توعىزقۇمالاق – ۇلتىمىزدىڭ اقىل-وي سپورت ءتۇرى

قازاق حالقىنىڭ ۇلتتىق ويىندارىنىڭ ءبىرى – توعىزقۇمالاق قازىرگى تاڭدا الەم حالقىنا تانىمال بولا باستادى. ولاي دەيتىنىمىز ۇلتىمىزدىڭ ءتول ويىنى بولىپ سانالاتىن توعىزقۇمالاقتى دۇنيەجۇزىنىڭ ءتورت بۇرىشىندا ءسۇيىپ وينايتىن ادامداردىڭ سانى كۇننەن-كۇنگە ارتىپ كەلەدى.   

وسىعان وراي، الماتى قالاسىنىڭ الاتاۋ مادەنيەت ءۇيى ماڭايىنا ورنالاسقان ۇستەل تەننيسى ورتالىعى مەرەكەلىك بەينەگە ەندى. ويتكەنى، مەكتەپ وقۋشىلارى اراسىندا تۇڭعىش رەت ەل تاريحىنداعى ەلەۋلى وقيعا، توعىزقۇمالاق ويىنىنان الەم چەمپيوناتى ءوتتى. ارينە، ۇلتتىق ويىن دەسە قانى قىزبايتىن ادام از. سوندىقتان دا شىعار ەگدە جاستاعى اتالارىمىز بەن ەرەسەك ەر ادامدار لەگى وسى ءبىر ادەمى عيماراتتىڭ ءىشىن تولتىرىپ، ادەمى ءازىل، ەلەڭ ەتەرلىك ەستەلىكتەر ايتىپ ءوزارا مارە-سارە بولۋدا. بىرەگەي قۇندىلىعىمىزدى الەمگە تانىتۋ ماقساتىندا وتكەن مادەني مۇراعا تاتيتىن ءىس-شارا ەرەكشە اسەرلى ەكەندىگى وسىدان-اق بەلگىلى بولعانداي ەدى. قازاقستاننىڭ ءۇش رەسپۋبليكالىق ماڭىزى بار قالا مەن 17 وبلىسىنان كەلگەن مەكتەپ وقۋشىلارى توعىزقۇمالاقتىڭ راپيد جانە بليتس تۇرلەرىنەن ويىندى قىزدىردى. چەمپيوناتتى الماتى قالاسى سپورت باسقارما باسشىسى ەردەن راشيد ۇلى اشىپ بەردى.

توعىزقۇمالاق ويىنى ادامنىڭ ويلاۋ جۇيەسىن نىعايتىپ، ەستە ساقتاۋ قابىلەتىن شىڭدايدى، – دەدى پارلامەنت ءماجىلىسىنىڭ دەپۋتاتى مۇرات ابەنوۆ.

اسىرەسە، ۇلتتىق جانە ات سپورتتارى اسسوتسياتسياسىنىڭ پرەزيدەنتى يسلامبەك تىلەۋباي ۇلى ايتقان پىكىرلەر كوپتىڭ كوڭىلىنەن شىقتى. بۇدان كەيىن دۇنيەجۇزىلىك جانە قازاقستان توعىزقۇمالاق فەدەراتسياسىنىڭ پرەزيدەنتى ءاليحان بايمەنوۆتىڭ جۇرەكجاردى بايانداماسىن تىڭدادىق. بانگلادەش، ۆەنگريا، يسپانيا، كولۋمبيا، قىرعىزستان، لاتۆيا، ماكەدونيا، مولدوۆا، موڭعوليا، وزبەكستان، پاكىستان، پولشا، رەسەي، رۋمىنيا، تۇركيا، چەحيا ەلدەرىنەن كەلگەن توعىزقۇمالاق ويناۋعا كەلگەن وقۋشىلار مەن جاتتىقتىرۋشىلارى جارىستىڭ رەسمي تۇردە اشىلعانىن جاريا ەتىپ، قازاقستاننىڭ ءانۇرانىن ۇيىپ تىڭدادى. ال، ۇلكەن اسەم عيماراتقا جينالعان الاش جۇرتى «مەنىڭ قازاقستانىم» دەپ ءان شىرقاپ، تولقىپ كەتتى.

ون جەتى مەملەكەتتەن كەلگەن سپورتشىلاردى قارسى الۋ سالتاناتى كەرەمەت كورىنىسكە يە بولدى. ءسويتىپ، جارىستىڭ حالىقارالىق دارەجەدەگى تورەشىلەرىمەن تانىسۋدىڭ دا ءساتى ءتۇستى. الەم چەمپيوناتىنىڭ العاشقى ءجۇرىسىن جاساۋعا الماتى قالاسى سپورت باسقارما باسشىسى ەردەن حايرۋللين، ەكىنشى وتاۋعا ءماجىلىس دەپۋتاتى مۇرات ابدۋللامي ۇلى، ءۇشىنشى وتاۋعا دۇنيەجۇزىلىك جانە قازاقستان توعىزقۇمالاق فەدەراتسياسىنىڭ پرەزيدەنتى ءاليحان مۇحامەديا ۇلى، ءتورتىنشى وتاۋعا ۇلتتىق سپورت اسسوتسياتسياسىنىڭ پرەزيدەنتى يسلامبەك سالجانوۆ، بەسىنشى وتاۋعا دۇنيەجۇزىلىك توعىزقۇمالاق فەدەراتسياسىنىڭ ۆيتسە-پرەزيدەنتى راۋف وزگەن، التىنشى وتاۋعا قازاقستان مۇناي سەرۆيستىك كومپانيالارى وداعىنىڭ توراعاسى راشيد حاسەن ۇلى، جەتىنشى وتاۋعا «رەسپۋبليكا» پارتياسىنىڭ اپپارات جەتەكشىسى، رەسپۋبليكالىق توعىزقۇمالاق فەدەراتسياسىنىڭ قامقورشىلار كەڭەسىنىڭ مۇشەسى باقىتبەك حاميت، سەگىزىنشى وتاۋعا الماتى قالاسى ءماسليحاتىنىڭ توراعاسى، رەسپۋبليكالىق توعىزقۇمالاق فەدەراتسياسىنىڭ قامقورشىلار كەڭەسىنىڭ مۇشەسى مەيىرجان باتىربەك ۇلى، توعىزىنشى وتاۋعا  بانگلادەش ەتنوسپورت فەدەراتسياسى پرەزيدەنتى، دۇنيەجۇزىلىك توعىزقۇمالاق فەدەراتسياسىنىڭ ۆيتسە-پرەزيدەنتى مۇحاممەد ال-مامۋن كەلدى. توعىزقۇمالاقتان حابارى بار ادام وسى ويىننىڭ 9-9 وتاۋدان تۇراتىنىن بىلەدى. ودان ءارى دە توعىز وتاۋعا شەتەلدىك جاتتىقتىرۋشىلار كەلىپ، ويىندى باستاپ كەتتى. ءتورت كۇنگە سوزىلاتىن ۇلتتىق ويىنىمىزدىڭ ءمانى دە ماڭىزى دا تەرەڭ.

اقتوبە وبلىسىنان كەلگەن بالنۇر تىلەگەنوۆا (№5 مەكتەپ)، قىزىلوردالىق ماحمۇتجان ءازىمجان، سەمەي قالاسىنىڭ №37 مەكتەپ-گيمنازياسىنىڭ وقۋشىسى ايانا يساحانمەن تىلدەسىپ، ولاردىڭ توعىزقۇمالاققا تىڭعىلىقتى ازىرلىكتەرىن بايقادىق. ال، باتىس قازاقستان وبلىسىنىڭ جاڭاقالا اۋدانىنان كەلگەن نۇربەرگەن تۇسىپقالي، بەيبارىس جولداسقالي، ءنۇرالى ارمات ۇلى ويىندى قىزدىرۋعا دايىن ەكەندىكتەرىن قۋانا جەتكىزدى. مەنى اسىرەسە رەسەيدىڭ التاي ولكەسىندەگى قوساعاش اۋدانىنان كەلگەن اميرا ماتاەۆانىڭ ۇلتتىق قازاقى كيىم كيىپ، تازا قازاق تىلىندە سويلەۋى مەنىڭ نازارىمدى بىردەن اۋداردى. التاي ولكەسىندە دە قازاقتىڭ قانتامىرى سوعىپ جاتقانىن جۇرەگىم سەزدى، سوعان قۋاندىم. ۇلتتىق وتانىمىزدى ۇمىتپاعان ۇرپاقتار ساباقتاستىعى جانىمدى نۇرلاندىردى.

نۇرلان قۇمار،

الماتى