دەنى ساۋدىڭ … مەدالى كوپ!!!

بۇل تومەندەگى اڭگىمەگە ۇيىپ وتىرىپ، ءوزىم شىعارعان ماتەل عانا

…قىتايدىڭ حانجوۋ قالاسىندا وتەتىن XIX ازيا ويىندارىنا قوس ات جەگىپ، ياعني، قوس سامولەت تىزگىندەپ اتتانعان قازاقستان ۇلتتىق قۇراما كومانداسىنىڭ ەكىنشى ۇشاعىنا اياق ارتقان كەزدە ءبىر قاتار الدىمدا وتىرعان ءجۇزى جىلى جىگىت: «اعا، مەنىڭ ورنىما وتىرىڭىز، سىزگە ىڭعايلى بولادى. مىندا اياق سوزىپ وتىرۋعا بولادى ەكەن…» دەگەنى. ءوزىم دە ول قاتاردىڭ الدىندا قاتار جوق بولعاننان كەيىن، ىشتەي «شىركىن، ءبىر قاتار الدىعا تىركەمەگەنى-اي» دەپ وكىنىپ ۇلگەرگەنىم سول ەدى. العىسىمدى جاۋدىرىپ،ايتۋلى قاتارعا اۋىسىپ الدىم دا ول ازاماتتىڭ كىشىپەيىلدىگىنە ريزا بولىپ، ءجون سۇرادىم.

— اتىم ازامات، اعا. ازيا ويىندارىنا اتتانعان ۇلتتىق قۇراما كوماندانىڭ دارىگەرلەر توبىنىڭ جەتەكشىسىمىن، — دەدى.

— ەشتەمە ەتپەيدى، اعاسى. بىلە-بىلسە، ۇلكەنگە قامقورلىق بۇل كەز-كەلگەن جاس ادامنىڭ پارىزى عوي…

— ە،ازامات اينالايىن، ونى تۇسىنەتىن بالا قايدا دەگەندەي، قازاقى سالت-ءداستۇردىڭ كوبىسى مىنا تاۋ سۋىنداي تاسقىنداعان جاhاندانۋعا جۇتىلىپ بارا جاتقان جوق پا… سەنىڭ تەگىڭ نۇرماتوۆ قوي؟ ەستۋىم بار، بالام. سەندەي سەرگەك بالالارىمىزدىڭ بار ەكەنىنە ءتاۋبا!

— راحمەت، اعا! سىزدەي 11 وليمپيادا كورگەن، 10-15 ازيا ويىندارىنا كۋا بولعان، 5 بىردەي الەمدىك فۋتبول چەمپيوناتىنا كۋا بولعان 25-30 الەم، ازيا، ەۋروپا چەمپيوناتتارى مەن الەم كۋبوگىنا بارعان اعانى الاقانعا سالماساق قاي جەرىمىز قازاق بالاسى؟!- دەپ ك ۇلىمدەدى ازامات.

— ءما، ساع-عان، سەن مەنىڭ تاريحىمدى مەنەن دە ارتىق ءبىلىپ وتىرسىڭ عوي، ازامات. ولاردى قايدان وقىدىڭ؟

— اعا، كەشە ءسىز ەلىمىزدىڭ سپورت مينيسترىمەن بىرگە ۇلتتىق قۇرامانى حانچجوۋعا شىعارىپ سالۋ راسىمىنە قاتىسىپ، ءسوز سويلەدىڭىز ەمەس پە…

— ءيا، ونداي بولدى… ال، سەندەر دە وسى ۇلكەن توپتىڭ ماڭىزدى ءبىر بولىگى ەكەنسىڭدەر، اڭگىمە ايتا وتىرىڭدار.

— نەسىپ اعا، مىنا سول جاعىڭىز بەن وڭ جاعىڭىزدا وتىرعاندار دا دارىگەرلەر، سولار حانجوۋعا جەتكەنشە ءىشىڭىزدى پىستىرمايدى. سول جاعىڭىزداعى جىگىت بەرىك. ول ءبىزدىڭ سپورت مەديتسيناسى مەن وڭالتۋ ۇلتتىق ورتالىعىنىڭ ءبولىم باستىعى. بەرىكتەن ءبارىن ءبىلىپ الاسىز. مەنىڭ تۋ سىرتىڭىزدا وتىرىپ ايقايلاعانىم ءجون بولماس…

— ا، ونىڭ دا ءجون. ال، بەرىك اينالايىن، قۇلاعىم سەندە، سوق اڭگىمەنى. مەن جاڭا عانا ازامات ايتقان جارىستارعا بارعان كەزدەردە دە سپورت مەديتسيناسىن نازاردان تىس قالدىرعان ەمەسپىن. بىلە بىلگەنگە سپورتتىق مەديتسينا ول ۇلتتىق كوماندانىڭ مۇشەلەرى مەن باپكەرلەرىنەن بىردە ءبىر كەم ەمەس سالا… سەن دە تەگىڭدى ايتا وتىر.

— دۇرىس ايتاسىز، اعاسى. ازامات باستاعان ورتالىق دارىگەرلەرى بۇل ازيا ويىندارىنا ۇلكەن توپ بولىپ، ۇلكەن دايىندىقپەن كەلە جاتىرمىز. ءبىز تەك سپورتشىلارعا عانا ەمەس، قازاقستان دەلەگاتسياسىنىڭ بار مۇشەسىنە كومەك بەرۋگە دايىنبىز! قازىر، مىسالى، حانچجوۋعا دەيىنگى ۇزاق ۇشۋ كەزىندە ءسىزدىڭ دەنساۋلىعىڭىزعا دا قارايمىز. مەنىڭ تەگىم قىڭىربەكوۆ بەرىك بولادى، اعا.

— راحمەت، اينالايىندار، ەگدە تارتساق تا ءوزىمىزدى سپورتشىلارداي دايىنداپ شىقتىق بۇل ساپارعا. ماعان كومەكتەرىڭ قاجەت بولا قويماس. بىراق بەتالىستارىڭدى قۇپتايتىنداي ەكەن. بۇكىل دەلەگاتسياعا قانشا دارىگەرسىڭدەر؟

— بىزدە بىلاي، اعا: ءار سپورت ءتۇرىنىڭ ءوز دارىگەرلەرى، وڭالتۋشىلارى بار. وعان قوسا ورتالىقتىڭ توپ دارىگەرلەرى كومەككە كەلۋگە دايىن. وسىلاردىڭ ءبارىن قوسقاندا ەلۋگە تارتا مامان بارمىز.

— قارالارىڭ مول ەكەن. ءالى ەسىمدە، ءبىز العاش وليمپيادالارعا بارىپ جۇرگەندە بۇكىل دەلەگاتسياعا 3-4-اق دارىگەر ەرىپ جۇرەتىن. بۇلارىڭ قۇپتارلىق قوزعالىس. سپورت سەكىلدى جاراقات دەگەنىڭ چەمپيوندىقپەن قاتار جۇرەتىن جەردە سپورتشىلارىمىزدى ۇنەمى باقىلاۋدا ۇستاعان ءجون. ال، ازيا ويىندارىنا اتتانارداعى جاعداي قالاي بولدى، ءبارى اتار وقتاي دايىن با قىز-جىگىتتەردىڭ؟

— ءتاۋبا، اعاسى، كوماندا مۇشەلەرىنىڭ ءبارى وقۋ-جاتتىعۋ جيىندارىن وتكىزىپ، سول جەرلەردە جان-جاقتى مەديتسينالىق تەكسەرۋدەن ءوتتى. بارلىعى قاتاردا، جاراقات الىپ، جارىسقا شىعا المايدى-اۋ دەيتىن اتلەتتەر جوق. ءبارى ساپتا!

— و، ولارىڭ تاماشا، بەرىكجان! ال، ءدارى-دارمەكتى مول قىلىپ الدىڭدار ما، قانشا دەگەنمەن 524 سپورتشى بار، دەلەگاتسيا توبىنىڭ سانى 800-گە جەتەدى دەيدى. بىرەر كوماندا حانچجوۋعا ەرتە كەلىپ الدى. بارىنە سۇراعانى تابىلا ما؟

— ارينە، نەسىپ اعا، ءبارىن ويلادىق، قاجەت بولادى-اۋ دەگەن ءدارى-دارمەكتى جەتكىلىكتى ەتىپ الىپ كەلەمىز. اسا قاجەت بوپ جاتسا، قىتايىڭىزدىڭ مەديتسيناسى وراسان العا كەتكەن ەل عوي، ىزدەگەنىمىز بۇل جەردەن دە تابىلىپ قالار…

— بارەكەلدى! دايىندىقتارىڭ جان-جاقتى ەكەن. اللا، قىتايلارعا كۇنىمىزدى قاراتپاسىن. جاراقات از بولسىن، مەدال كوپ بولسىن!

— اۋزىڭىز دۋالى عوي، ايتقانىڭىز كەلە بەرسىن!

ازامات تا، بەرىك تە بەت سيپادى. جاراتقانعا سىيىنىپ، ءبارىن ءوزى اتقاراتىن ادام بالاسىمىز عوي. ءبىر ءسات ادام جانىنىڭ اراشاشىسى سپورتتىق دارىگەرلىك سالاعا دا وسىنداي تاربيەلى جىگىتتەردىڭ كەلگەنىنە ءتاۋبا ەتىپ، ازامات بوساتىپ بەرگەن ورىنعا جايعاسىپ وتىرىپ، ۇزاق جولدىڭ شەتىنە شىعۋدى ويلاپ كەتتىم. ويدان جۇيرىك نە بار، ويىم حانچجوۋعا جەتىپ، قازاقستان ۇلتتىق قۇراما كومانداسى مۇشەلەرىنىڭ ساپ-ساۋ كۇيىندە كەسكىلەسكەن شايقاستارعا ءتۇسىپ جاتقانىن ساراپتاپ جاتتى، ال ۇشاعىمىز ءالى ۇلان-بايتاق قازاقستان شەكاراسىنان ءالى كەسىپ وتپەگەن دە ەدى…

 

نەسىپ جۇنىسباي ۇلى،

سپورت ءجۋرناليسى،  جازۋشى، سپورت قايراتكەرى

الماتى-حانچجوۋ