كونكيمەن جۇگىرۋدەن قازاقستان چەمپيوناتى باستالدى

بۇگىن استاناداعى Alau مۇز سارايىندا جەكەلەي ديستانتسيادا كونكيمەن جۇگىرۋ سپورتىنان  قازاقستان رەسپۋبليكاسىنىڭ چەمپيوناتى باستالدى، دەپ حابارلادى تۋريزم جانە سپورت مينيسترلىگىنىڭ ءباسپاسوز قىزمەتى.

چەمپيونات 2023-2024 جىلدار ارالىعىنداعى جارىس ماۋسىمىنا سپورتشىلاردى ىرىكتەۋ ءتۋرينيرى سانالادى. جەڭىمپازدار مەن جۇلدەگەرلەر ەرەسەكتەر، حالىقارالىق جارىستارعا، الەم كۋبوگىنىڭ كەزەڭدەرىنە، سونداي-اق قىسقى جاسوسپىرىمدەر وليمپياداسىنا قاتىسۋعا مۇمكىندىك الادى.

چەمپيوناتتىڭ اشىلۋ سالتاناتىنا تۋريزم جانە سپورت ءمينيسترى ەرمەك مارجىقپاەۆ قاتىسىپ، تۋرنيرگە  كەلگەن سپورتشىلاردى قۇتتىقتادى، جارىستى ۇيىمداستىرۋعا اتسالىسقاندارعا العىس ءبىلدىردى.

چەمپيوناتقا ەلىمىزدىڭ 7 وبلىسىنان 183 سپورتشى قاتىسادى. ولار —  اباي، قوستاناي، پاۆلودار، قاراعاندى، سقو مەن شقو جانە رەسپۋبليكالىق ماڭىزى بار ەكى قالا – استانا مەن الماتىنىڭ سپورتشىلارى.

كونكي جارىسى — قىسقى سپورتتىڭ باسىم تۇرلەرىنىڭ ءبىرى سانالادى. سوندىقتان دا ءبىزدىڭ مينيسترلىك وقۋ-جاتتىعۋ جيىندارىن ۇيىمداستىرۋمەن، قازاقستاندىق سپورتشىلاردىڭ حالىقارالىق جارىستارعا قاتىسۋىن قامتاماسىز ەتۋمەن، سونداي-اق قازاقستاندا حالىقارالىق جانە رەسپۋبليكالىق جارىستاردى ۇيىمداستىرۋمەن جانە وتكىزۋمەن بەلسەندى اينالىسىپ كەلەدى. سپورتشىلارىمىزعا جارقىن جەڭىستەر تىلەيمىن، — دەدى تۋريزم جانە سپورت ءمينيسترى ەرمەك مارجىقپاەۆ.

قىسقى وليمپيادادا بارلىعى 114 مەدال جيىنتىعى ساراپقا سالىنادى. كونكيمەن جۇگىرۋشىلەردىڭ ۇلتتىق فەدەراتسياسىنا كىرەتىن سپورت تۇرلەرى- شورت-ترەك، مانەرلەپ سىرعاناۋ جانە كونكيمەن سىرعاناۋ سپورتى بويىنشا 28 مەدال جيىنتىعى قاراستىرىلعان.

فوتو: تۋريزم جانە سپورت مينيسترلىگى