الماتىدا تاەكۆوندودان حالىقارالىق تۋرنير ابىرويمەن ءوتتى

الماتىدا تاەكۆوندودان حالىقارالىق تۋرنير مارەسىنە جەتتى.  رەسپۋبليكالىق سپورت كوللەدجىنىڭ  الاڭىنا توسەلگەن ءۇش دايانعا 1443  سپورتشى شىقتى.

«بارىس» تاەكۆوندو كلۋبىنىڭ كۋبوگى ءۇشىن وتەتىن حالىقارالىق سايىس ەڭ العاش رەت 2009 جىلى ۇيىمداستىرىلعان ەدى. وعان 500-گە تارتا سپورتشى قاتىسسا، ەكىنشى جىلدان باستاپ  قاتىسۋشىلاردىڭ سانى كۇرت ارتقان. ال بيىلعى دوداعا 99 كوماندا قاتىسىپ، رەسەي، موڭعوليا، تاجىكستان، قىرعىزستان، وزبەكستان، ۋكراينا، ءازىربايجان سىندى ەلدەردىڭ تەگەۋرىندى تاەكۆوندوشىلارى قاتىستى. 5 جاستان  جوعارى بالالار اراسىنداعى «ا» ساناتىنداعى حالىقارالىق تۋرنير ءۇش  كۇنگە جالعاستى.

جالپىكوماندالىق ەسەپتە الماتى قالاسىنىڭ تاەكۆوندوشىلارى توپ باسىنا شىقتى.

الماتى قالاسىنىڭ جاس تاەكۆوندوشىلارى «بارىس» كلۋبىنىڭ كۋبوگى ءۇشىن وتكەن «ا» ساناتىنداعى سايىستان 30 التىن، 20 كۇمىس، 38 قولا مەدال ولجالادى.  كوماندالىق ەسەپ بويىنشا ەكىنشى ساتىعا وزبەكستان سپورتشىلارى جايعاستى. داڭقتى باپكەر زايناب نازاراليەۆ ءوزى باستاپ 250 سپورتشىنى  الماتىداعى تۋرنيرگە قاتىستردى. ولار 11 التىن، 12 كۇمىس، 18 قولا مەدالعا قول جەتكىزدى.

– ءبىز بۇل تۋرنيرگە جىل سايىن قاتىسامىز، جىل وزعان سايىن قاتىسۋشى كوماندالاردىڭ سانى ارتىپ كەلەدى. «بارىس»  كلۋبىنىڭ كۋبوگى ءۇشىن وتەتىن حالىقارالىق ءتۋرنيردىڭ بەدەلى جوعارى. تمد ەلدەرىنەن وتە تالانتتى بالالار كەلەدى.  وسىناۋ جارىسقا قاتىسۋ ارقىلى دا ءبىز شاكىرتتەرىمىزدى شىڭداۋدان وتكىزەمىز، – دەيدى زايناب نازاراليەۆ.

جالپى كوماندالىق ەسەپتە ۇزدىك ۇشتىككە الماتى وبلىسىنىڭ تاەكۆوندوشىلار جايعاستى. ولار حالىقارالىق تۋرنيردەن 31 مەدال يەلەندى.

قىرعىز ەلىنىڭ تاەكۆوندوشىلارى دا بۇل تۋرنيردەن مەدال الدى. بۇل ەل تاەكۆوندو سپورتىن دامىتۋ ءۇشىن كورەيادان باپكەر الدىرعان-دى.   ين يۋنشۋ باپكەردىڭ  باعىت-باعدار بەرۋىمەن دايىندىقتان وتكەن قىرعىزستاندىق سپورتشىلار حالىقارالىق تۋرنيردەن  ءتورت مەدال ولجالادى.

ءتۋرنيردىڭ سالتاناتتى اشىلۋ راسىمىنە قاتىسقان الماتى قالاسى اكىمىنىڭ ورىنباسارى ارمان قىرىقباەۆ رەسپۋبليكالىق سپورت كوللەدجىنىڭ زالىندا وسىنداي ءباسى جوعارى حالىقارالىق ءتۋرنيدى جىل سايىن ۇيىمداستىرىپ، بيىلدان باستاپ «ا» ساناتىنداعى تۋرنيرلەردىڭ قاتارىنا قوسقان رەسپبۋليكالىق سپورت كوللەدجىنىڭ ديرەكتورى امالبەك تشانوۆقا العىسىن جەتكىزدى.

ۇلتتىق عىلىم اكادەمياسىنىڭ پرەزيدەنتى مۇرات جۇرىنوۆ بۇل ءتۋرنيردى جىل سايىن ارنايى كەلىپ تاماشالايتىنىن ايتتى. «تالانتى جاس سپورتشىلاردىڭ تالابىنا قاراپ قۋانامىن. ەلىمىزدىڭ سپورتى العا جىلجۋىنا  وسىنداي ماڭىزدى سايىستاردىڭ وتكەنى دە سەپتىگىن تيگىزەرى ءسوزسىز» دەدى م.جۇرىنوۆ.

مادەنيەت جانە سپورت ۆيتسە-پرەزيدەنتى ساكەن مۇسايبەكوۆ پەن اتالعان مينيسترلىكتىڭ جاۋاپتى حاتشىسى  قۋاتجان ۋاليەۆ  تە ارنايى قوناق رەتىندە شاقىرىلىپ، بۇلدىرشىندەر مەن جاسوسپىرىمدەردىڭ تارتىسىنا ريزاشىلىقتارىن ءبىلدىردى.

توعىز جىل بۇرىن الماتى قالاسىندا تاەكۆوندودان «بارىس» كلۋبى قۇرىلدى. وسى يگىلىكتى ىسكە باستاماشى بولعان مەملەكەت جانە قوعام قايراتكەرى،  قازاقستاننىڭ ەڭبەك سىڭىرگەن  باپكەرى، پەداگوگيكا عىلىمدارىنىڭ دوكتورى امالبەك قوزىباق ۇلىنىڭ ەڭبەگى زايا كەتكەن جوق. «بارىس»  كلۋبىندا شىڭداۋدان وتكەن جاستار الەمدىك سايىستاردا ەل نامىسىن قورعاپ ءجۇر.  ارىعا تەرەڭدەمەي-اق كۇنى كەشە ەگيپەتتە كادەتتەر اراسىندا الەم چەمپيونى اتانعان ءاليحاسان باقىتجاننىڭ جەتىستىگىن ايتساق تا جەتەدى. ەلىمىزدىڭ تاريحىندا كادەتتەر اراسىندا العاش بولىپ الەم  چەمپيونى اتانعان ءاليحاساننىڭ ارمانى – وليمپيادانىڭ التىن مەدالى.

«بارىس»  سپورت كلۋبىنىڭ كۋبوگى ءۇشىن «ا» ساناتىنداعى حالىقارالىق ءتۋرنيردى ۇيىمداستىرۋشىلاردىڭ دا كوزدەگەن مەجەسى – قازاق ەلىنىڭ تاەكۆوندوشىلارىن وليمپ شىڭىنا شىعارۋ.

 ق.جومارت،

 المتاتى