SportPress.kz Qazaqstan sport jańalyqtary
1990-2000 jyldardyń basynda «Egemen Qazaqstan» gazetinde «Qaıda júr eken, sol sańlaq?» degen aıdar bolatyn. Onda gazetke buryn sportta júrgen azamattardyń nemen aınalysyp, ne istep júrgenderi týraly materıal beriletin.
Búgin biz de osy dástúrde jalǵastyryp, «Qaıda júr eken, sol sańlaq?» dep Astananyń «Barys» klýbynyń burynǵy oıynshysy Damır Yrysbaevtyń qazir qaıda júrgenin, nemen aınalysyp jatqanyn bilgimiz kelip, jan-jaqtan surastyrǵan edik.
Qazir Damır Yrysbaev Astanada. Onymen áńgimeni keıinge qaldyrýdy jón kórdik. Al ázirshe oqyrman nazaryna hokkeıshimen 2016 jyldyń qarasha aıynda bolǵan az-kem áńgimeni usynýdy jón kórip otyrmyz. Árıne, 7 jylda kóp nárse ózgerdi. Kóp oqıǵa boldy. Ol áńgime endi keıinge qalsyn.
Sonymen, 2016 jylǵy qarasha aıy.
Astananyń «Barys» hokkeı klýbynyń burynǵy qorǵaýshysy Damır Yrysbaevpen oıda joqta kezdesip qaldyq. Qazaqstannyń jastar qurama komandasynyń oıynshysy Esil ózininiń sol jaǵalaýynda oryn tepken eńseli ǵımarattardyń birine bir sharýalarymen kelipti. Sol jerde talaı dúbirli dodalarda el namysyn qorǵap, ózge eldiń ókilderine qazaq jigitteriniń jýan judyryǵyn da kórsetip úlgergen hokkeıshini kóre salysymen áńgimege tartqan edik.
– Damır, ózińdi syrttaı jaqsy bilemiz. Hokkeı matchtarynda susty kórinseń, qazir qarap otyrsam jyly júzdi, sypaıy, qazaqtyń kádimgi sary domalaq balasy ekensiń.
– Rahmet, aǵasy (Kúledi).
– Seni jaqsy bilemin dep jatqanym, oıyndardan ǵana emes, muz aıdynyndaǵy tóbelesterińdi de aıtyp otyrmyn.
– Ony men de sezip otyrmyn.
– Qazir qaıda júrsiń? Meniń aýyldaǵy klastastarym, dostarym seni jaqsy biledi. «Hokkeı», «Barys», «Damır» dese ishken asyn jerge qoıady. «Barystan» ketkenińdi bilemiz. Dostaryma qaıda júrgenińdi aıtyp bershi. Telefon soǵyp aıtaıyn.
– Astanada «Barystyń» «Nomad» degen farm-klýby bar. Sonda oınap júrmin.
– Sonda oınap júrgenińe kóp boldy ma?
– Iá, biraz ýaqyt boldy ǵoı. «Barystan» ketken soń sonda bardym. Qazir bári jaqsy. El sııaqty oınap júrmin.
– El sııaqty degendi qalaı túsinýge bolady?
– «Barystyń» sapynda sońǵy 3 jylda shaıba salǵan emespin. Al «Nomadta» 19 match oınap, birneshe shaıba soqtym.
– «Barys» týraly taǵy suraıyn. Sol komandada oınap júrgende tóbelesip júrdiń ǵoı. Saǵan ol ne úshin kerek boldy?
– Ne úshin degende, eger qarsylasymyz dóreki oınap jatsa, oǵan shynyn aıtaıyn, shydamym jetpeıdi. Keıde bizdiń oıynshylar jaraqat alyp qalady. Sol kezde bir orynda tura almaısyń.
– Arqam bar deısiń ǵoı. Ondaı bolady. Qurlyqtyq hokkeı lıgasynda «Barys» pen «Kýnlýn Red Star» komandalarynyń oıynynda jalǵyz óziń biraz qytaıdyń sazaıyn bergenińdi kórdik. Sol kezde tóbeles neden bastaldy?
– Qytaılyqtar bizdiń oıynshylardy jaraqattady, dóreki oınady. Soǵan shydaı almadym.
– Seniń tóbelesterińdi Youtube-ta mıllıondaǵan adam kóredi eken. Aıdynǵa sol úshin de shyǵasyń ba? Shynyńdy aıtshy.
– Qazaqstannyń jastar quramasy sapynda shetelge shyqsam, meni jattyqtyrýshylar oıynǵa kóp jibermeıdi. Árıne, men ol úshin eshkimge renjimeımin. Olar komandanyń jaǵdaıyn oılaıdy. Biraq men jattyqtyrýshylardyń tapsyrmalaryn oryndap júremin. Esh jerde qateleskim kelmeıdi. Alaıda, bizdiń jigitterdi bireýler arandatyp jatsa, olarǵa qarsy dóreki oınasa, qarsylas komandany ornyna qoıýǵa týra keledi.
– Hokkeıde tóbelesken durys emes dep eshkim aıtpaıdy. Ol naǵyz erlerdiń oıyny deıdi. Mysaly, Ulttyq hokkeı lıgasynda oıynshylar tóbelesip jatady. Sol kezde olarǵa qatań jaza qoldanyla bermeıdi. Al Qurlyqtyq hokkeı lıgasynda jaǵdaı basqa sııaqty…
– Iá, durys aıtasyz. Hokkeı – erlerdiń oıyny. Biraq, qazir ol názik oıynǵa aınalyp barady. Sol jaǵy ókinishti. Meniń «Barystan» ketýime «Kýnlýn Red Star» komandasymen kezdesýdegi tóbelestiń kesiri tıdi. QHL-dyń tártiptik komıssııasy «Rysbaev lıgadan alastatylsyn» degen sheshim shyǵarypty.
– Endi «Barysqa» qaıtip barý oıda bar ma?
– Árıne, bar. «Barysqa» Qudaı qalasa qaıtyp baramyn.
– Qurlyqtyq hokkeı lıgasynda kimmen tóbeleskeniń este qaldy?
– Svıtovpen. Onymen «Ak Barspen» oıynda tóbelesken edim.
– Sodan keıin ol jaraqat alyp qaldy emes pe?
– Iá, jaraqat alyp, Astanaǵa «Baryspen» matchqa kele almady.
– О́zińdi juldyz sanaısyń ba?
– Joq. О́zimdi eshqashan juldyz sanaǵan emespin. El qatarly júrmin. Eldiń bir azamatymyn.
– Qarapaıym jigit ekensiń. Jaraısyń! «Barysqa» qaıtyp barýyńa tilektespin.
– Rahmet!
– Aıtpaqshy, seniń tóbelesterin týraly «Barystyń» burynǵy jattyqtyrýshysy ne dedi? Osylaı tóbelesip júre ber dedi me?
– Joq. Ondaı eshteńe aıtqan joq. Jattyqtyrýshy retinde komandany oıynǵa daıyndap júrdi. Onyń tóbelesti qoldaǵanyn kórgen emespin.
– Jaqsy, túsinikti.
Áńgimelesken Dastan KENJALIN
