Jaqsylyq Úshkempirov atyndaǵy meshit ashylady

24 qarashada Almaty oblysy Qarsaı aýdany Jibek joly aýylynda grek-rım kúresinen qazaqtan shyqqan tuńǵysh Olımpıada chempıony atanǵan Jaqsylyq Úshkempirovtiń atyndaǵy meshit ashylady, dep habarlady Kúres túrleri federaııasy.

Meshittiń mekenjaıy: Dúısekov kóshesi, 1.

Jaqsylyq Úshkempirovtiń shyn esimi — Jaqsylyq Úshkempiruly Ámirálıev. Ol 1951 jyly 6 mamyrda Jambyl oblysy Sverdlovsk aýdanyndaǵy Dıhan aýylynda týǵan. 2020 jyly 2 tamyzda pandemııa kezinde qaıtys bolǵan.

1971 jyly sport sheberi, 1975 jyly halyqaralyq sport sheberi, 1980 jyly eńbek sińirgen sport sheberi ataǵyn alǵan. Osy jyly ol grek-rım kúresinen qazaqtan shyqqan tuńǵysh Olımpıada chempıony atanǵan. Osy jyldar aralyǵynda, naqtyraq aıtsaq 1978, 1979 jyldary eki dúrkin Keńes Odaǵynyń chempıony, 1981 jyly álem chempıony, 1982 jyly Álem kýbogynyń kúmis júldegeri boldy. Qazaq KSR eńbek sińirgen jattyqtyrýshysy ataǵyn da ıelengen.

Kilemdegi mansaby aıaqtalǵan soń Jaqsylyq Úshkempirov elimizdiń qoǵamdyq ómirine etene aralasyp, qazaqstandyq balýandardyń álemdik jarystarǵa alańsyz daıyndalýyna atsalysty.

Sońǵy suhbattarynyń birinde Jaqsylyq Úshkempirov óziniń Máskeý Olımpıadasyndaǵy erligin qaıtalaıtyn qazaq balýandarynyń jeńisin kórip ketýdi armandaıtynyn aıtqan.

Qazaq balýandary arasynan Olımpıada chempıony ataǵyn alǵash ıelengen ol máńgilik jeńisine 40 jyl tolǵanda máńgilik saparǵa attandy.

Jaqsylyq Úshkempirov sporttaǵy jetistikteri úshin «Qurmet belgisi» ordenimen, birneshe medaldarmen marapattalǵan.

Astanada Jaqsylyq Úshkempirovtiń atyndaǵy Jekpe-jek saraıy bar. Onyń janynda eskertkishi salynǵan.