تيمۋر سەگىزباەۆ باقيلىق بولدى

قازاقستان فۋتبولى تاريحىنداعى ۇزدىك ويىنشىلاردىڭ ءبىرى، «قايراتتىڭ» كوپ جىلعى كاپيتانى تيمۋر سەگىزباەۆ 76 جاسىندا قايتىس بولدى، دەپ حابارلايدى قازاقستان فۋتبول فەدەراتسياسى.

«قازاقستان سپورتى ورنى تولماس قازاعا ۇشىرادى. قازاقستاننىڭ فۋتبول فەدەراتسياسى، ويىنشىلار، باپكەرلەر، ارداگەرلەر جانە تورەشىلەر كورپۋسى، سونىمەن قاتار ەلىمىزدىڭ فۋتبول قاۋىمداستىعى تيمۋر سانجار ۇلىنىڭ تۋىستارى مەن جاقىندارىنا كوڭىل ايتادى» دەلىنگەن حابارلامادا.

الماتى فۋتبولىنىڭ تۇلەگى تيمۋر سەگىزباەۆتىڭ بۇكىل سپورتتىق كارەراسى «قايراتتا» ءوتتى. ول كوماندانىڭ ساپىندا 1958 جىلدان 1970 جىلعا دەيىن 200-دەن اسا ماتچ وتكىزدى.

جارتىلاي قورعاۋشى پوزيتسياسىندا ويناعان ول كوماندانىڭ كاپيتانى بولدى. ال كسرو چەمپيوناتى جوعارى ليگاسىندا ماسكەۋدىڭ «سپارتاك» كومانداسى قاقپاسىنا ءبىر ويىندا ەكى گول سوعۋى وتاندىق فۋتبولدىڭ ءىرى جەتىستىگى سانالادى. الايدا، جاراقاتتارى سالدارىنان ول 29 جاسىندا فۋتبولمەن قوش ايتىسۋعا ءماجبۇر بولدى.

تيمۋر سەگىزباەۆ 1971 جىلدان 1988 جىلعا دەيىن باپكەرلىك قىزمەت ەتتى. ول قىزىلوردانىڭ «اۆتوموبيليست»، قاراعاندىنىڭ «شاحتەر»، شىمكەنتتىڭ «مەليوراتور» جانە «قايرات» كوماندالارىن جاتتىقتىردى. سونىمەن قاتار ول يەمەن قۇراما كومانداسىنىڭ باس باپكەرى بولدى.

ونىڭ جەتەكشىلىگىمەن «قايرات» كسرو چەمپيوناتىندا جەتىنشى ورىنعا شىقتى. بۇل «قايراتتىڭ» كسرو جوعارى ليگاسىنداعى ەڭ ءىرى جەتىستىگى.