پاراازيادادا تاعى ءبىر قازاقستان سپورتشىسى قولا مەدال الدى

قىتايدىڭ حانچجوۋ قالاسىندا ءوتىپ جاتقان IV پارا ازيا ويىندارىندا قازاقستان سپورتشىلارىنىڭ قورجىنى تاعى ءبىر مەدال ءتۇستى.

رومان پوتاپوۆ S12 ساناتى بويىنشا 100 مەتر قاشىقتىقتى ارقامەن جۇزۋدە قولا مەدال جەڭىپ الدى. ونىڭ كورسەتكىشى — 1 مينۋت 10.25 سەكۋند.

التىن مەدالدى يندونەزيالىق ياۆياندا ماۋلانا ريفكي (1: 03.55) يەلەندى. يراننان كەلگەن كاريمي يوحان ابادي موحامماد حوسسەين (1:09.05) كۇمىس مەدال يەگەرى اتاندى.

وسىمەن قازاقستان سپورتشىلارى ەكى التىن، ءۇش كۇمىس جانە ءتورت قولا مەدال الدى.

بيىلعى پارا ازيا ويىندارى قىتايدىڭ حانچجوۋ قالاسىندا بولىپ جاتىر. ول 22 قازاندا باستالدى. پاراازيادا 28 قازانعا دەيىن بولادى. بيىلعى جارىسقا  ەلىمىزدەن سپورتتىڭ 14 تۇرىنەن 131 سپورتشى قاتىسۋدا.

پاراازيادادا جالپى سانى سپورتتىڭ 22 تۇرىنەن 564 جۇلدە جيىنتىعى ويناتىلاتىن بولادى. اتلەتتەر پارا دزيۋدو، پارا پاۋەرليفتينگ، پارا ءجۇزۋ، پارا جەڭىل اتلەتيكا، پارا تاەكۆوندو، پارا وق اتۋ، پارا ساداق اتۋ، وتىرىپ ويناۋ ۆولەيبولى، پارا ۇستەل تەننيسى، پارا ۆەلوسپورت، پارا اكادەميالىق ەسۋ، شاحمات، بوچچا، كانوە سىندى جارىستارعا قاتىسادى.

داستان كەنجالين،

استانا

فوتو: تۋريزم جانە سپورت مينيسترلىگى