ەل دزيۋدوسىنىڭ ەرتەڭدەرى!

ازيا ويىندارىندا ءۇش قولا جۇلدە عانا يەلەنىپ، ەلگە ورالعان قازاقستان دزيۋدوشىلار كومانداسىن مەن وسىلاي اتادىم

…قىتايدىڭ حانچجوۋىنداعى XIX ازيا ويىندارى ءا دەگەنشە بەل ورتادان اسىپ بارادى.  حانچجوۋعا كەلگەنشە جان-جاقتان ساۋەگەيسىنگەن سپورت تۇرلەرىمىزدىڭ كوبىسى بيىگىنەن تومەن بولىپ، ەڭسەنى تىكتەتپەي تۇر.  سولاردىڭ ىشىندەگى ءۇمىت ارتقان سپورت تۇرلەرىنىڭ ءبىرى ەرلەر دزيۋدوسى ەدى.  ارينە، بۇل سپورت تۇرىنەن شىعىس ازيانىڭ ءۇش كومانداسىنىڭ — قىتاي، كورەيا، جاپونيا — دەس بەرمەسىن بىلەتىنبىز.  ولارعا موڭعوليا مەن وزبەكستاندى قوسىڭىز.  ايتسە دە كەيىنگى جىلدارى الەمدىك ءىرى جارىستاردا سيرەك بولسا دا ءىرى جۇلدە الىپ جۇرگەن جىگىتتەرىمىز ازيا عانا جينالعان جەردە باس جۇلدەنىڭ كوكپارىنا تۇسەتىن شىعار دەگەن ءۇمىت بولعان.  جارىس ناتيجەلەرىن بىلەسىزدەر.  سىزدەر بىلمەيتىن نارسەلەردى سۇراۋ ءۇشىن ءدال ەلگە جول جۇرگەلى تۇرعان دزيۋدوشىلاردىڭ باس جاتتىقتىرۋشىسى نۇربول سۇلەيمەنوۆكە جولىعىپ، اڭگىمەگە تارتتىم.  

— ازيا ويىندارىنان جىگىتتەرىمىز ءۇش قولا جۇلدە عانا جەڭىپ الدى، اعا،- دەدى نۇربول ءسال كوڭىلسىزدەۋ ۇنمەن،- جوسپارىمىزدا التىن جۇلدە دە بار ەدى، امال نە، بۇيىرعانى وسى بولدى.
— جۇلدەگەرلەردى اتاي كەتەيىك.
— ماعجان شامشادين، ابىلايحان جۇبانازار پەن نۇرلىحان شارحان.
— ازيا ويىندارىنا دايارلىق تولىققاندى ءوتتى مە؟  اتتەگەن-ايلار بولعان جوق پا؟  
— جوق، اعا، ويىندارعا دايارلىق ءوز دارەجەسىندە بولدى. جوسپارلاعان ءۇش جاتتىعۋ جيىنىن دا جاقسى وتكىزدىك. تۋريزم جانە سپورت مينيسترلىگىنىڭ تىكەلەي قامقورلىعىمەن، «سامۇرىق-قازىنا» ءال-اۋقات قورىنىڭ جانە سپورت جانە تۋريزم يندۋستريا قورىنىڭ ارقاسىندا ءبىرىنشى جاتتىعۋ جيىنىن شىمكەنتتە، ەكىنشىسىن گرۋزياعا بارىپ، سول ەلدىڭ كومانداسىمەن بىرگە وتكىزدىك، ءۇشىنشىسىن الماتىعا تاياۋ سالىنعان جاڭا وليمپيادالىق ورتالىقتا وتكىزىپ، سول جەردەن وسى حانچجوۋعا ۇشتىق.  ويىندار باستالعاندا بايقادىق، سپورتشىلارىمىزدىڭ كۇش-قۋات دايارلىعى جوعارى دارەجەدە بولدى.  جىگىتتەردىڭ بىردە- ءبىرى بەلدەسۋ بارىسىندا بولدىرىپ قالعان جوق.  تىنىستارى كەڭ بولىپ، شيىرشىق اتىپ تۇردى…
   — نۇربولجان، ونداي جاعدايدا ءبىر التىن جۇلدە بولسا دا قاعىپ ءتۇسۋ كەرەك ەدى عوي…
— سوعان ءوزىم دە وكىنەمىن، اعا!  بىراق سەبەبىن بىلەمىن: حانچجوۋعا بارعان بۇل كوماندا جاس كوماندا، ءىرى جارىستارداعى تاجىريبەلەرى از، ىسىلماعان. ارالارىنداعى تاجىريبەلىلەرى عۇسمان قىرعىزباەۆ پەن ديدار حامزا بولاتىن.  عۇسمان ويىنداردى جاقسى-اق باستادى. بىراق…  ەكىنشى كەزدەسۋدە وزبەكستاندىق دزيۋدوشىمەن كەسكىلەسكەن شايقاستا اياعىنان قاتتى جاراقات الدى.  تىپتى، سول جاراقاتتىڭ كەسىرىنەن جۇبانىش بەلدەسۋىنە شىعا دا المادى.  جارىستان سوڭ ول ءوزىنىڭ پاريج وليمپياداسىنان سوڭ ۇلكەن سپورتتى قوياتىنىن مالىمدەدى.  ديدار حامزادان زور ءۇمىتىمىز بار بولاتىن.  التىن مەدال السا سول الۋى كەرەك ەدى.  بىراق…  جارىس اياقتالعان سوڭ ول دا ورىنىن جاستارعا بەرەتىنىن ايتتى.  بىز دە ونى قۋاتتادىق.  بىر سوزبەن ايتقاندا، كوماندامىزدى «جاسارتىپ» جاتىرمىز.  بۇل كەزەڭ وڭاي بولمايتىنىن ءوزىڭىز بىلەسىز، اماندىق بولسا، پاريج وليمپياداسىنا قاراي جاڭا قۇرامامىز ساقاداي ساي بولۋعا ءتيىس.
— جاستار كەلگەنى جاقسى-اق قۇراماعا. ولاردىڭ اراسىندا دا كوشباستاۋشىلار بولۋى كەرەك قوي. 
— ارينە، اعا.  بىز بۇل جولى ماعجان شامشاديننەن دە التىن جۇلدە كۇتكەنبىز.  ول جىگىتتى حانچجوۋداعى قۇراماعا العاندا دا ازداپ داۋ-داماي بوپ قالدى.  ونىڭ سالماعىندا وليمپيادا جۇلدەگەرى سمەتوۆ بار عوي.  سونى الۋ كەرەك، سول التىن مەدال اپەرەدى دەلىندى دە.  بىراق باپكەرلەر القاسى اقىلداسا كەلىپ، قۇراماعا سوڭعى ءىرى جارىستاردا جاقسى ناتيجە كورسەتكەن ماعجاندى الۋدى دۇرىس كوردىك.  ماعجان جاس بالۋان، ول العان قولا جۇلدە ەرتەڭىنە زور ۇمىتپەن قاراتادى.   ابىلايحان جۇبانازاردىڭ كۇرەسى دە كوڭىلدەن شىقتى.  قولا جۇلدەگەر اتانعان عالىمجان بولاشاق چەمپيوننان عانا ۇتىلدى.  دانيار شامشاەۆتىڭ كۇرەسىنە دە ريزا بولدىق.  ول 1/4 فينالعا دەيىن بارىپ، وليمپيادانىڭ قولا جۇلدەگەرى، الەم چەمپيونىنان ۇتىلدى. ەرەكشە ايتاتىن بالۋان نۇرلىحان شارحان!  ول وليمپيادا چەمپيونى مەن الەم چەمپيونى جينالعان توپقا ءتۇسىپ تۇرىپ، وليمپيادا چەمپيونىن ۇتىپ، سولاردىڭ اراسىنان قولا جۇلدە الدى!  اتتەڭ، نۇرلىحاننىڭ بويى الاسالاۋ، سول جاعىن قارسىلاستارى پايدالانىپ كەتەدى…
   — يءا، يءا، كەشە نۇرلىحان كەلدى جۋرناليستەرمەن كەزدەسۋگە.  بىر جۋرناليست سۇراق قويدى وعان: «بويىڭىز قىسقالاۋ عوي، سول كۇرەس كەزىندە كەدەرگى ەمەس پە؟» دەپ…  نۇرلىحان ك ۇلىپ جاۋاپ بەردى: «وسى بويمەن-اق تالايلاردى تىراپاي اسىرىپ ءجۇرمىز!» دەپ. سوسىن ءبىر سۇيسىنگەنىم ول: «بويداعى كۇشىم تاسىپ تۇرعاسىن با، باپكەردىڭ ايتقان اقىلىنان ءسال اۋىتقىپ ەدىم، سودان جەڭىلىپ قالدىم» دەپ مويىنداپ وتىردى.  بۇل، ءوز-وزىنە سىن كوزبەن قاراۋ، وتە جاقسى قاسيەت!  جالپى وزىنە-ءوزى سەنىمدى جىگىت پە دەدىم. بولاشاعى بار جىگىت سەكىلدى.
— راس، اعا، نۇرلىحان سونداي جىگىت.  جالپى كوماندامىز جاستاردان قۇرالعان  بولاشاق كومانداسى.  اللا اماندىعىن بەرسە، بۇل كوماندامەن قازاقستان بۇرىن قول جەتكىزبەگەن جەڭىستەرگە جەتەمىز دەگەن ويىم بار!
   — ايتقانىڭ كەلسىن، اينالايىن!  بىر ازيا ويىندارىمەن دۇنيە اياقتالماس.  ەرتەڭڭىن ويلاعان جىگىتكە ءسۇيسىن دەپ جاتادى اتاڭ قازاق، سول جەڭىستى كۇندەرى جۇزدەسۋگە جازسىن جاراتقان!
— ءامين،اعا!

نەسىپ جۇنىسباي ۇلى — حانچجوۋدان

فوتو: 7-su.kz