Boksshy Rımma Volosenko Islam dinin qabyldady (VIDEO)

Jaqynda boksshy Rımma Volosenko Islam dinin qabyldady, dep habarlady halyq-uni.kz.

Ol musylman bolǵany týraly bylaı dedi:

Álem chempıonatynan keıin jýrnalısterdiń biri:«Qaı dinge senesiz?» degen suraq qoıǵan edi. Endi sol suraqqa taǵy jaýap bersem, men myna nárseni aıtar edim.

Qudaı bárimizge jalǵyz. Jaratýshy – jalǵyz. Men osyny bilgim kelip, jeke jattyqtyrýshymnan: «Nege meni Islam dini ózine tartady?», dep suraǵanymda ol: «Rımma, bul endi seniń jeke kózqarasyń bolý kerek. Eger sen Islam dinin qabyldaǵyń kelse, men eshteńe deı almaımyn. Seniń ata-anań da eshkim de eshteńe aıta almaıdy», — dedi.

Jarys kezinde Islam dini maǵan jaqyn ekenin sezinetinmin. Islam dini meni óziniń tazalyǵymen tartty. Ishki dúnıeńdegi tazalyq qana emes, taza júrý, ár nárseni taza ustaý sııaqty kádimgi kúndelikti ómirdegi tazalyqty saqtaý kerek degen ustanymymen unady. Maǵan duǵa aıtý, duǵa oqý, dáret alý sııaqty dindegi tazalaný  túri jaqyn ekenin bildim. Sondyqtan men Lá ıláhá ılallah Muhammádúr rasýlýllah dep aıtamyn. Iaǵnı, Alladan basqa táńir joq, Muhammed (s.a.s) Allanyń elshisi. Men osylaı jankúıerlerdi suraqtaryna jaýap bergim keledi, — dedi ol.

Rımma Volosenko 1992 jyly Qostanaı oblysynda týǵan. Jeke jattyqtyrýshysy – Berik Myrjyqbaev, týrızm jáne sport mınıstri Erik Marjyqpaevtyń týǵan aǵasy.

Boksshy 60 kg salmaqta sharshy alańǵa shyǵyp júr. Ol munaıly elder arasynda ótken Álem kýbogynyń ıegeri, Azııa chempıony, Qazaqstan chempıony.

Endi jaqyn arada boksshy áıelder quramasy sapynda Qytaıdyń Hanchjoý qalasynda ótetin Azııa oıyndaryna qatysady.

XIX Jazǵy Azııa oıyndary 23 qyrkúıek pen 8 qazan aralyǵynda Qytaıdyń Hanchjoý qalasynda ótedi.

Dastan KENJALIN,

ASTANA

FOTO: prosports.kz

VIDEO: Aıan KÚShBAEV

 

View this post on Instagram

 

A post shared by HALYQ UNI aqparat portaly (@halyquni.media)