VI jazǵy Sparakıada:  boksshylar qarsylastaryn anyqtady

13-19 qarasha aralyǵynda bokstan Astana qalasyndaǵy Beeline Arena sport kesheninde ótetin VI jazǵy Spartakıadanyń jerebe tartý rásimi ótti.

Oǵan Soltústik Qazaqstan oblysynyń boksshylarynan basqa óńirler men Astana, Almaty jáne Shymkent qalasynan  177 sportshy qatysady. Boksshylar 13 salmaqta, atap aıtqanda, 46-48, 51, 54, 57, 60, 63,5, 67, 71, 75, 80, 86, 92,+92 kelide  jeńimpazdy anyqtaıtyn bolady.

Bul jarysta 2020 jyldan keıin ulttyq quramanyń negizgi boksshylary atanyp júrgen bylǵary qolǵap sheberleri qatysady. Olardyń arasynda Olımpıada júldegerleri men álem chempıondary bar. Mysaly, bıylǵy jarysqa álem chempıondary Sáken Bıbosynov, Sanjar Táshkenbaı, Mahmud Sabyrhan, Nurbek Oralbaı qatysady.

Odan basqa, kásipqoı boksta judyryqtasyp júrgen Tursynbaı Qulahmet (80 kg), Bekzad Nurdaýletov (80 kg), Nursultan Amanjolov (+92 kg) qaıta óz baqtaryn synaýǵa múmkindik aldy.

Al Hanchjoýda ótken Azııa oıyndarynda el namysyn qorǵaǵan Ertýǵan Zeınýllınov (63,5 kg) Aslanbek Shymbergenov (71 kg) pen Qamshybek Qońqabaev (+92 kg) Spartakıadaǵa qatyspaıdy.

VI Spartakıada Qazsport telearnasy kún saıyn 15.00-de tikeleı efırde kórsetiledi.

Dastan KENJALIN,

ASTANA

 

View this post on Instagram

 

A post shared by House of olympic sports of Kazakhstan (@qaz_olympics)