ءبىزدىڭ بوكسشىلار وزبەكتەرگە قاراعاندا اقساۋساق — مىرزاعالي ايتجانوۆ

بوكستان ۇلتتىق قۇرامانىڭ باس جاتتىقتىرۋشىسى مىرزاعالي ايتجانوۆ قازاق جىگىتتەرىنىڭ وزبەك بوكسشىلارىنان وسال ەكەنىن مالىمدەدى. بۇل تۋرالى ول «سپورت ءمينيسترى» YouTube ارناسىنا بەرگەن سۇحباتتا ايتتى، دەپ حابارلادى halyq-uni.kz.

جاتتىعۋ بارىسىنان بىزدەن اسىپ تۇرعان ەشكىم جوق. بارلىق جەردە اۋىزبىرشىلىك بار. وزبەكتەردىڭ بىزدەن ارتىقشىلىعى – جىگىتتەرى ءتارتىپتى، سپورتشىلارى ەڭبەكقور. ۇيىنە كەلىپ، ءۇي شارۋاسىن ىستەپ، مالعا قاراپ، جەر اۋدارىپ جۇرگەن جىگىتتەر. ءبىز وسى جاعىنان وسال بولىپ تۇرمىز. ءبىزدىڭ بالالاردىڭ ءبارى – قالانىڭ بالدارى. مەن كەيدە «بايدىڭ بالدارى» دەپ كەكەتىپ قويامىن. ءبارى اقساۋساق سياقتى بولىپ كەتتى.

سول ءۇشىن ەشكىمدى اياماۋ كەرەك. قازاقتىڭ بالالارىن كىشكەنتاي كەزىنەن جۇمىسقا سالۋ كەرەك. جۇمىستان ەشكىم ولمەيدى، كەرىسىنشە، كۇشەيەدى، قاتايادى، — دەيدى باس جاتتىقتىرۋشى.

سونداي-اق ول ءوز قاتەلىگى مەن السىزدىگىن ۇلتتىق قۇراماداعى ماماندارعا جاباتىن سپورتشىلار تۋرالى دا ايتتى.

جىگىتتەرىمىزدىڭ كەيبىرى تويلاپ قويدى، ءجۇرىپ قالدى. ءسويتىپ، ءوزىنىڭ بابىنا كەلمەي، دۇرىس بوكستاسا الماي، مامانداردى كىنالاعاندارى وتە ۇيات دەپ ويلايمىن. مەن ەستىمەي-اق، كىم ايتۋى مۇمكىن دەگەنگە ايتىپ جاتىرمىن. ادام ءبىرىنشى كەزەكتە كىنانى وزگەدەن ەمەس، وزىنەن ىزدەۋى كەرەك.

ازيا ويىندارىندا جەتىسىككە جەتپەي قالدىق. مەن بىرەۋدى ايتىپ جاتىرمىن با؟ وزىمىزدەن ىزدەپ، كەم-كەتىكپەن جۇمىس ىستەپ، قايتادان كۇشتى بولۋعا كوماندانى شاقىرىپ جاتىرمىن. بىراق ارادا اناۋ جامان، مىناۋ جامان دەگەن ىرىتكى بولادى، — دەيدى ول.

ال كەشە استانادا بوكستان VI جازعى سپارتاكيادا اياقتالىپ، چەمپيوندار مەن جۇلدەگەرلەر انىقتالدى. سپاركتايادا ءبىر اپتا بويى Beeline Arena سپورت كەشەنىندە جالاۋىن جەلبىرەتتى. ونىڭ قورىتىندىىسى بويىنشا 13 سالماقتا، اتاپ ايتقاندا 46-48 كگ، 51 كگ، 54 كگ، 57 كگ، 60 كگ، 63،5 كگ، 67 كگ، 71 كگ، 75 كگ، 80 كگ، 86 كگ، 92 كگ، +92 كگ دارەجەسىندە چەمپيوندار انىقتالدى.

ۇلتتىق قۇراما كوماندانىڭ باس جاتتىقتىرۋشىسى مىرزاعالي ايتجانوۆتىڭ ايتۋىنشا، سپارتاكيادا قورىتىندىسى بويىنشا ءار سالماق دارەجەسىندە ەلىمىزدىڭ ءبىرىنشى ءنومىرلى بوكسشىلارى انىقتالىپ، ۇلتتىق قۇراما جاڭادان جاساقتالادى. سپارتاكيادادا توپ جارعان بىلعارى قولعاپ شەبەرلەرى كەلەسى جىلعا جوسپارلانعان حالىقارالىق جارىستار مەن وليمپيالىق ويىندارعا ليتسەنزيا بەرەتىن تۋرنيرلەرگە قاتىسادى.