قازاق كۇرەسى: ساۋد ارابياسىندا بالۋاندارىمىز بارلىق جۇلدەنى جەڭىپ الدى

ساۋد ارابياسىنىڭ ار-رياد قالاسىندا ءوتىپ جاتقان V دۇنيەجۇزىلىك جاۋىنگەرلىك ونەر ويىندارىندا قازاق كۇرەسىنەن مىنعا تۇسكەن ۇلتتىق قۇرامانىڭ بالۋاندارىنىڭ ءبارى جەڭىسكە جەتتى، دەپ حابارلادى تۋريزم جانە سپورت مينيسترلىگى.

قازاقستان دزيۋدو فەدەراتسياسىنىڭ حابارلاۋىنشا، ۇلتتىق سپورت تۇرلەرىنەن بىرقاتار جۇلدە جيىنتىعى ساراپقا سالىندى. ونىڭ ىشىندە قازاق كۇرەسى دە بار. قازاق كۇرەسى العاش رەت جاۋىنگەرلىك ونەر ويىندارىنىڭ باعدارلاماسىنا ەنىپ، بەس سالماقتا مىقتىلار بەلگىلى بولدى. ونىڭ ۇشەۋى ەرلەر، ەكەۋى ايەلدەر اراسىنداعى بەلدەسۋدە انىقتالدى.

جۇماجان قوجامبەكوۆ (75 كگ)، ءمادي امانگەلدى (85 كگ) مەن روزا نىسانتايقىزى (70 كگ) ءوز سالماعىندا قاسىلاس شاق كەلتىرگەن جوق. ال فينالدا بەلدەسكەن نۇر امانشۇكىروۆ (65 كگ) وزبەكستاندىق سپورتشىعا ەسە جىبەردى.

جارتىلاي فينالدا راۋزا نۇرمۇحامبەتوۆا (60 كگ) جەڭىلىپ، قولا مەدال ءۇشىن كۇرەستە قارسىلاسىنان باسىم ءتۇستى.

جالپى ەسەپتە قازاقستان قۇراماسى ءبىرىنشى ورىن السا، وزبەكستان مەن قىرعىزستان ەكىنشى جانە ءۇشىنشى ورىنعا يە بولدى.

جارىستان سوڭ ويىنداردىڭ جەڭىمپازى  ءمادي امانگەلدى وسى جەڭىسىن رەسپۋبليكا كۇنىنە ارنايتىنىن، ال بەلدەسۋدە ءار سالماقتا كىلەڭ مىقتى بالۋانداردىڭ جينالعانىن ايتتى.

ەڭ قيىنى فينال بولدى. قارسىلاسىم تاجىكستاندىق سپورتشى بىلتىر استاناداعى الەم چەمپيوناتىندا قولا مەدال جەڭىپ العان. ازيا چەمپيوناتىندا كۇمىس جۇلدەگەر اتانعان. جاقسى كۇرەسىپ شىقتى، — دەدى ول.

جالپى قازاق كۇرەسىنەن اراب تۇبەگى ەلىنە 14 مەملەكەتتەن 40 بالۋان جينالدى. وندا يتاليا، ءازىربايجان، پولشا، موڭعوليا، گرۋزيا، وزبەكستان، تاجىكستان، قىرعىزستان، تۇركىمەنستان، يران، سەربيا، ءۇندىستان، نيدەرلاند كورولدىگى مەن ەلىمىزدىڭ بالۋاندارى كۇرەستى.

قازاق كۇرەسىمەن بىلتىردان باستاپ اينالىسامىن. يتالياداعى قازاق كۇرەسى قاۋىمداستىعىنىڭ پرەزيدەنتى ۆيتتوريو دجوردجي مىرزانىڭ ارقاسىندا مەنى استاناداعى الەم چەمپيوناتىنا قاتىسۋعا شاقىردى. سول كەزدە قولا مەدال جەڭىپ الىپ، يتاليا ۇلتتىق قۇراماسى ساپىنا قوسىلدىم ءارى ساۋد ارابياسىنداعى وسى ويىنداردىڭ جولداماسىنا يە بولدىم. بۇل مەن ءۇشىن زور مارتەبە. وسىنداي مۇمكىندىك سىيلاعان ۇيىمداستىرۋشىلارعا ريزامىن.

جاتتىعۋدان كەيىن شاكىرتتەرىمدى دە وسى سپورتقا باۋلىپ ءجۇرمىن، — دەدى ايەلدەر اراسىندا 70 كگ دەيىنگى سالماقتا كۇمىس جۇلدەگەر اتانعان مارياسول مومەنتە.

سونداي-اق بەلبەۋ كۇرەسىندە دە قازاقستان سپورتشىلارىنا ەكى قولا جۇلدەنى يەلەندى. نۇرسۇلتان وتەپبەرگەن ۇلى (80 كگ) مەن نازەركە ابىلتاەۆا (55 كگ) ءوز سالماعىندا ءۇشىنشى ورىن الدى.

قازىر قازاقستان سپورتشىلارى 5 التىن، 10 كۇمىس، 13 قولا مەدالمەن جالپى ەسەپتە جەتىنشى ورىندا كەلەدى. كوش باسىندا ۋكراينا بالۋاندارى.

فوتو: تۋريزم جانە سپورت مينيسترلىگى