IV Azııa Para oıyndary: Nurdáýlet Jumaǵalı eki dúrkin chempıon atandy

Qytaıdyń Hanchjoý qalasynda ótip jatqan IV Azııa Para oıyndarynda Nurdáýlet Jumaǵalı sýǵa júzý jarysynda altyn medal ıegeri atandy. Ol 200 metr qashyqtyqty 2 mınýt 16:74 sekýndtta júzip ótip, Azııa Para oıyndarynyń rekordyn jańartty.

Týrızm jáne sport mınıstri Ermek Marjyqpaev sportshy jeńisimen quttyqtady.

Nurdáýletti osy jetistigimen quttyqtaımyn! Búgin bizdiń chempıonymyzǵa teń keletin eshkim bolǵan joq. Oǵan elimizdiń týy astynda jeńis jolyn jalǵastyryp, otandastaryn jarqyn jeńisterimen qýantýyn tileımin!, — dedi mınıstr.

Qazaqstan komandasy paravoleıboldan kúmis medal jeńip aldy.

Altyn medal úshin tartysty oıynda Qazaqstan quramasy Iran komandasyna ese jiberdi.

Esterińizge sala keteıik, voleıboldy otyryp oınaýdan Qazaqstan quramasy Azııa chempıonatynda kelesi jyly Parıjde ótetin Paralımpıadaǵa joldama alǵan bolatyn.

Eske salsaq, keshe Qazaqstan sportshylary 1 altyn jáne 1 qola medal ıelendi.

Dıas Kenjebek júzýden altyn medal ıegeri atandy. Ol 100 metr qashyqtyqty 1 mınýt 05:42 sekýndta júzip ótip, Azııa jáne Azııa Para oıyndarynyń rekordyn jańartty.

Odan keıin para velosporttan Qazaqstan quramasy qola júldege ıe boldy.

Tasjoldaǵy para velojarys toptyq saıysynda ulttyq qurama sportshylary Kenjeǵul Seıitjan men Anton Lavrentev márege úshinshi bolyp jetti.

Dastan KENJALIN,

ASTANA