Qazaqstan sportshylary XIX Azııa oıyndaryna attandy (FOTO, VIDEO)

in Azııa oıyndary, Basty taqyryp 20.09.2023 0 88 ret oqyldy

Týrızm jáne sport mınıstri Ermek Marjyqpaev Almaty oblysyndaǵy respýblıkalyq olımpıadalyq daıarlyq bazasynda XIX jazǵy Azııa oıyndaryna qatysatyn Qazaqstan quramasymen kezdesti, dep habarlady Týrızm jáne sport mınıstrliginiń baspasóz qyzmeti.

Sary qurlyqtyń basty jarysy 23 qyrkúıek pen 8 qazan aralyǵynda Qytaıdyń Hanchjoý qalasynda ótedi.

Tórt jylda bir ret uıymdastyrylatyn jarysqa elimizdiń atynan 524 atlet qatysady. Olar 30 sport túrinen 305 medal úshin kúsh synasady. Qazaqstan quramasy Azııa oıyndaryna 1994 jyldan beri segizinshi ret qatysýda.

Ermek Marjyqpaev sportshylar jáne jattyqtyrýshylar quramymen áńgimelesip, olarǵa sáttilik tiledi. Mınıstr Azııa oıyndarynda tabysty óner kórsetý óte mańyzy ekenin aıtty. Sebebi Azıadada qurlyq chempıony ataǵymen qatar sporttyń 8 túrinen Parıj Olımpıadasynyń joldamasy sarapqa salynady.

Biz osy sátke deıin uzaq ári aýqymdy jumys atqardyq. Keshendi jospar ázirlendi. 400-den astam oqý-jattyǵý jıyndary ótti. Túrli týrnırler uıymdastyryldy. Sonyń arqasynda bizdiń sportshylar ózderin joǵary halyqaralyq deńgeıde kórsetýge múmkindik aldy. Sanaýly kúnderden keıin sizder basqa elderdiń talantty jáne sheber sportshylarymen jarysqa shyǵasyzdar. Bul ońaı emes, biraq osyndaı týrnırlerde minez shyńdalady, qundy tájirıbe jınaqtalady. Barshańyzǵa sáttilik, jiger men tózimdilik tileımin. Baıraqty básekede medal, Olımpıadaǵa joldamalar, reıtıngtik upaılar ǵana emes, sonymen qatar el namysy, búkil el sporttyń mártebesi báske tigiledi. Bizdiń mınıstrlik árdaıym otandyq sportshylardy, jattyqtyrýshylardy jáne osy salanyń basqa da mamandaryna qoldaý kórsetedi. Biz álemge elimizdi tanytyp qana qoımaı, óskeleń urpaqqa úlgi kórsetip, sport pen salaýatty ómir saltyna degen qyzyǵýshylyqty oıatamyz. Barshańyzdy úlken sport merekesiniń bastalýymen quttyqtaımyn jáne aldaǵy Azıadada eń bıik shyńdardy baǵyndyrýǵa tilektespin!, — dedi Týrızm jáne sport mınıstri.

Osyǵan deıin Týrızm jáne sport mınıstrligi Azııa oıyndarynda júlde alǵan sportshylar men olardyń jattyqtyrýshylaryna beriletin aqshalaı yntalandyrý mólsherin jarııalaǵan bolatyn. Atap aıtqanda, qurlyq chempıony atanǵan sportshyǵa 10 000 AQSh dollary kóleminde aqshalaı syıaqy beriledi. Al, altyn medal ıegerin jarysqa daıyndaǵan jattyqtyrýshyǵa 5000 AQSh dollary qarastyrylyp otyr. Azıadanyń kúmis júldegeri 5000 AQSh dollary, al jattyqtyrýshysy 3000 AQSh dollary kóleminde syıaqy alady. Sondaı-aq, qola medal enshilegen qurama sportshysyna 3000 AQSh dollary, al onyń jattyqtyrýshysyna 2000 AQSh dollary kóleminde aqshalaı yntalandyrý belgilengen.

Azııa oıyndarynyń ashylý saltanaty 23 qyrkúıekte Qytaıdyń Hanchjoý qalasyndaǵy Olımpıada sport ortalyǵy stadıonynda ótedi. Jarysqa sary qurlyqtaǵy 45 memleketten 15 myńnan astam sportshy qatysady. Olar sporttyń 40 túrinen jalpy sany 481 medal jıyntyǵyn ózara sarapqa salady.

Týrızm jáne sport mınıstrligi

FOTO: Týrızm jáne sport mınıstrligi