شورت-ترەك قۇراماسى ءتورت قۇرلىق چەمپيوناتىندا العاش رەت جۇلدە جەڭىپ الدى

كانادانىڭ لاۆال قالاسىندا شورت-ترەكتەن وتكەن ءتورت قۇرلىق چەمپيوناتىندا سپورتتىڭ وسى تۇرىنەن ۇلتتىق قۇراما العاش رەت قولا جۇلدەنى جەڭىپ الدى، دەپ حابارلادى تۋريزم جانە سپورت مينيسترلىگى سپورتتى دامىتۋ ديرەكتسياسىنىڭ ءباسپاسوز قىزمەتى.

سوڭعى كۇنى 3 000 مەترگە جارىستا ەلىمىزدىڭ ايەلدەر قۇراماسى مارەگە ءۇشىنشى جەتىپ، قولا جۇلدەگەر اتاندى. كوماندا ساپىندا الينا اجىعاليەۆا، يانا حان، ماليكا ەرمەك، مادينا جانبۋسينوۆا مەن ولگا تيحونوۆا سىنعا ءتۇستى. قازاقستان قۇراماسىنىڭ ۋاقىت كورسەتكىشى – 4.16.200 سەكۋند.

باس جۇلدەنى كانادانىڭ سپورتشىلارى جەڭىپ الدى. وڭتۇستىك كورەيا كۇمىس مەدالگە يە بولدى.

ءتورت قۇرلىق چەمپيوناتى 2020 جىلدان بەرى حالىقارالىق كونكي تەبۋشىلەر وداعىنىڭ (ISU) ۇيىمداستىرۋىمەن وتكىزىلىپ كەلەدى. ونىڭ ماقساتى – ەۋروپادان باسقا قۇرلىقتاعى سپورتشىلاردىڭ اراسىندا جارىس وتكىزۋ. العاش رەت ول 2020 جىلى كانادانىڭ مونرەال قالاسىندا وتسە، ودان كەيىن 2022 جىلى  اقش-تىڭ سولت-لەيك-سيتي قالاسىندا جالاۋىن جەلبىرەتتى.

بۇل جارىستا2020 جىلدان بەرى وڭتۇستىك كورەيا، كانادا، اقش، قىتاي، جاپونيا مەن قازاقستان مەدال جەڭىپ العان.

فوتو: تۋريزم جانە سپورت مينيسترلىگى سپورتتى دامىتۋ ديرەكتسياسى