EURO-2024: Qazaqstan quramasy San-Marıno komandasyn jeńdi (FOTO, VIDEO)

Astanada fýtboldan Eýropa chempıonatynyń irikteý týrnırinde Qazaqstan ulttyq quramasy San-Marıno komandasymen oınap, 3:1 esebimen jeńiske jetti.

Buǵan deıin ulttyq qurama qarsylastarymen úsh ret kezdesip, úsheýinde de jeńiske jetken edi. Bul matchtar 4:0, 3:1, 3:0 eseptermen aıaqtaldy. Al búgingi match «Astana Arena» stadıonynda boldy. Oǵan 30 100 adam jınaldy. Stadıonda ıne shanshar oryn bolmady. Machty tamashalaýǵa prezıdent Qasym-Jomart Toqaev ta bardy.

Matchta birinshi bolyp Qazaqstan quramasy alǵa shyqty. Oıynnyń 19-mınýtynda Qostanaıdyń «Tobyl» klýbynyń jartylaı qorǵaýshysy Islam Chesnokov alystan sol aıaǵymen gol salyp, esep ashty. Ol úzilisten keıin de ekinshi goldyń avtory atandy. Bul joly da jartylaı qorǵaýshy alystan sol aıaǵymen qaqpany dál kózdedi. Osydan keıin ulttyq quramanyń bas jattyqtyrýshysy Magomed Adıev oıynshylardy almastyryp, «oıyn kartasyn» aralastyryp jiberdi. San-Marıno quramasy da tórt oıynshyny almastyrdy. Qazaqstan komandasynda bes oıynshy alańǵa shyqty.

Úzilisten keıin 60-mınýtynda San-Marıno esep aıyrmasyn qysqartty. Al oıynnyń 90+2 mınýtynda Abat Aıymbetov penaltıdi sátti oryndap, tablodaǵy esepti ózgertti. Esep — 3:1.

Quramalar alańǵa myna quramda shyqty:

Qazaqstan: Shakıı, Qaıyrov (Skvorov 54), Malyı, Marochkın, Bystrov (Erlanov 54), Dosmaǵambetov (Vorogovskıı 61), Chesnokov, Beısebekov, Zýev (Tapalov 74), Orazov (Keńesov 54), Aıymbetov;

San-Marıno: Benedettını, Batıstını, Fabbrı, Dı Maıo (Frankıozı 46), Rossı, Tosı, Golınýchchı (Kapıkkıonı 90+4), Kapıkkıonı, Mýlaronı (Lýnadeı 90+4), Laarı (Pankottı 77), Nannı (Vıtaıolı 27);

Tóreshiler: Lehner, Haıdenreıh, Pıhler (barlyǵy – Aýstrııa).

Qazaqstan – San-Marıno – 3:1 (1:0)

Goldar: Chesnokov 19, Chesnokov 51, Aıymbetov (penaltı) 90+2 – Franchıozı 60;

Eskertýler: Keńesov 63, Erlanov 88 – Mýlaronı 50, Fabbrı 79, Pankottı 90+1;

17.11.2023. Qazaqstan, Astana, «Astana-Arena».

Jalpy aıtqanda, match qyzyqty, tartysty bolǵan joq. Bas jattyqtyrýshy Magomed Adıev oıynshylardy erte almastyrdy. Ol jańa oıynshylardy alańǵa erte shyǵaryp, alańnyń jıeginde júregin ustap, mazasyzdanyp júrip qaldy. Orazov pen Bystrovty matchtyń sońyna deıin, eń bolmaǵanda 80-mınýtqa deıin oınatý kerek edi.

Ashat Taǵybergen men Baqtıer Zaınýtdınovtyń orny bilinip qaldy. Eger Islam Chesnokov eki gol salyp, dýbl jasamasa, VAR penaltı bermese oıynnyń qandaı eseppen aıaqtalatynyn oılaýdyń ózi qıyn. Nuráli Álip pen Samorodov sary qaǵazdyń kesirinen alańǵa shyqpady. Endi olar 21 qarashada syrt alańda bolatyn matchta basqa oıynshylarmen birge baryn salatynyna senemiz. Danııany óz alańymyzda, Fınlıandııany syrt alańda jeńgendeı qolda bar múmkindiktiń bárin salyp oınasaq jeńispen qaıtýǵa bolady.

Qazir alańdaǵy ár mınýt, ár tepken dop, pas mańyzdy. Eń bastysy jigitterge qatelespeı oınap, gol jiberip almaýǵa tyrysyp oınaý kerek. Bizde baspen oınaı alatyn, alystan dop tebetin, aıyp dobyn soǵa alatyn oıynshylar bar. Sondyqtan úmitsiz shaıtan deıdi.

Sóz sońynda aıtarymyz, keshegi kún de mine, tarıh qoınaýyna ketti.

Keshe fýtboldan ulttyq qurama Appenın túbeginen kelgen San-Marıno eliniń komandasyn 3:1 esebimen jeńip, Eýropa chempıonatyna joldama alýǵa taǵy bir múmkindik aldy. Bir taban jaqyndady.

Endi 21 qarashada Slovenııa jasaǵymen oınap, bir Qudaıdyń kózi túzý bolyp, qarsylasty syrt alańda jeńip jatsaq, bul shynymende tarıhı oqıǵa bolady. Sol kezde bul kún qazaq fýtbolynyń tarıhynda altyn árippen qashalyp jazylǵan kúnge aınalady. Laıym Alla taǵala sol kúnge jetkizsin!

9 týrdan keıin H tobynda Qazaqstan quramasynyń qorjynynda 18 upaı. Ulttyq qurama Eýro-2024 irikteý kezeńindegi sońǵy oıynyn 20-qarashadan 21-ne qaraǵan túni Slovenııa komandasyna qarsy ótkizedi. Al Danııa quramasy Slovenııany 2:1 esebimen jeńip, Eýropa chempıonatyna joldama aldy.

 

Dastan KENJALIN,

FOTO: Ilııas OMAROV

ASTANA