جاقسىلىق ۇشكەمپىروۆ اتىنداعى مەشىت اشىلادى

24 قاراشادا الماتى وبلىسى قارساي اۋدانى جىبەك جولى اۋىلىندا گرەك-ريم كۇرەسىنەن قازاقتان شىققان تۇڭعىش وليمپيادا چەمپيونى اتانعان جاقسىلىق ۇشكەمپىروۆتىڭ اتىنداعى مەشىت اشىلادى، دەپ حابارلادى كۇرەس تۇرلەرى فەدەراتسياسى.

مەشىتتىڭ مەكەنجايى: دۇيسەكوۆ كوشەسى، 1.

جاقسىلىق ۇشكەمپىروۆتىڭ شىن ەسىمى — جاقسىلىق ۇشكەمپىر ۇلى امىراليەۆ. ول 1951 جىلى 6 مامىردا جامبىل وبلىسى سۆەردلوۆسك اۋدانىنداعى ديحان اۋىلىندا تۋعان. 2020 جىلى 2 تامىزدا پاندەميا كەزىندە قايتىس بولعان.

1971 جىلى سپورت شەبەرى، 1975 جىلى حالىقارالىق سپورت شەبەرى، 1980 جىلى ەڭبەك سىڭىرگەن سپورت شەبەرى اتاعىن العان. وسى جىلى ول گرەك-ريم كۇرەسىنەن قازاقتان شىققان تۇڭعىش وليمپيادا چەمپيونى اتانعان. وسى جىلدار ارالىعىندا، ناقتىراق ايتساق 1978، 1979 جىلدارى ەكى دۇركىن كەڭەس وداعىنىڭ چەمپيونى، 1981 جىلى الەم چەمپيونى، 1982 جىلى الەم كۋبوگىنىڭ كۇمىس جۇلدەگەرى بولدى. قازاق كسر ەڭبەك سىڭىرگەن جاتتىقتىرۋشىسى اتاعىن دا يەلەنگەن.

كىلەمدەگى مانسابى اياقتالعان سوڭ جاقسىلىق ۇشكەمپىروۆ ەلىمىزدىڭ قوعامدىق ومىرىنە ەتەنە ارالاسىپ، قازاقستاندىق بالۋانداردىڭ الەمدىك جارىستارعا الاڭسىز دايىندالۋىنا اتسالىستى.

سوڭعى سۇحباتتارىنىڭ بىرىندە جاقسىلىق ۇشكەمپىروۆ ءوزىنىڭ ماسكەۋ وليمپياداسىنداعى ەرلىگىن قايتالايتىن قازاق بالۋاندارىنىڭ جەڭىسىن كورىپ كەتۋدى ارماندايتىنىن ايتقان.

قازاق بالۋاندارى اراسىنان وليمپيادا چەمپيونى اتاعىن العاش يەلەنگەن ول ماڭگىلىك جەڭىسىنە 40 جىل تولعاندا ماڭگىلىك ساپارعا اتتاندى.

جاقسىلىق ۇشكەمپىروۆ سپورتتاعى جەتىستىكتەرى ءۇشىن «قۇرمەت بەلگىسى» وردەنىمەن، بىرنەشە مەدالدارمەن ماراپاتتالعان.

استانادا جاقسىلىق ۇشكەمپىروۆتىڭ اتىنداعى جەكپە-جەك سارايى بار. ونىڭ جانىندا ەسكەرتكىشى سالىنعان.