەن الەم چەمپيوناتىندا قازاقستان قورجىنىنا العاشقى مەدال ءتۇستى.

مادەنيەت جانە سپورت مينيسترلىگى سپورت جانە دەنە شىنىقتىرۋ ىستەرى كوميتەتى سپورتتى دامىتۋ ديرەكتسياسىنىڭ حابارلاۋىنشا، ستەند اتۋدىڭ تراپ باعدارلاماداسىندا ماريا دميتريەنكو مەن دانيل پوچيۆالوۆ جۇبى ارالاس كوماندالىق سىندا قولا جۇلدەگەر اتاندى. ولار 150 نىسانانىڭ 141-ءىن ءدال كوزدەدى. باس جۇلدەنى پورتۋگاليا مەن اقش قۇراماسى ساراپقا سالدى. بۇل سىندا پيرەنەي تۇبەگىنىڭ وكىلدەرى دالىرەك بولدى.

وسى سىندا ساپىندا الىشەر ايسالباەۆ پەن ايجان دوسماعامبەتوۆا بار ەلىمىزدىڭ تاعى ءبىر قۇراماسى 21-ورىنعا تۇراقتادى. بارلىعى 46 قۇراما جۇلدەگە تالاستى.

ستەند اتۋدان ۇلتتىق قۇراما كەيىنگى جىلدارى حالىقارالىق جارىستاردا ۇنەمى جۇلدەلى ورىنداردان كورىنىپ ءجۇر. بيىل كوكتەمدە الماتى قالاسىندا ليتسەنزيالىق الەم كۋبوگىنىڭ كەزەڭىن وتكىزدىك. بۇل وسى سپورت ءتۇرىن ەلىمىزدە ناسيحاتتاۋ جولىنداعى اۋقىمدى جۇمىستىڭ ءبىر كورىنىسى. ال بۇگىن ءبىزدىڭ قۇرامامىز الەم چەمپيوناتىنىڭ جۇلدەسىن جەڭىپ الدى. ارالاس كوماندالىق سىندا ۇزدىك ۇشتىكتى تۇيىندەگەن ماريا دميتريەنكو مەن دانيل پوچيۆالوۆتى قۇتتىقتايمىن!، — دەدى سپورت جانە دەنە شىنىقتىرۋ ىستەرى كوميتەتىنىڭ توراعاسى ەربول مىرزابوسىنوۆ.

پاريج وليمپياداسىندا ستەند اتۋدىڭ تراپ باعدارلاماسىندا ارالاس جۇپتىق سىندا جۇلدە ساراپقا سالىنبايدى، 2028 جىلعى ويىنداردا بولادى. ونىڭ ورنىن سكيت جاتتىعۋىنداعى ارالاس جۇپتىق سىن باسادى.

ايتا كەتەيىك، وسىمەن ستەند اتۋدان جارىستار اياقتالدى. الداعى كۇندەرى جىلجىمالى نىسانا كوزدەۋدەن ۇزدىكتەر انىقتالادى.

الەم چەمپيوناتى 1 قىركۇيەكتە مارەسىنە جەتەدى.

شامكەن بايىربەك،

استانا