قازاقستان سپورتشىلارى XIX ازيا ويىندارىنا اتتاندى (فوتو، ۆيدەو)

in ازيا ويىندارى، باستى تاقىرىپ 20.09.2023 0 88 رەت وقىلدى

تۋريزم جانە سپورت ءمينيسترى ەرمەك مارجىقپاەۆ الماتى وبلىسىنداعى رەسپۋبليكالىق وليمپيادالىق دايارلىق بازاسىندا XIX جازعى ازيا ويىندارىنا قاتىساتىن قازاقستان قۇراماسىمەن كەزدەستى، دەپ حابارلادى تۋريزم جانە سپورت مينيسترلىگىنىڭ ءباسپاسوز قىزمەتى.

سارى قۇرلىقتىڭ باستى جارىسى 23 قىركۇيەك پەن 8 قازان ارالىعىندا قىتايدىڭ حانچجوۋ قالاسىندا وتەدى.

ءتورت جىلدا ءبىر رەت ۇيىمداستىرىلاتىن جارىسقا ەلىمىزدىڭ اتىنان 524 اتلەت قاتىسادى. ولار 30 سپورت تۇرىنەن 305 مەدال ءۇشىن كۇش سىناسادى. قازاقستان قۇراماسى ازيا ويىندارىنا 1994 جىلدان بەرى سەگىزىنشى رەت قاتىسۋدا.

ەرمەك مارجىقپاەۆ سپورتشىلار جانە جاتتىقتىرۋشىلار قۇرامىمەن اڭگىمەلەسىپ، ولارعا ساتتىلىك تىلەدى. مينيستر ازيا ويىندارىندا تابىستى ونەر كورسەتۋ وتە ماڭىزى ەكەنىن ايتتى. سەبەبى ازيادادا قۇرلىق چەمپيونى اتاعىمەن قاتار سپورتتىڭ 8 تۇرىنەن پاريج وليمپياداسىنىڭ جولداماسى ساراپقا سالىنادى.

ءبىز وسى ساتكە دەيىن ۇزاق ءارى اۋقىمدى جۇمىس اتقاردىق. كەشەندى جوسپار ازىرلەندى. 400-دەن استام وقۋ-جاتتىعۋ جيىندارى ءوتتى. ءتۇرلى تۋرنيرلەر ۇيىمداستىرىلدى. سونىڭ ارقاسىندا ءبىزدىڭ سپورتشىلار وزدەرىن جوعارى حالىقارالىق دەڭگەيدە كورسەتۋگە مۇمكىندىك الدى. ساناۋلى كۇندەردەن كەيىن سىزدەر باسقا ەلدەردىڭ تالانتتى جانە شەبەر سپورتشىلارىمەن جارىسقا شىعاسىزدار. بۇل وڭاي ەمەس، بىراق وسىنداي تۋرنيرلەردە مىنەز شىڭدالادى، قۇندى تاجىريبە جيناقتالادى. بارشاڭىزعا ساتتىلىك، جىگەر مەن توزىمدىلىك تىلەيمىن. بايراقتى باسەكەدە مەدال، وليمپياداعا جولدامالار، رەيتينگتىك ۇپايلار عانا ەمەس، سونىمەن قاتار ەل نامىسى، بۇكىل ەل سپورتتىڭ مارتەبەسى باسكە تىگىلەدى. ءبىزدىڭ مينيسترلىك ءاردايىم وتاندىق سپورتشىلاردى، جاتتىقتىرۋشىلاردى جانە وسى سالانىڭ باسقا دا ماماندارىنا قولداۋ كورسەتەدى. ءبىز الەمگە ەلىمىزدى تانىتىپ قانا قويماي، وسكەلەڭ ۇرپاققا ۇلگى كورسەتىپ، سپورت پەن سالاۋاتتى ءومىر سالتىنا دەگەن قىزىعۋشىلىقتى وياتامىز. بارشاڭىزدى ۇلكەن سپورت مەرەكەسىنىڭ باستالۋىمەن قۇتتىقتايمىن جانە الداعى ازيادادا ەڭ بيىك شىڭداردى باعىندىرۋعا تىلەكتەسپىن!، — دەدى تۋريزم جانە سپورت ءمينيسترى.

وسىعان دەيىن تۋريزم جانە سپورت مينيسترلىگى ازيا ويىندارىندا جۇلدە العان سپورتشىلار مەن ولاردىڭ جاتتىقتىرۋشىلارىنا بەرىلەتىن اقشالاي ىنتالاندىرۋ مولشەرىن جاريالاعان بولاتىن. اتاپ ايتقاندا، قۇرلىق چەمپيونى اتانعان سپورتشىعا 10 000 اقش دوللارى كولەمىندە اقشالاي سىياقى بەرىلەدى. ال، التىن مەدال يەگەرىن جارىسقا دايىنداعان جاتتىقتىرۋشىعا 5000 اقش دوللارى قاراستىرىلىپ وتىر. ازيادانىڭ كۇمىس جۇلدەگەرى 5000 اقش دوللارى، ال جاتتىقتىرۋشىسى 3000 اقش دوللارى كولەمىندە سىياقى الادى. سونداي-اق، قولا مەدال ەنشىلەگەن قۇراما سپورتشىسىنا 3000 اقش دوللارى، ال ونىڭ جاتتىقتىرۋشىسىنا 2000 اقش دوللارى كولەمىندە اقشالاي ىنتالاندىرۋ بەلگىلەنگەن.

ازيا ويىندارىنىڭ اشىلۋ سالتاناتى 23 قىركۇيەكتە قىتايدىڭ حانچجوۋ قالاسىنداعى وليمپيادا سپورت ورتالىعى ستاديونىندا وتەدى. جارىسقا سارى قۇرلىقتاعى 45 مەملەكەتتەن 15 مىڭنان استام سپورتشى قاتىسادى. ولار سپورتتىڭ 40 تۇرىنەن جالپى سانى 481 مەدال جيىنتىعىن ءوزارا ساراپقا سالادى.

تۋريزم جانە سپورت مينيسترلىگى

فوتو: تۋريزم جانە سپورت مينيسترلىگى