SportPress.kz قازاقستان سپورت جاڭالىقتارى
الماتى قالاسىندا قازاقستان رەسپۋبليكاسىنىڭ ۇلتتىق پاراليمپيادالىق قۇراما كومانداسىن IV ازيا پارا ويىندارىنا رەسمي شىعارىپ سالۋ سالتاناتتى ءراسىمى ءوتتى. سارى قۇرلىقتىڭ باستى باسەكەسى 22-28 قازان ارالىعىندا حانچجوۋ قالاسىندا بولادى.
ءتورت جىلدا ءبىر رەت ۇيىمداستىرىلاتىن جارىسقا ەلىمىزدىڭ اتىنان 131 اتلەت قاتىسادى. ولار 14 سپورت تۇرىنەن، ياعني پارا جەڭىل اتلەتيكا، بوچچا، پارا پاۋەرليفتينگ، شاحمات، پارا ءجۇزۋ، پارا ۆەلوسپورت، پارا دزيۋدو، پارا كانوە، ۆولەيبولدى وتىرىپ ويناۋ، پارا تاەكۆوندو، پارا ساداق اتۋ، پارا ۇستەل تەننيسى، اكادەميالىق ەسۋ جانە پارا وق اتۋ سپورت تۇرلەرىنەن 485 مەدال ءۇشىن جارىس جولىنا شىعادى. قازاقستان قۇراماسى 2010 جىلدان بەرى ازيانىڭ پارا ويىندارىنا ءتورتىنشى رەت قاتىسۋدا.
2010 جىلى قىتايدا باستاۋىن العان ازيا پارا ويىندارىنا قازاقستان سپورتشىلارى ۇزدىكسىز قاتىسىپ، ەل نامىسىن ابىرويمەن قورعاپ كەلەدى. بيىلعى جىلى دا ەلىمىزدىڭ اتىنان 131 سپورتشى 14 سپورت تۇرىنەن قاتىسادى. بايراقتى باسەكەدە پارا سپورتشىلارىمىز ۇزدىكتەر قاتارىنان كورىنۋ ءۇشىن مەملەكەت تاراپىنان بارلىق جاعداي جاسالدى. بيىلدىڭ وزىندە ۇلتتىق قۇراما سپورتشىلارى 40-تان استام سپورتتىق ءىس-شاراعا، 30-دان استام وقۋ- جاتتىعۋ جيىندارىنا قاتىسىپ، بىلىكتىلىك شىڭدادى. ەندىگى كەزەك وزدەرىڭىزدە. ءبىز سىزدەرگە سەنەمىز!
ازيا پارا ويىندارىندا ساتتىلىك تىلەيمىن!، — دەدى تۋريزم جانە سپورت ءمينيسترى ەرمەك مارجىقپاەۆ.
ازيا ويىندارىندا جۇلدە العان سپورتشىلار مەن ولاردىڭ جاتتىقتىرۋشىلارىن اقشالاي ىنتالاندىرۋ ماقساتىندا قۇرلىق چەمپيونى اتانعان سپورتشىعا 10 000 اقش دوللارى كولەمىندە اقشالاي سىياقى بەرىلەدى. ال، التىن مەدال يەگەرىن جارىسقا دايىنداعان جاتتىقتىرۋشىعا 5000 اقش دوللارى قاراستىرىلىپ وتىر. قۇرلىق بىرىنشىلىگىنىڭ كۇمىس جۇلدەگەرى 5000 اقش دوللارى، ال جاتتىقتىرۋشىسى 3000 اقش دوللارى كولەمىندە سىياقى الادى. سونداي-اق، قولا مەدال ەنشىلەگەن قۇراما سپورتشىسىنا 3000 اقش دوللارى، ال ونىڭ جاتتىقتىرۋشىسىنا 2000 اقش دوللارى كولەمىندە اقشالاي ىنتالاندىرۋ بەلگىلەنگەن.
جارىسقا سارى قۇرلىقتاعى 43 مەملەكەتتەن 4 مىڭعا جۋىق سپورتشى قاتىسادى. ولار سپورتتىڭ 22 تۇرىنەن جالپى سانى 564 مەدال (پاراليمپيادالىق سپورت تۇرىنەن — 490 جانە پاراليمپيادالىق ەمەس سپورت تۇرىنەن — 74) جيىنتىعىن ءوزارا ساراپقا سالادى.
تۋريزم جانە سپورت مينيسترلىگى
فوتو: تۋريزم جانە سپورت مينيسترلىگى
