قىرعىزستاندا پرەزيدەنتتىڭ كوزىنشە ۇلتتىق ويىن توبەلەسكە ۇلاستى (ۆيدەو)

قىرعىزستاننىڭ وش قالاسىنداعى اتشاباردا كوكبورىدەن پرەزيدەنتتىڭ كۋبوگى ءۇشىن وتكەن جارىس توبەلەسكە ۇلاستى. فينالدا وش وبلىسىنىڭ «دوستىق» پەن تالاس اۋدانىنىڭ «ىنتىماق» كوماندالارى كەزدەسىپ، تورەشىلەردىڭ شەشىمىنە قارسى شىقتى.

تورەشىلەر جەڭىستى تالاستىق كومانداعا بەرگەن. بۇعان وشتىڭ جانكۇيەرلەرى اشۋلانىپ، كوكبورىنىڭ سوڭى شاپقىنشىلىق شايقاسىنا ۇلاسىپ كەتتى. وسىنىڭ ءبارى تريبۋنادا كوكبورىنى تاماشالاۋعا كەلگەن پرەزيدەنت سادىر جاپاروۆتىڭ كوزىنشە بولعان. مەملەكەت باسشىسى تريبۋنادا وتىرىپ، باسىن شايقاپ، ەشتەڭە ىستەي الماعان. ونىڭ ءتۇرى شارشاڭقى كورىنگەن.

كaktus.media پورتالىنىڭ حابارلاۋىنشا، كوكبورى ويىنىنداعى توبەلەستەن كەيىن 25 ادام وش قالاسىنىڭ ميليتسياسىنا جەتكىزىلگەن. قىرعىزستاننىڭ مەملەكەتتىك ۇلتتىق قاۋىپسىزدىك كوميتەتىنىڭ توراعاسى كامچىبەك تاشيەۆتىڭ ايتۋىنشا، تارتىپسىزدىك 5-10 ادامنىڭ كەسىرىنەن بولعان. ولار جەڭىلگەن كوماندا مەن جانكۇيەرلەرگە تورەشىلەردىڭ شەشىمى دۇرىس بولماعانىن ايتىپ، ارانداتقان.

توبەلەستەن بىرنەشە ادام اۋىر جارالانعان. بىرنەشە كولىك زاقىمدانعان. قازىر كىنالىلەر ىزدەستىرىلىپ جاتىر. كىنالىلەر تابىلسا تەرگەۋ بولۋى مۇمكىن. بۇل تۋرالى وسى وقيعاعا بايلانىستى قمۇقك-ءنىڭ توراعاسى ارنايى جاساعان مالىمدەمەسىندە ايتتى.

وسى كۇنى كوكبورى ويىنى باستالماس بۇرىن وش قالاسىندا پرەزيدەنت سادىر جاپاروۆتىڭ قاتىسۋىمەن تىۋەلسىزدىك كۇنىنە ارنالعان ءىس-شارا بولعان ەدى. وعان قىرعىز رەسپۋبليكاسىنىڭ ەكس-پرەزيدەنتتەرى روزا وتۋنباەۆا مەن  سوورونباي جەەنبەكوۆ قاتىسقان.

داستان كەنجالين،

استانا