SportPress.kz قازاقستان سپورت جاڭالىقتارى
بۇگىن ساعات 12:30-دا استانا قالاسىنىڭ تۇرعىندارى فۋتبولدان قازاقستان ۇلتتىق قۇراما كومانداسىن ن.نازارباەۆ حالىقارالىق اۋەجايىنان كۇتىپ الدى. سالتاناتتى قارسى الۋ راسىمىنە تۋريزم جانە سپورت ءمينيسترى ەرمەك مارجىقپاەۆ، فۋتبولشىلاردىڭ تۋعان-تۋىستارى، دوستارى مەن جانكۇيەرلەر قاتىستى، دەپ حابارلادى ۆەدومستۆو.
كەزدەسۋدە ەرمەك مارجىقپاەۆ ۇلتتىق قۇراماعا جاسىل الاڭداعى جانكەشتى ويىنى ءۇشىن العىس ايتتى.
سىزدەر بۇكىل قازاق حالقىنا، ءتىپتى فۋتبولدان، جالپى سپورتتان الىس جاندارعا ەستەن كەتپەس ەرەكشە اسەر، ەموتسيا سىيلادىڭىزدار. ءوز ويىندارىڭىزبەن جانكۇيەرلەردىڭ وتاندىق فۋتبولعا دەگەن سەنىمىن ارتتىرىپ، ەلىمىزدىڭ حالىقارالىق ارەناداعى ءيميدجىن كوتەردىڭىزدەر.
بۇگىن تۇندە بۇكىل ەل ۇيىقتاماي، سىزدەر ءۇشىن تەلەديدار الدىندا تاقىم قىسىپ، جانكۇيەر بولدى. سىزدەر بۇل دودادا ۇلكەن ەرلىك جاساپ، قازاق حالقىن ءبىر ماقسات اياسىنا ۇيىستىرا الدىڭىزدار. بۇل ەرلىكتەرىڭىز كوپكە ۇلگى، مىڭداعان جاس بالا سىزدەر سياقتى بولۋدى، بولاشاقتا ۇلتتىق قۇراما ساپىندا ويناۋدى ارماندايدى. قازاق حالقىنا ۇلكەن قۋانىش سىيلاعاندارىڭىزعا كوپ راحمەت، جىگىتتەر!، — دەدى مينيستر.
فۋتبولشىلاردى قارسى الۋعا جانكۇيەرلەر دە ەرەكشە دايىندىقپەن كەلدى. ولار جىگىتتەرگە جىگەر بەرەتىن سوزدەر جازىلعان باننەرلەردى ۇستاپ، قۇرمەت رەتىندە ءدالىز جاساپ، ساپ تۇزەدى.
سونىمەن قاتار فۋتبولشىلار مەن جاتتىقتىرۋشىلار شتابى بارلىق جانكۇيەرگە ىرىكتەۋ تۋرنيرىندەگى قولداۋ كورسەتكەنى ءۇشىن العىس ءبىلدىردى. كوماندا توپتاعى شەشۋشى ماتچتى سىرت الاڭدا وتكىزگەنىنە قاراماستان، فۋتبولشىلار وسى ءتۇنى بۇكىل ەلدىڭ قولداۋىن سەزگەنىن اتاپ ءوتتى.
بۇگىن تۇندە قازاقستان ۇلتتىق قۇراماسى ەۋرو-2024 ىرىكتەۋ ءتۋرنيرى اياسىندا سلوۆەنيا كوامنداسىمەن كەزدەسىپ، اسا تارتىستى وتكەن ويىندا قارسىلاستارىنا 2:1 ەسەبىمەن جەڭىلدى. ءبىزدىڭ قۇراما ەۋروپا چەمپيوناتىنا تىكەدەي جولداما الماسا دا ۇلتتار ليگاسىنىڭ پلەي-وفف كەزەڭى ارقىلى ەۋرودوداعا بارۋعا تاعى ءبىر رەت تالپىنىپ كورەدى. بۇل سىندا ءبىزدىڭ جىگىتتەر 2004 جىلعى ەۋروپا چەمپيوندارى – گرەكيا قۇراماسىمەن وينايدى.
ماتچ 2024 جىلدىڭ ناۋرىز ايىندا افينادا وتەدى دەپ جوسپارلانعان.
View this post on Instagram
