SportPress.kz قازاقستان سپورت جاڭالىقتارى
قازاقستان قۇراماسى XIX جازعى ازيا ويىندارىنا قاتىسۋ ءۇشىن قىتايدىڭ حانچجوۋ قالاسىنا باردى، دەپ حابارلادى تۋريزم جانە سپورت مينيسترلىگىنىڭ سپورتتى دامىتۋ ديرەكتسياسى.
قىتايعا سپورتشىلار مەن كوماندا وكىلدەرى الماتىدان چارتەرلىك رەيسپەن جەتتى. ازياداعا ءبىرىنشى بولىپ بوكس، ءجۇزۋ، ۇستەل تەننيسى، ۇلكەن تەننيس، نىسانا كوزدەۋدەن، سۋ دوبىنان ايەلدەر قۇراماسى، سەمسەرلەسۋ، سپورتتىق گيمناستيكا، دزيۋدو، رەگبي-7، گاندبولدان ەرلەر كومانداسى اتتاندى. ەندى بۇدان باسقا دا سپورتشىلار جارىسقا قاتىسۋ ءۇشىن كەستەسىنە سايكەس كەلە باستايدى.
قازاقستان قۇراماسىندا بارلىعى 525 سپورتشى بار. ولار سپورتتىڭ 30 تۇرىنەن مەدالدار ءۇشىن جارىسقا شىعادى. ولاردىڭ 27-ءسى وليمپيادالىق سپورت ءتۇرى.
بيىلعى ازيا ويىندارى حانچجوۋدا 54 سپورت ارەناسىندا وتەدى. كوماندالاردىڭ يەلىگىندە 31 جاتتىعۋ بازاسى بولادى.
وليمپيادالىق شتاب قىزمەتكەرلەرى ۇلتتىق قۇرامالاردىڭ وليمپيادا قالاشىعىنداعى بارلىق قاجەتتى راسىمدەردەن جەدەل ءوتۋىن قامتاماسىز ەتتى. بارلىق سپورتشىلار ورنالاستىرىلىپ، جارىستارعا دايىندىقتى باستاپ كەتتى.
سپورتشىلار مەن كوماندا مۇشەلەرى حانچجوۋدا نەگىزىنەن سپورتتىق قالاشىقتا ورنالاستى. سونداي-اق چجەتسزيان پروۆينتسياسىنداعى بەس شاعىن اتلەتيكالىق قالاشىقتا ورىن تەپتى.
سپورتشىلار ءۇشىن سپورت قالاشىعىنىڭ اۋماعىندا جاتتىعۋىنا، سەرۋەندەۋىنە بارلىق قولايلى جاعداي جاسالعان. ءار كومانداعا دارىگەرلەر، ماسساجيست تەراپەۆتەر مەن پسيحولوگتار بەكىتىلگەن، — دەدى ۇوك باس حاتشىسى اندرەي كريۋكوۆ.
ەسكە سالا كەتسەك، ازيا ويىندارى حانچجوۋدا 23 قىركۇيەك پەن 8 قازان ارالىعىندا وتەدى. مەدالدار سپورتتىڭ 40 تۇرىنەن ويناتىلادى. بۇل جەردە كەلىسى جىلعى وليمپيادالىق ويىندارعا قاتىسۋعا ليتسەنزيالار تاراتىلادى.
فوتو: CFP
View this post on Instagram
