Ulttyq quramanyń oıynshylary úndeý joldady (VIDEO)

20 qarashadan 21 qarashaǵa qaraǵan túni Lıýblıana qalasynda Astana ýaqytymen saǵat 01.45-te 2024 jyly ótetin Eýropa chempıonaty týrnıriniń aıasynda Slovenııa men Qazaqstan ulttyq qurama komandalarynyń matchy bastalady. Bul oıynda Eýrododaǵa joldama beriledi. 

Qazir ulttyq qurama N tobynyń sońǵy týr aldyndaǵy týrnır kestesinde 18 upaımen úshinshi orynǵa jaıǵassa, Slovenııa quramasy 19 upaımen ekinshi orynda tur. Eýropa chempıonatynyń fınaldyq kezeńine shyǵý úshin Qazaqstan quramasyna tek jeńis qajet. Al slovenııalyqtardy teń oıyn da jetedi.

Osyǵan baılanysty Slovenııa quramasymen matchy aldynda ulttyq quramanyń oıynshylary elge úndeý joldady. Quramanyń fýtbolshylary memlekettik tilde bir aýyz sózben «Biz bul joldy birge bastadyq», «Birge stadıonǵa baramyz», «Qurama tústerin birge qorǵaımyz», Elimizdiń atyn birge shyǵaramyz», Birigip bar kúshimizdi salamyz», «Birge qýanamyz», «Barsha jurtty birge tańqaldyramyz», «Sizdersiz eshbir jeńis bolmas edi», «Birge biz Qazaqstan quramasymyz» degen sózderin aıtyp, ózderine qoldaý kórsetip jatqan halyqtyń aldyna shyqty.

Týrızm jáne sport mınıstri Ermek Marjyqpaev ta ulttyq quramanyń mańyzdy matchy aldynda fýtbolshylarǵa qoldaý bildirip, úndeý jasady.

Bizdiń jigitterdi syrt alańdaǵy sheshýshi match kútip tur. Ulttyq quramanyń keıingi jyldardaǵy oıyny jankúıerlerdiń otandyq fýtbolǵa degen senimin uıalatty. El turǵyndary aıaqdop sheberleriniń oıynyn tamashalaý úshin stadıondarǵa aǵyla bastady. Bul – sportty nasıhattaý jolyndaǵy tamasha jetistik. Mıllıondaǵan qazaqstandyqtyń armany oryndalýyna bir ǵana qadam qaldy.

Jigitter, sender úlken tarıh jasap jatsyńdar! Búgingi kezdesýdiń nátıjesi qandaı bolsa da, sizder el namysy úshin bar kúsh-jigerińizdi jumsap, alańnyń ár buryshyndaǵy dop úshin talasta aıanyp qalmaıtyndaryńyzǵa senimdimiz. Match Slovenııada ótse de, búgin búkil qazaq eli bir judyryqtaı jumylyp, teledıdar arqyly sizderge jankúıer bolyp, qoldaý bildiredi. Sáttilik, jigitter! Sizderdiń qolyńyzdan bári keledi!, — dedi Ermek Marjyqpaev.

Slovenııa – Qazaqstan matchy 20 qarashadan 21 qarashaǵa qaraǵan túni Lıýblıana qalasynda ótedi. Match Astana ýaqytymen saǵat 01.45-te bastalady. Oıyn Qazsport jáne Qazaqstan telearnalarynan tikeleı efırde kórsetiledi.

Dastan KENJALIN,

ASTANA