«مەن — چەمپيونمىن» دەگەننىڭ ءبارىن نوكاۋتقا جىبەرەمىن — جانىبەك ءالىمحان ۇلى

جاقىندا اقش-تىڭ روزەنبەرگ قالاسىندا گەرمانيالىق ۆينچەنتسو گۋالتەريمەن جەكپە-جەكتە IBF چەمپيونى اتاعىن جەڭىپ العان بوكسشى جانىبەك ءالىمحان ۇلى ەندى WBC پەن WBA بەلبەۋلەرى ءۇشىن شارشى الاڭعا شىعاتىنىن مالىمدەدى.

قازىر قازاق بوكسشىسىندا وسى جەڭىستەن كەيىن بۇكىلالەمدىك بوكس ۇيمىنىڭ (WBO) پەن حالىقارالىق بوكس فەدەراتسياسىنىڭ (IBF) چەمپيونى دەگەن اتاق بار. ەندى ول بۇكىلالەمدىك بوكس كەڭەسى (WBC) مەن بۇكىلالەمدىك بوكس قاۋىمداستىعىنىڭ (WBA) ۇزدىك بوكسشىسى اتانعىسى كەلەتىنىن ايتتى.

مەن ءتورت بەلبەۋدى الماي تىنىش وتىرمايمىن. ماعان تاعى ەكى بەلبەۋ كەرەك. مەن بۇيىرتسا، WBC پەن WBA اتاعىن الۋعا بارىمدى سالامىن. مەن قازىرگى ەكى بەلبەۋىمدى ساقتاپ قالۋ ءۇشىن جەكپە-جەك وتكىزگىم كەلمەيدى. ماعان باسقا دا تيتۋلدار كەرەك. مەن «چەمپيونمىن» دەگەننىڭ ءبارىن نوكاۋتقا جىبەرەمىن، — دەدى ول.

سونىمەن بىرگە بوكسشى وزىنە قولداۋ كورسەتىپ كەلە جاتقان بارشا وتانداسىمىزعا، پرەزيدەنت قاسىم-جومارت توقاەۆ پەن قازاقستان بوكس فەدەراتسياسىنىڭ پرەزيدەنتى، مەتسەنات كەڭەس راقىشەۆكە العىس ايتتى.

بۇيىرتسا تاريحي جەكپە-جەككە دە از قالدى! تاريح جاساۋعا دايىنبىز! قازاق ءستيلىنىڭ تاريحتا قالۋىنا قولداۋىن كورسەتىپ جاتقان كەڭەس راقىشەۆ اعاما ەرەكشە العىس ايتقىم كەلەدى. الاڭسىز جاتتىعىپ، دايىندىقتى جوعارى دەڭگەيدە وتكىزدىك. جەكپە-جەك الدىندا دا حابارلاسىپ، ساتتىلىك تىلەپ سەنىمگە سەنىمگە قوسىپ جاتىر! جەڭىستى كۇندە جولىعايىق، قازاق ەلى! قولداۋلارىڭىزعا كوپ راحمەت!، — دەدى ول.

بۇعان دەيىن قازاق بوكسشىسى 15 رەت رينگكە شىعىپ، ءبارىن جەڭگەن. 10 جەكپە-جەكتە قارسىلاسىن نوكاۋتقا تۇسىرگەن. سوڭعى ايقاستا جانىبەك ءالىمحان ۇلى ۆينچەنتسو گۋالتەريدى تەحنيكالىق نوكاۋتپەن جەڭدى.

داستان كەنجالين،

استانا

فوتو: Facebook.com/janibekalimkhanuly