بوكستان سپارتاكيادادا فاۆوريتتەر كورىنە باستادى (ۆيدەو)

استاناداعى Beeline Arena سپورت كەشەنىندە بوكستان ءار ءتورت جىلدا ءبىر رەت ۇيىمداستىرىلاتىن ەرلەر اراسىنداعى سپارتاكيادا باستالدى، دەپ حابارلادى تۋريزم جانە سپورت مينيسترلىگى.

بوكس باسەكەسىندە الەم چەمپيوندارى – ساكەن بيبوسىنوۆ، سانجار تاشكەنباي، ماحمۇد سابىرحان، نۇربەك ورالباي جانە بارلىق وڭىردەن جينالعان 250-دەن استام بىلعارى قولعاپ شەبەرى سىنعا ءتۇسىپ جاتىر.

بوكسشىلاردىڭ جەكپە-جەكتەرى وليمپيادالىق جۇيە بويىنشا وتەدى. ەرلەر 13 سالماق (46-48 كگ، 51 كگ، 54 كگ، 57 كگ، 60 كگ، 63،5 كگ، 67 كگ، 71 كگ، 75 كگ، 80 كگ، 86 كگ، 92 كگ، +92 كگ) دارەجەسىندە جەڭىمپازداردى انىقتايدى.

VI جازعى سپارتاكيادانىڭ العاشقى جارىس كۇنىندە 48، 54، 67، 75، 86 كگ سالماقتاعى سپورتشىلار 1/8 فينالدىڭ جەكپە-جەكتەرىن وتكىزدى.

سپارتاكيدا كەزىندە ەل چەمپيونى نۇرسۇلتان التىنبەك (54 كگ)، Elorda Cup باسەكەسىنىڭ جەڭىمپازى تيمۋر قابدەش (54 كگ)، جاستار اراسىندا قازاقستان چەمپيونى ارمات ارمان ۇلى (75 كگ)، تيمۋر نۇرسەيىتوۆ (75 كگ)، امانبەك قازانعاپوۆ (86 كگ) سىندى بوكسشىلار جارىستى ءساتتى باستادى. ال 75 كەلىدەگى فاۆوريتتەردىڭ ءبىرى سانالعان اياتۋللا تاكىجانوۆ تارتىستى جەكپە-جەكتە جاستار اراسىنداعى ازيا چەمپيونى باقبەرگەن الياسقاروۆتان 1:4 ەسەبىمەن جەڭىلىپ قالدى.

الداعى ءبىر اپتا بويى ەلىمىزدىڭ ەڭ مىقتى بوكسشىلارى استانانىڭ شارشى الاڭىندا قولعاپ ءتۇيىستىرىپ، جانكۇيەرلەرگە تارتىستى جەكپە-جەكتەر ۇسىنادى. تۋرنير جەڭىمپازدارى كەلەسى جىلى وتەتىن حالىقارالىق ءىرى جارىستاردا ەل نامىسىن قورعايتىن بولعاندىقتان، ءاربىر سالماقتاعى ايقاستار ءادىل باعالانىپ، شىن مىقتى جەڭىسكە جەتۋگە ءتيىس. ەشقانداي بۇرا تارتۋشىلىققا جول بەرىلمەۋى كەرەك. جەكپە-جەكتەردىڭ ءادىل باعالانۋى ءۇشىن ەلورداعا ەلىمىزدىڭ جانە شەتەلدىڭ ەڭ تاجىريبەلى دەگەن تورەشىلەرى شاقىرىلدى. ەلوردا تۇرعىندارىن جانە قالا قوناقتارىن بوكسشىلارعا قولداۋ كورسەتۋگە شاقىرامىن، — دەدى تۋريزم جانە سپورت ءمينيسترى ەرمەك مارجىقپاەۆ.

بۇگىن 51، 57، 60، 71 كەلىدەگى بوكسشىلار سىنعا تۇسەدى. بوكس باسەكەسىنىڭ بارلىق جەكپە-جەگىن Qazsport تەلەارناسى كۇندىزگى ساعات 12.00-دەن باستاپ تىكەلەي ەفيردە كورسەتەدى.

فينالدىق جەكپە-جەكتەر 19 قاراشاعا جوسپارلانعان.

 

View this post on Instagram

 

A post shared by Official page (@qazsport_official)

 

View this post on Instagram

 

A post shared by Kazakhstan Boxing Federation (@boxingkazakhstan)