SportPress.kz Qazaqstan sport jańalyqtary
Azııa oıyndarynda úsh qola júlde ǵana ıelenip, elge oralǵan Qazaqstan dzıýdoshylar komandasyn men osylaı atadym
…Qytaıdyń Hanchjoýyndaǵy XIX Azııa oıyndary á degenshe bel ortadan asyp barady. Hanchjoýǵa kelgenshe jan-jaqtan sáýegeısingen sport túrlerimizdiń kóbisi bıiginen tómen bolyp, eńseni tiktetpeı tur. Solardyń ishindegi úmit artqan sport túrleriniń biri erler dzıýdosy edi. Árıne, bul sport túrinen Shyǵys Azııanyń úsh komandasynyń — Qytaı, Koreıa, Japonııa — des bermesin biletinbiz. Olarǵa Mońǵolııa men О́zbekstandy qosyńyz. Áıtse de keıingi jyldary álemdik iri jarystarda sırek bolsa da iri júlde alyp júrgen jigitterimiz Azııa ǵana jınalǵan jerde bas júldeniń kókparyna túsetin shyǵar degen úmit bolǵan. Jarys nátıjelerin bilesizder. Sizder bilmeıtin nárselerdi suraý úshin dál elge jol júrgeli turǵan dzıýdoshylardyń bas jattyqtyrýshysy Nurbol Súleımenovke jolyǵyp, áńgimege tarttym.
— Azııa oıyndarynan jigitterimiz úsh qola júlde ǵana jeńip aldy, aǵa,- dedi Nurbol sál kóńilsizdeý únmen,- josparymyzda altyn júlde de bar edi, amal ne, buıyrǵany osy boldy.
— Júldegerlerdi ataı keteıik.
— Maǵjan Shamshadın, Abylaıhan Jubanazar pen Nurlyhan Sharhan.
— Azııa oıyndaryna daıarlyq tolyqqandy ótti me? Áttegen-aılar bolǵan joq pa?
— Joq, aǵa, Oıyndarǵa daıarlyq óz dárejesinde boldy. Josparlaǵan úsh jattyǵý jıynyn da jaqsy ótkizdik. Týrızm jáne sport mınıstrliginiń tikeleı qamqorlyǵymen, «Samuryq-qazyna» ál-aýqat qorynyń jáne Sport jáne týrızm ındýstrııa qorynyń arqasynda birinshi jattyǵý jıynyn Shymkentte, ekinshisin Grýzııaǵa baryp, sol eldiń komandasymen birge ótkizdik, úshinshisin Almatyǵa taıaý salynǵan jańa Olımpıadalyq ortalyqta ótkizip, sol jerden osy Hanchjoýǵa ushtyq. Oıyndar bastalǵanda baıqadyq, sportshylarymyzdyń kúsh-qýat daıarlyǵy joǵary dárejede boldy. Jigitterdiń birde- biri beldesý barysynda boldyryp qalǵan joq. Tynystary keń bolyp, shıyrshyq atyp turdy…
— Nurboljan, ondaı jaǵdaıda bir altyn júlde bolsa da qaǵyp túsý kerek edi ǵoı…
— Soǵan ózim de ókinemin, aǵa! Biraq sebebin bilemin: Hanchjoýǵa barǵan bul komanda jas komanda, iri jarystardaǵy tájirıbeleri az, ysylmaǵan. Aralaryndaǵy tájirıbelileri Ǵusman Qyrǵyzbaev pen Dıdar Hamza bolatyn. Ǵusman Oıyndardy jaqsy-aq bastady. Biraq… Ekinshi kezdesýde ózbekstandyq dzıýdoshymen keskilesken shaıqasta aıaǵynan qatty jaraqat aldy. Tipti, sol jaraqattyń kesirinen jubanysh beldesýine shyǵa da almady. Jarystan soń ol óziniń Parıj Olımpıadasynan soń úlken sportty qoıatynyn málimdedi. Dıdar Hamzadan zor úmitimiz bar bolatyn. Altyn medal alsa sol alýy kerek edi. Biraq… Jarys aıaqtalǵan soń ol da orynyn jastarǵa beretinin aıtty. Biz de ony qýattadyq. Bir sózben aıtqanda, komandamyzdy «jasartyp» jatyrmyz. Bul kezeń ońaı bolmaıtynyn ózińiz bilesiz, amandyq bolsa, Parıj Olımpıadasyna qaraı jańa quramamyz saqadaı saı bolýǵa tıis.
— Jastar kelgeni jaqsy-aq quramaǵa. Olardyń arasynda da kóshbastaýshylar bolýy kerek qoı.
— Árıne, aǵa. Biz bul joly Maǵjan Shamshadınnen de altyn júlde kútkenbiz. Ol jigitti Hanchjoýdaǵy quramaǵa alǵanda da azdap daý-damaı bop qaldy. Onyń salmaǵynda Olımpıada júldegeri Smetov bar ǵoı. Sony alý kerek, sol altyn medal áperedi delindi de. Biraq bapkerler alqasy aqyldasa kelip, quramaǵa sońǵy iri jarystarda jaqsy nátıje kórsetken Maǵjandy alýdy durys kórdik. Maǵjan jas balýan, ol alǵan qola júlde erteńine zor úmitpen qaratady. Abylaıhan Jubanazardyń kúresi de kóńilden shyqty. Qola júldeger atanǵan Ǵalymjan bolashaq chempıonnan ǵana utyldy. Danııar Shamshaevtyń kúresine de rıza boldyq. Ol 1/4 fınalǵa deıin baryp, Olımpıadanyń qola júldegeri, álem chempıonynan utyldy. Erekshe aıtatyn balýan Nurlyhan Sharhan! Ol Olımpıada chempıony men álem chempıony jınalǵan topqa túsip turyp, Olımpıada chempıonyn utyp, solardyń arasynan qola júlde aldy! Átteń, Nurlyhannyń boıy alasalaý, sol jaǵyn qarsylastary paıdalanyp ketedi…
— Iá, ıá, keshe Nurlyhan keldi jýrnalıstermen kezdesýge. Bir jýrnalıst suraq qoıdy oǵan: «Boıyńyz qysqalaý ǵoı, sol kúres kezinde kedergi emes pe?» dep… Nurlyhan kúlip jaýap berdi: «Osy boımen-aq talaılardy tyrapaı asyryp júrmiz!» dep. Sosyn bir súısingenim ol: «Boıdaǵy kúshim tasyp turǵasyn ba, bapkerdiń aıtqan aqylynan sál aýytqyp edim, sodan jeńilip qaldym» dep moıyndap otyrdy. Bul, óz-ózine syn kózben qaraý, óte jaqsy qasıet! Jalpy ózine-ózi senimdi jigit pe dedim. Bolashaǵy bar jigit sekildi.
— Ras, aǵa, Nurlyhan sondaı jigit. Jalpy komandamyz jastardan quralǵan bolashaq komandasy. Alla amandyǵyn berse, bul komandamen Qazaqstan buryn qol jetkizbegen jeńisterge jetemiz degen oıym bar!
— Aıtqanyń kelsin, aınalaıyn! Bir Azııa oıyndarymen dúnıe aıaqtalmas. Erteńńin oılaǵan jigitke súısin dep jatady atań qazaq, sol jeńisti kúnderi júzdesýge jazsyn Jaratqan!
— Ámın,aǵa!
Nesip JÚNISBAIULY — Hanchjoýdan
FOTO: 7-su.kz
