ءماجىلىس دەپۋتاتى «استانا مەن «بارىستى» قارجىلاندىرۋدى شەكتەۋدى ۇسىندى (ۆيدەو)

بۇگىن ءماجىلىس وتىرىسىندا دەپۋتات نارتاي سارسەنعاليەۆ ۇكىمەت باسشىسىنا ساۋال جولداپ، كاسىبي سپورتتى قارجىلاندىرۋ ماسەلەسىن كوتەردى. ول كاسىبي سپورتقا بولىنگەن قارجىنىڭ ءتيىمسىز جۇمساوىپ جاتقانىن، حالىقتىڭ اقشاسىنان قۇرىلعان «سامرۇق-قازىنا» قورىنىڭ كلۋبتارىن قارجىلاندىرۋدى شەكتەپ، سپورتتى قارجىلاندىرۋ ماسەلەسى بويىنشا ءوزىنىڭ ۇسىنىستارىن ايتتى.

قۇرمەتتى ءاليحان اسحان ۇلى!

مەملەكەت باسشىسى جۋىردا سپورتشىلارمەن كەزدەسكەندە: «كاسىبي سپورتتاعى اسا جوعارى جەتىستىكتىڭ بولماعانى مەملەكەتتەن بولىنەتىن قاراجاتتىڭ ءتيىمسىز جۇمسالاتىنىن كورسەتەدى»، — دەدى.

ەندى ەسەپتى قاراڭىزدار، قازاقستان جوعارى جەتىستىكتەر سپورتىنا جىل سايىن بيۋدجەتتەن 775 ميلليون دوللار ءبولىپ وتىر. مىناۋ نە ماسقارا؟ حالىق كەدەيشىلىكتىڭ قۇزىنا قۇلاپ جاتقاندا سپورتقا جىلىنا 775 ميلليون دوللار ءبولۋ ساۋ ادامنىڭ اقىلىنا سيا ما؟

ەڭ سوراقىسى، قيساپسىز اقشا بولگەنمەن جەتكەن جەتىستىگىمىز دە جوق. مىسالى، 2021 جىلى توكيودا وتكەن جازعى وليمپيادا ويىندارىندا قازاقستان قۇراماسى بار-جوعى 8 قولا مەدال يەلەنىپ، 92 مەملەكەتتىڭ ىشىندە 83-ورىن الدى. سوندا الگى 775 ميلليون دوللارعا جەتكەن جەتىستىگىمىز وسى ما؟ ەندى سالىستىرىپ ايتايىن، جوعارى جەتىستىكتەر سپورتىنا 41 ميلليون دوللار بولگەن نيدەرلاندى توكيوداعى وليمپيادادا 10 التىن، 12 كۇمىس، 14 قولا مەدال الدى. ال جوعارى جەتىستىكتەر سپورتىنا 46 ميلليون دوللار بولگەن دانيا توكيودا 3 التىن، 4 كۇمىس، 4 قولا مەدال يەلەندى. ءبىزدىڭ سۇرىمىز اناۋ، 775 ميلليون دوللاردى سپورتقا ءبولىپ 8 قولا جۇلدەمەن كەلدىك.

جۋىردا قىتايدا وتكەن ازيا ويىندارىنان 11 ورىنمەن ورالعانىمىزدى جانە قوسىڭىز بۇعان. بۇل ءبىر.

ۇسىنىستار:

1.مينيسترلىك بەكىتكەن 180 سپورت ءتۇرىن شۇعىل قىسقارتۋ قاجەت. مەملەكەت باسىمدىق بەرەتىن باعىتتاردا وليمپيادالىق، ۇلتتىق، ودان كەيىن، پارا جانە سۋردوليمپيادالىق سپورتتار قالۋى ءتيىس. وليمپيادالىق سپورتتاردىڭ بارلىعى بىردەي جەمىس بەرىپ جاتقان جوق. سوندىقتان ساراپتاما جاساپ، جۇلدە اكەلەتىن تۇرلەرىنە عانا باسىمدىق بەرۋ كەرەك.
2. كاسىبي سپورت كلۋبتارىنا بەرىلەتىن اقشانى شەكتەۋ قاجەت. مىسالى، «استانا» فۋتبول كلۋبى، «بارىس» حوككەي كلۋبى، «استانا» باسكەتبول كلۋبى مەن «استانا» ۆەلوكومانداسىنا جىلىنا «سامرۇق-قازىنا»-دان 65 ميلليون دوللار بولىنەدى. بۇل اسىپ-تاسۋ، تۇپتەپ كەلگەن ول اقشا «سامرۇق-قازىنا»-نىڭ ەمەس حالىقتىڭ اقشاسى.
3. لەگيونەرلەرگە بيۋدجەتتىڭ ەسەبىنەن ايلىق تولەۋدى توقتاتۋ كەرەك. نەگە ءبىز قازىنادان شەتەلدىك سپورتشىنى اسىراۋىمىز كەرەك. لەگيونەر شاقىرا ما، ونىڭ ايلىعىن دەمەۋشىلەردىڭ ەسەبىنەن تولەسىن سپورتتىق كلۋبتار.
4. جەرگىلىكتى سپورت فەدەراتسيالارى تىكەلەي ورتالىققا باعىنۋى كەرەك. ايتپەسە قازىر اركىم بىلگەنىن ىستەپ كەتتى. سالدارىنان ناتيجە جوق.
5. سپورت سالاسىنا «مونيتورينگ» دەگەن تۇسىنىك ەنگىزۋ كەرەك. ويتكەنى قۇزىرلى ۆەدومستۆا ايماقتاعى جاعدايلاردان بەيحابار، تەكسەرىپ تە بارا المايدى. اتالعان ۇسىنىستاردى نەعۇرلىم تەز جۇزەگە اسىرۋ قاجەت. سەبەبى جۋىردا پاريج وليمپياداسى باستالادى، سول كەزدە تاعى ۇياتقا قالماۋ كەرەك.
وسى دەپۋتاتتىق ساۋالعا زاڭنامادا بەلگىلەنگەن مەرزىم ىشىندە جازباشا جاۋاپ كۇتەمىز.

ەكىنشى ماسەلە، قازاقستانداعى سپورتقا جاۋاپتى مينيسترلىك 180-نەن استام سپورت ءتۇرىن رەسمي تىركەپ، وعان بيۋدجەتتەن قىرۋار اقشا ءبولىپ وتىر. سونىڭ تەك 50-گە جۋىعى عانا جازعى وليمپيادا ويىندارىنىڭ تىزىمىنە ەنگەن. قالعان 100-دەن سپورت تۇرىنە مينيسترلىك قاي جەتىسكەنىنەن بيۋدجەتتەن اقشا ءبولىپ وتىر دەپ سۇراعىم كەلەدى؟ سالىستىرىپ ايتايىن، ۇلىبريتانيا وليمپيادا باعدارلاماسىنا كىرەتىن تەك 15 سپورت تۇرىنە بيۋدجەتتەن قارجى بولەدى، گەرمانيا 18 سپورت تۇرىنە قازىنادان اقشا بەرەدى، ال كورشىمىز وزبەكستان تەك 17 سپورت تۇرىنە بيۋدجەتتىڭ قارجىسىن جۇمسايدى. بىزدىكى نە شاشپالىق؟ قازاقستان قازىنادان اقشا بولەتىن 180 سپورت ءتۇرىنىڭ ىشىندە پەنچاك سيلات، سپورتتىق بالىق اۋلاۋ، بياتل، ترياتل، پەتانك، تەكبول، ۋنيفايت، چەرليدينگ دەگەندەر ءجۇر. وسىلاردىڭ اتىن ەل ەندى ەستىپ وتىرعان شىعار. ايتپاقشى قازاقستاننىڭ بيۋدجەتىنەن قارجى بولىنەتىن جانە ءبىر سپورت ءتۇرى بار، سپورت نا پيلونە دەگەن. ىزدەپ قاراڭىزدار، سپورت جاناشىرلارى مۇنى ستريپتيز دەپ سىناپ جاتىر. سوندا مينيسترلىك وسىلارعا قالاي قارجى ءبولىپ وتىر؟
ال ۇلتتىق سپورتىمىزدىڭ ءحالى نەشىك دەگەنگە كەلەيىك. ۇلتتىق سپورت تۇرلەرىن قولداۋعا 2024 جىلعا بار بولعانى 10 ميلليون 460 مىڭ تەڭگە ءبولۋ جوسپارلانعان. وتە از. مۇنى قالاي تۇسىنۋگە بولادى؟ ول ازداي، قازاق كۇرەسىن مازاق قىلىپ تۋرنير ۇيىمداستىرىپ، ونى جاھانعا جاريالاعاندار جانە بار.
تاعى ءبىر ماسەلە، تۋريزم جانە سپورت مينيسترلىگىنىڭ بيۋدجەتىن قاراعاندا قۇجاتتىڭ 311-باعدارلاماسىندا: «جەكە جانە زاڭدى تۇلعالارعا، ونىڭ ىشىندە شارۋا، فەرمەرلىك قوجالىقتاردى سۋبسيديالاۋعا 54 ميلليارد تەڭگە قاراستىرىلىپتى. مينيسترلىك شارۋا قوجالىقتارى مەن فەرمەرلىك قوجالىقتارعا نە ءۇشىن قاراجات بەرىپ وتىر؟ بۇل ساۋالدى كوميتەت وتىرىسىندا قويدىق، بىراق جاۋاپ الا المادىق.

 

View this post on Instagram

 

A post shared by نارتاي̆ ارالباي̆ ۇلى (@nartay_aralbayuli)