قازاقستان فۋتبول فەدەراتسياسى 2024 جىلعى ەۋروپا چەمپيوناتىنىڭ ىرىكتەۋ كەزەڭىندەگى قازاقستان – سان-مارينو ماتچىنىڭ بيلەتتەرى ونلاين ساتىلىمعا شىققانىن حابارلادى.
بۇل ماتچ 17 قاراشادا «استانا ارەنا» ستاديونىندا بولادى. ويىن ساعات 21.00-دە باستالادى.
بيلەتتەردى Ticketon.kz سايتىنان ساتىپ الۋعا بولادى. بيلەتتىڭ باعاسى 1 500 تەڭگەدەن باستالادى.
ءۇش كۇننەن كەيىن قازاقستان قۇراماسى سىرت الاڭدا سلوۆەنيامەن وينايدى. ماتچ ليۋبلياناداعى «ستوجيتسە» ستاديونىندا استانا ۋاقىتىمەن ساعات 01.45-تە (جەرگىلىكتى ۋاقىتپەن 20.45) باستالادى.
فۋتبولدان قازاقستان قۇراماسىنىڭ باس جاتتىقتىرۋشىسى ماگومەد اديەۆ 2024 جىلعى ەۋروپا چەمپيوناتىنىڭ ىرىكتەۋ تۋرنيرىندە 17 قاراشادا سان-مارينو جانە 20 قاراشادا سلوۆەنيا قۇرامالارىنا قارسى وتەتىن ويىندارعا شاقىرىلاتىن ويىنشىلاردىڭ كەڭەيتىلگەن ءتىزىمىن جاريالادى.
سان-مارينو مەن سلوۆەنيامەن ويىنعا وقۋ-جاتتىعۋ جيىنى 5 قاراشادا استانادا باستالادى. سوڭعى قۇرام كەيىنىرەك انىقتالادى.
داستان كەنجالين،
استانا
فوتو: قازاقستان فۋتبول فەدەراتسياسى