Almatyda úsh jańa dene shynyqtyrý-saýyqtyrý kesheni ashylady (FOTO)

Almaty ákimdigi baspasóz qyzmetiniń habarlaýynsha, qala ákimi Erbolat Dosaevtyń tapsyrmasymen qalada úsh jańa dene shynyqtyrý-saýyqtyrý kesheni ashylady.

Olar Medeý aýdanynyń «Alataý», Alataý aýdanynyń «Zerdeli» jáne Túrksib aýdanynyń «Jas Qanat» shaǵyn aýdandarynda boı kóteredi. Alǵashqy ekeýi qarasha aıynda, al «Jas Qanattaǵy» nysan jyl sońyna deıin tapsyrylady. Úsh dene shynyqtyrý-saýyqtyrý kesheniniń árqaısysy adamnyń sanyna qaraı eseptelgen. Mysaly, «Alataý» jáne «Jas Qanat» shaǵyn aýdanyndaǵy nysandar eki aýysymda kúnine 300-ge jýyq balany, al «Zerdelidegi» keshen 196 balany qabyldaı alady, — dep habarlady Almaty qalasynyń ákimdigi.

Sport kesheniniń árqaısysynda sport zal, jattyǵý zaly, jekpe-jek zaly, ústel oıyndary jáne horeografııa zaldary bolady.

Aýmaqtyq múmkindikti eskere otyryp, «Alataý» jáne «Jas Qanat» shaǵyn aýdandaryndaǵy keshende basseın qarastyrylǵan.

Barlyq keshen múmkindigi shekteýli azamattarǵa beıimdelgen kıim aýystyratyn bólmemen, dýsh jáne sanıtarlyq toraptarmen jabdyqtalǵan.

Jalpy, úsh keshenniń bazasynda sportpen shuǵyldaný boıynsha barlyǵy 122 top ashylady. Negizgi baǵyttar jekpe-jek, sporttyq oıyndar, sý jáne basqa da sport túrleri bolady. Kúnine 800-den astam adam yńǵaıly jaǵdaıda sportpen shuǵyldana alady.

Dýman AMANJOLULY,

ALMATY

FOTO: Almaty qalasy ákimdiginiń baspasóz qyzmeti