Muhtarhan Dildábekov: «Átteń, Qamshybekke bir «qamshy» jetispeı tur» (VIDEO)

You tube-tegi QAZAQ RING arnasynda Qazaqstannyń eńbek sińirgen sport sheberi, asa aýyr salmaqta Olımpıalyq oıyndardyń jáne áýesqoı bokstan álem chempıonatynyń kúmis júldegeri, «Parasat» ordenimen ıegeri Muhtarhan Dildábekov Qazaqstan ulttyq qurama komandasynyń asa aýyr salmaqtaǵy boksshysy Qamshybek Qońqabaevtyń sharshy alańdaǵy jekpe-jekteri týraly oılaryn aıtty.

2000 jylǵy Sıdneı Olımpıadasynyń kúmis medalısi ulttyq quramanyń boksshysyna batyldyq jetispeı turǵanyn eskertti.

Azııa oıyndary bolsy, basqa jarys bolsyn qazaq pen ózbektiń básekesi bar. Jeńilgen qarsylasyńdy jeńý úshin jumys isteý kerek. Qamshybektiń mysy bar. Biraq ony uratyn «qamshy» joq. Qamshybektiń nokaýtqa jiberetin soqqylary joq. Túrtip júredi. Al oǵan qarsylasynan qashpaý kerek. Qamshybek senimsiz bokstasady.

Sportta ómir tez ótip ketetinin bilesizder ǵoı. Endi Qamshybek meniń osy sózderimdi estip, ashý kelip, bir oıanar, — dedi ol boksshyny qaırap.

Stýdııa qonaǵy Azııa oıyndaryna attanǵan ulttyq qurama komandaǵa sáttilik tilep, qazaq boksyna qatysty basqa da oılaryn aıtty.

Eske sala ketsek, keshe bokstan Qazaqstannyń ulttyq qurama komandasy Almaty halyqaralyq áýejaıynan Qytaıdyń Hanchjoý qalasyna XIX jazǵy Azııa oıyndaryna qatysý úshin birinshi charterlik reıspen ushyp ketti.

Búgin olar Olımpıadalyq qalashyqta elimizdiń memlekettik týynyń saltanatty túrde kóterý rásimine qatysty. Endi boksshylar tórt kún jarysqa daıyndalady. Ulttyq quramanyń alǵashqy jekpe-jekteri 25 qyrkúıekte bolady.

Taǵy bir aıtatyn nárse, bıylǵy Azıadan keıin QBF prezıdentiniń jeke qarajatynan syıaqylar beriledi. Altyn medal úshin chempıondar 50 myń AQSh dollaryn, kúmis júldegerler 30 myń AQSh dollaryn, qola medal úshin 10 myń AQSh dollaryn alady.

Qytaı sharshy alańynda el namysyn qorǵaıtyn boksshylar:

51 kg. Sáken Bıbosynov

57 kg. Mahmud Sabyrhan

63,5 kg. Ertýǵan Zeınýlınov

71 kg. Aslanbek Shymbergenov

80 kg. Nurbek Oralbaı

92 kg. Saǵyndyq Toǵambaı

+92 kg. Qamshybek Qonqabaev.

Dastan KENJALIN,

ASTANA

FOTO: Olympic.kz

 

View this post on Instagram

 

A post shared by Kazakhstan Boxing Federation (@boxingkazakhstan)