الماتىدا ءۇش جاڭا دەنە شىنىقتىرۋ-ساۋىقتىرۋ كەشەنى اشىلادى (فوتو)

الماتى اكىمدىگى ءباسپاسوز قىزمەتىءنىڭ حابارلاۋىنشا، قالا اكىمى ەربولات دوساەۆتىڭ تاپسىرماسىمەن قالادا ءۇش جاڭا دەنە شىنىقتىرۋ-ساۋىقتىرۋ كەشەنى اشىلادى.

ولار مەدەۋ اۋدانىنىڭ «الاتاۋ»، الاتاۋ اۋدانىنىڭ «زەردەلى» جانە تۇركسىب اۋدانىنىڭ «جاس قانات» شاعىن اۋداندارىندا بوي كوتەرەدى. العاشقى ەكەۋى قاراشا ايىندا، ال «جاس قاناتتاعى» نىسان جىل سوڭىنا دەيىن تاپسىرىلادى. ءۇش دەنە شىنىقتىرۋ-ساۋىقتىرۋ كەشەنىنىڭ ارقايسىسى ادامنىڭ سانىنا قاراي ەسەپتەلگەن. مىسالى، «الاتاۋ» جانە «جاس قانات» شاعىن اۋدانىنداعى نىساندار ەكى اۋىسىمدا كۇنىنە 300-گە جۋىق بالانى، ال «زەردەلىدەگى» كەشەن 196 بالانى قابىلداي الادى، — دەپ حابارلادى الماتى قالاسىنىڭ اكىمدىگى.

سپورت كەشەنىنىڭ ارقايسىسىندا سپورت زال، جاتتىعۋ زالى، جەكپە-جەك زالى، ۇستەل ويىندارى جانە حورەوگرافيا زالدارى بولادى.

اۋماقتىق مۇمكىندىكتى ەسكەرە وتىرىپ، «الاتاۋ» جانە «جاس قانات» شاعىن اۋداندارىنداعى كەشەندە باسسەين قاراستىرىلعان.

بارلىق كەشەن مۇمكىندىگى شەكتەۋلى ازاماتتارعا بەيىمدەلگەن كيىم اۋىستىراتىن بولمەمەن، دۋش جانە سانيتارلىق توراپتارمەن جابدىقتالعان.

جالپى، ءۇش كەشەننىڭ بازاسىندا سپورتپەن شۇعىلدانۋ بويىنشا بارلىعى 122 توپ اشىلادى. نەگىزگى باعىتتار جەكپە-جەك، سپورتتىق ويىندار، سۋ جانە باسقا دا سپورت تۇرلەرى بولادى. كۇنىنە 800-دەن استام ادام ىڭعايلى جاعدايدا سپورتپەن شۇعىلدانا الادى.

دۋمان امانجول ۇلى،

الماتى

فوتو: الماتى قالاسى اكىمدىگىنىڭ ءباسپاسوز قىزمەتى