«ءبىر اتانىڭ بالالارى دوپ تەبەدى». جانۇيالىق جارىستىڭ «جەلكەسىن ۇزگەن» ساۋرانباەۆتار!

«سپورت» گازەتتەرىنىڭ وسى عاسىردىڭ العاشقى جىلدارىنان بەرى وتكىزىپ كەلە جاتقان «ءبىر اتانىڭ بالالارى فۋتبول وينايدى» اتتى شاعىن فۋتبولدان جانۇيالىق كوماندالار اراسىنداعى جارىسى بار بولاتىن. ءوزىم ويلاپ تاپقان، قاقىسى وزىمدە عانا بولعان وسى جارىس 20 جىلعا تاياۋ ۋاقىتتا جانۇيالىق كوماندالاردىڭ قۋانىشى بولدى دەسەم ارتىق ەمەس.

ءبىر اتانىڭ ۇرپاقتارى ءبىر كومانداعا بىرىككەن كەزدە تۋىستىق سەزىم، باۋىرلاسۋ كۇشەيىپ، وتباسىنىڭ بىرلىگى ارتا تۇسەتىنىنە داۋ جوق. ءارى بۇل جارىس فۋتبول سەكىلدى ميلليوندار ونەرىنە بالالاردى باعىتتاۋدىڭ كەرەمەت ۇلگىسى. مىسالى، قازاقستان قۇراما كومانداسىندا ويناعان جامبىل كوكەەۆتىڭ 11-12 جاسىندا وسى تۋرنيرگە قاتىسىپ، جىگىت بولىپ، ۇلكەن فۋتبولدىڭ شەبەرى بولعانشا دا، ودان كەيىن دە وسى جارىستان قول ۇزبەگەندىگىن ماقتانىشپەن ايتا الامىن. كوكەەۆتەر جانۇيالىق كومانداسىن قالاي ماقتاسا دا ارتىق ەمەس. ولار وسى جارىستىڭ 6 دۇركىن چەمپيوندارى! جانە جىل سايىن ولار جاڭا ءبىر سابيلەرىن وسى جارىسقا قاتىستىرادى. بۇگىندە جىگەر، جامبىل، مەيىرجان كوكەەۆتەر ءتۋرنيردىڭ ۇزدىكتەرى اتانىپ ۇلگەردى. وكىنىشتىسى، بۇگىنگە دەيىن بۇل باستامانىڭ تۇراقتى دەمەۋشىسى جوق، جىل سايىن اركىمگە جالىنىپ-جالپايىپ وتكىزىپ ءجۇرمىز. اتتەڭ بيلىك باسىنداعى بىرەۋدىڭ قۇرىعاندا قۇداسى بولسام عوي، جان-جاعىمدا كومەك بەرىپ، دەمەۋشىلىك جاساپ، جۇگىرەتىندەر بولار ەدى-اۋ دەپ ارماندايمىن بۇگىن…

اقىرى سول جوقتىقتىڭ زاردابىنان جارىستى قۇرتىپ تىندىق. بيىل جارىس الماتىدا وتكەن. كاسىبي تورەشىلەر ءبىر جارىم كۇنگى جارىستى وتكىزىپ بەرۋگە اكەسىنىڭ قۇنىن سۇرايدى، سوندىقتان دا جاس، تاجريبەلەرى ازداۋ تورەشىلەر شاقىرعانبىز جارىسقا. الماتىلىق ساۋرانباەۆتار كومانداسى شىعىسقازاقستاندىق جاقسىلىقوۆتارمەن ويىن كەزىندە ويىن ءتارتىبىن بۇزادى. ەكى كوماندا ۇستاسىپ قالادى. تورەشى تىم شەكتەن شىققان ساۋرانباەۆقا سارى قاعاز كورسەتسە، ول الاڭ ۇستىندە تورەشىنى جاعاسىنان الا كەتەدى. تورەشى قىزىل قاعاز كورسەتسە، سارت ەتكىزىپ اۋىزدان قويىپ جىبەرەدى. ەرنى جارىلىپ، اۋزى قاناعان تورەشىگە وزگە ساۋرانباەۆتار دا تاپ-تاپ بەرەدى. كوماندانى تارتىپكە شاقىرعان جارىس سەكرەتارىن ارتىنان كەلىپ ۇرىپ، ەدەنگە قۇلاتىپ، شەكەسىن جارادى دا جاتقان جەرىندە تەۋىپ، بەتىنە جارا سالادى. ءسويتىپ جارىسقا كومەككە كەلگەن ستۋدەنت تورەشىلەر ۇيلەرىنە جاراقات الىپ، قان جالاپ قايتتى.

بۇل ايقاي-شۋدى ەستىپ كەلەسى زالدا ءوتىپ جاتقان ويىندى تاستاپ جۇگىرىپ كەلگەن مەنى ساۋرانباەۆتاردىڭ ەشقايسىسى قۇيرىعىنا دا قىستىرعان جوق. ىستەگەن تارتىپسىزدىگى ءۇشىن كەشىرىم سۇراپ، جاس تورەشىلەرگە مەيىرىم كورسەتپەك تۇگىلى، مەنىڭ نەمەرەممەن جاستى كەلىنشەكتەرى: «ءوزىڭ كىنالىسىڭ، نەگە تاجىريبەلى تورەشى المايسىڭ!» دەپ ماعان شاق-شاق ەتكەندە، مەن بۇل جانۇيادان كۇدەر ءۇزدىم! جىگىتتەرىنىڭ بىرەۋى ايەلدەرىنە «قوي، ۇيات بولادى!» دەمەدى-اۋ دەمەدى. مەن سودان-اق بۇل تۇقىمداعى ءتارتىپ پەن تاربيەدەن ءتۇڭىلدىم. سوندا بۇل جانۇيا جارىسقا فۋتبول ويناۋ ءۇشىن ەمەس، توبەلەس، قان ىزدەپ كەلگەن بە؟.. تورەشى بالالار جارالارىن جازۋعا جارىستى تاستاپ كەتتى. مەن ۇزاق ويلانىپ، جارىستى وسى كەزەڭنەن ءۇزدىم دە، ەرتەڭىنە قالعان قارجىنى جەڭىلمەگەن كوماندالارعا تەڭ ءبولىپ بەرىپ، سوناۋ 2001 جىلدان بەرى ءوتىپ جۇرگەن جارىستىڭ ءۇش جىل بويى وتكىزىلمەيتىنىن حابارلادىم. باسقا امال جوق ەدى. ساۋرانباەۆتار وتباسى سەكىلدى جانۇيالىق كوماندانىڭ ۇلگىسىمەن فۋتبول الاڭىندا نە ويىنشى، نە تورەشى ءولىپ كەتۋىنەن قورىقتىم. سول قاقتىعىستىڭ ۇستىنە وسى ءتۋرنيردىڭ ءبىرىنشى كۇنىنەن بەرى قاتىسىپ كەلە جاتقان جاۋعاشوۆتار كومانداسى كەلىپ قالىپ، ءتارتىپ ورناتپاعاندا، ول الاڭدا نە بولاتىنى بەلگىسىز ەدى. قۇداي ساقتادى قايتا!

وزگە كوماندالار مەنىڭ شەشىمىمدى ۇلكەن وكىنىشپەن قابىلدادى. بىراق باسقا جول كورمەدىم. وبالى ساۋرانباەۆتارعا! اسىرەسە، اعا-اكەلەرىنە ەرىپ كەلگەن 12-15 جاسار جاس ساۋرانباەۆتار نە ويلادى ەكەن؟ اكەلەرىمىز، اعالارىمىز بىزدەن 3-4-اق جاس ۇلكەن بالالاردى قان قىلىپ ۇرعانى ەرلىك دەپ ويلادى ما؟! مۇمكىن بۇل تۇقىمدا جاعا جىرتۋ، جۇدىرىق جۇمساۋ اتادان قالعان مۇرا شىعار؟! بەتى اۋلاق، ەندى بۇل جارىس جالعاساتىن بولسا، ساۋرانباەۆتاردى جارىستىڭ ماڭىنان دا جۇرگىزبەۋ كەرەك. وسىنداي بۇقارالىق جارىستىڭ تامىرىنا بالتا شاپقان ساۋرانباەۆتاردىڭ ۇلگىسى قوعامىمىزدا كوبەيىپ كەتپەسە ەكەن دەپ تىلەپ ءجۇرمىن بۇگىندە اللادان!

ن.جۇنىسباي ۇلى،
جوبا اۆتورى، قازاقستاننىڭ ەڭبەك سىڭىرگەن قايراتكەرى.
استانا قالاسى