Bokstan Spartakıadada favorıtter kórine bastady (VIDEO)

Astanadaǵy Beeline Arena sport kesheninde bokstan ár tórt jylda bir ret uıymdastyrylatyn erler arasyndaǵy Spartakıada bastaldy, dep habarlady Týrızm jáne sport mınıstrligi.

Boks básekesinde álem chempıondary – Sáken Bıbosynov, Sanjar Táshkenbaı, Mahmud Sabyrhan, Nurbek Oralbaı jáne barlyq óńirden jınalǵan 250-den astam bylǵary qolǵap sheberi synǵa túsip jatyr.

Boksshylardyń jekpe-jekteri olımpıadalyq júıe boıynsha ótedi. Erler 13 salmaq (46-48 kg, 51 kg, 54 kg, 57 kg, 60 kg, 63,5 kg, 67 kg, 71 kg, 75 kg, 80 kg, 86 kg, 92 kg, +92 kg) dárejesinde jeńimpazdardy anyqtaıdy.

VI jazǵy Spartakıadanyń alǵashqy jarys kúninde 48, 54, 67, 75, 86 kg salmaqtaǵy sportshylar 1/8 fınaldyń jekpe-jekterin ótkizdi.

Spartakıda kezinde el chempıony Nursultan Altynbek (54 kg), Elorda Cup básekesiniń jeńimpazy Tımýr Qabdesh (54 kg), jastar arasynda Qazaqstan chempıony Armat Armanuly (75 kg), Tımýr Nurseıitov (75 kg), Amanbek Qazanǵapov (86 kg) syndy boksshylar jarysty sátti bastady. Al 75 kelidegi favorıtterdiń biri sanalǵan Aıatýlla Tákijanov tartysty jekpe-jekte jastar arasyndaǵy Azııa chempıony Baqbergen Álıasqarovtan 1:4 esebimen jeńilip qaldy.

Aldaǵy bir apta boıy elimizdiń eń myqty boksshylary Astananyń sharshy alańynda qolǵap túıistirip, jankúıerlerge tartysty jekpe-jekter usynady. Týrnır jeńimpazdary kelesi jyly ótetin halyqaralyq iri jarystarda el namysyn qorǵaıtyn bolǵandyqtan, árbir salmaqtaǵy aıqastar ádil baǵalanyp, shyn myqty jeńiske jetýge tıis. Eshqandaı bura tartýshylyqqa jol berilmeýi kerek. Jekpe-jekterdiń ádil baǵalanýy úshin elordaǵa elimizdiń jáne sheteldiń eń tájirıbeli degen tóreshileri shaqyryldy. Elorda turǵyndaryn jáne qala qonaqtaryn boksshylarǵa qoldaý kórsetýge shaqyramyn, — dedi týrızm jáne sport mınıstri Ermek Marjyqpaev.

Búgin 51, 57, 60, 71 kelidegi boksshylar synǵa túsedi. Boks básekesiniń barlyq jekpe-jegin Qazsport telearnasy kúndizgi saǵat 12.00-den bastap tikeleı efırde kórsetedi.

Fınaldyq jekpe-jekter 19 qarashaǵa josparlanǵan.

 

View this post on Instagram

 

A post shared by Official page (@qazsport_official)

 

View this post on Instagram

 

A post shared by Kazakhstan Boxing Federation (@boxingkazakhstan)