ۇلتتىق قۇرامانىڭ ويىنشىلارى ۇندەۋ جولدادى (ۆيدەو)

20 قاراشادان 21 قاراشاعا قاراعان ءتۇنى ليۋبليانا قالاسىندا استانا ۋاقىتىمەن ساعات 01.45-تە 2024 جىلى وتەتىن ەۋروپا چەمپيوناتى ءتۋرنيرىنىڭ اياسىندا سلوۆەنيا مەن قازاقستان ۇلتتىق قۇراما كوماندالارىنىڭ ماتچى باستالادى. بۇل ويىندا ەۋرودوداعا جولداما بەرىلەدى. 

قازىر ۇلتتىق قۇراما ن توبىنىڭ سوڭعى تۋر الدىنداعى تۋرنير كەستەسىندە 18 ۇپايمەن ءۇشىنشى ورىنعا جايعاسسا، سلوۆەنيا قۇراماسى 19 ۇپايمەن ەكىنشى ورىندا تۇر. ەۋروپا چەمپيوناتىنىڭ فينالدىق كەزەڭىنە شىعۋ ءۇشىن قازاقستان قۇراماسىنا تەك جەڭىس قاجەت. ال سلوۆەنيالىقتاردى تەڭ ويىن دا جەتەدى.

وسىعان بايلانىستى سلوۆەنيا قۇراماسىمەن ماتچى الدىندا ۇلتتىق قۇرامانىڭ ويىنشىلارى ەلگە ۇندەۋ جولدادى. قۇرامانىڭ فۋتبولشىلارى مەملەكەتتىك تىلدە ءبىر اۋىز سوزبەن «ءبىز بۇل جولدى بىرگە باستادىق»، «بىرگە ستاديونعا بارامىز»، «قۇراما تۇستەرىن بىرگە قورعايمىز»، ەلىمىزدىڭ اتىن بىرگە شىعارامىز»، بىرىگىپ بار كۇشىمىزدى سالامىز»، «بىرگە قۋانامىز»، «بارشا جۇرتتى بىرگە تاڭقالدىرامىز»، «سىزدەرسىز ەشبىر جەڭىس بولماس ەدى»، «بىرگە ءبىز قازاقستان قۇراماسىمىز» دەگەن سوزدەرىن ايتىپ، وزدەرىنە قولداۋ كورسەتىپ جاتقان حالىقتىڭ الدىنا شىقتى.

تۋريزم جانە سپورت ءمينيسترى ەرمەك مارجىقپاەۆ تا ۇلتتىق قۇرامانىڭ ماڭىزدى ماتچى الدىندا فۋتبولشىلارعا قولداۋ ءبىلدىرىپ، ۇندەۋ جاسادى.

ءبىزدىڭ جىگىتتەردى سىرت الاڭداعى شەشۋشى ماتچ كۇتىپ تۇر. ۇلتتىق قۇرامانىڭ كەيىنگى جىلدارداعى ويىنى جانكۇيەرلەردىڭ وتاندىق فۋتبولعا دەگەن سەنىمىن ۇيالاتتى. ەل تۇرعىندارى اياقدوپ شەبەرلەرىنىڭ ويىنىن تاماشالاۋ ءۇشىن ستاديوندارعا اعىلا باستادى. بۇل – سپورتتى ناسيحاتتاۋ جولىنداعى تاماشا جەتىستىك. ميلليونداعان قازاقستاندىقتىڭ ارمانى ورىندالۋىنا ءبىر عانا قادام قالدى.

جىگىتتەر، سەندەر ۇلكەن تاريح جاساپ جاتسىڭدار! بۇگىنگى كەزدەسۋدىڭ ناتيجەسى قانداي بولسا دا، سىزدەر ەل نامىسى ءۇشىن بار كۇش-جىگەرىڭىزدى جۇمساپ، الاڭنىڭ ءار بۇرىشىنداعى دوپ ءۇشىن تالاستا ايانىپ قالمايتىندارىڭىزعا سەنىمدىمىز. ماتچ سلوۆەنيادا وتسە دە، بۇگىن بۇكىل قازاق ەلى ءبىر جۇدىرىقتاي جۇمىلىپ، تەلەديدار ارقىلى سىزدەرگە جانكۇيەر بولىپ، قولداۋ بىلدىرەدى. ساتتىلىك، جىگىتتەر! سىزدەردىڭ قولىڭىزدان ءبارى كەلەدى!، — دەدى ەرمەك مارجىقپاەۆ.

سلوۆەنيا – قازاقستان ماتچى 20 قاراشادان 21 قاراشاعا قاراعان ءتۇنى ليۋبليانا قالاسىندا وتەدى. ماتچ استانا ۋاقىتىمەن ساعات 01.45-تە باستالادى. ويىن Qazsport جانە Qazaqstan تەلەارنالارىنان تىكەلەي ەفيردە كورسەتىلەدى.

داستان كەنجالين،

استانا