SportPress.kz قازاقستان سپورت جاڭالىقتارى
تۋريزم جانە سپورت ءمينيسترى ەرمەك مارجىقپاەۆ قوستاناي وبلىسىنىڭ تۇرعىندارىمەن ەسەپتىك كەزدەسۋ وتكىزدى. القالى جيىنعا ءوڭىر ازاماتتارى، قوعام بەلسەندىلەرى، جۋرناليستەر، وڭىرلىك سپورت فەدەراتسيالارىنىڭ باسشىلارى، تۋريزم سالاسىنىڭ كاسىپكەرلەرى، سپورتشىلار قاتىستى، دەپ حابارلادى ۆەدومستۆو.
قوستانايداعى جاستار سارايىندا وتكەن كەزدەسۋدە ەرمەك مارجىقپاەۆ مينيسترلىكتىڭ بيىلعى جۇمىسى، تۋريزم جانە سپورت سالاسىندا جۇرگىزىلىپ جاتقان رەفورمالار جانە ۆەدومستۆونىڭ الداعى جوسپارلارىن باياندادى.
2025 جىلعا دەيىن ەلىمىزدە مەملەكەتتىك-جەكەشەلىك ارىپتەستىكتى قولدانا وتىرىپ، 113 جاڭا سپورت نىسانى سالىنىپ، قولدانىستاعى 26 نىسان قايتا جاڭارتىلادى. قوستاناي وبلىسىندا مەملەكەتتىك-جەكەشەلىك ارىپتەستىك اياسىندا «توبىل-ارەنا» جابىق فۋتبول ستاديونى، «قوستاناي» سپورتتىق-ويىن-ساۋىق كەشەنى، 50 مەترلىك ءجۇزۋ باسسەينى جانە مۇز سپورت سارايى سياقتى نىساندار قايتا جاڭارتىلىپ، پايدالانۋعا بەرىلدى. سونداي-اق وڭىردە مامانداندىرىلعان سپورت مەكتەپ-ينتەرنات-كوللەدجى اشىلادى.
سونىمەن قاتار مينيستر وبلىستا قىسقى سپورت تۇرلەرى قارقىندى دامىپ كەلە جاتقانىن تىلگە تيەك ەتتى. اتاپ ايتار بولساق، قوستاناي وبلىسىنان كونكيمەن جۇگىرۋ بويىنشا الەم چەمپيونى، قىسقى ازيا ويىندارىنىڭ جەڭىمپازى دەنيس كۋزين، شورت-ترەكتەن بەيجىڭ وليمپياداسىنا قاتىسقان اناستاسيا كرەستوۆا، پارا شاڭعى سپورتشىسى يۋري بەرەزين مەن شاڭعىشى ۆيتالي پۋحكالو سياقتى سپورتشىلار شىققان. ۆەدومستۆو باسشىسى قىسقى سپورت تۇرلەرىمەن قاتار، وڭىردە جازعى سپورت تۇرلەرىن دە بەلسەندى دامىتۋ قاجەت ەكەنىن اتاپ ءوتتى.
قىتايدا وتكەن ازيا ويىندارىنىڭ قورىتىندىسى بويىنشا، ايماقتاردىڭ مەدال ۇلەسى جاعىنان قوستاناي وبلىسى ەڭ ناشار ناتيجە كورسەتتى. جەرگىلىكتى سپورتشىلار 1998 جىلعى ويىنداردان كەيىن بيىل العاش رەت ەل قورجىنىنا بىردە-ءبىر التىن، ءتىپتى كۇمىس مەدال دا سالا العان جوق. سونىمەن قاتار جۋىردا عانا استانادا وتكەن بوكستان قازاقستان سپارتاكياداسىندا دا قوستاناي وبلىسىنىڭ سپورتشىلارى ءساتسىز بوكستاستى. بار-جوعى ءبىر قولا مەدال يەلەندى. بۇل – قوستاناي سياقتى بوكستان بىرنەشە الەم جانە ازيا چەمپيوندارىن، وليمپيادانىڭ جۇلدەگەرلەرىن تاربيەلەپ شىعارعان ءوڭىر ءۇشىن وتە ۇياتتى جاعداي. سوندىقتان وسى باعىتتا جۇمىستى كۇشەيتۋ قاجەت. جيىنعا قاتىسىپ وتىرعان وڭىرلىك فەدەراتسيانىڭ باسشىلىعىنان وسى ماسەلەنى ەرەكشە باقىلاۋعا الۋدى سۇرايمىن، – دەدى تۋريزم جانە سپورت ءمينيسترى.
بيىل جىل سوڭىنا دەيىن قوستاناي وبلىسىندا 44 ينۆەستيتسيالىق جوبانى ىسكە اسىرۋ كوزدەلگەن. قازىرگى تاڭدا 10 جوبا تولىق ىسكە قوسىلدى. ولاردىڭ قاتارىندا امانگەلدى اۋدانىنداعى كوپسالالى تۋريستىك كەشەن، قوستانايداعى قالالىق جاعاجايدى اباتتاندىرۋ بويىنشا جۇمىستار كەشەنى، رۋدنىي قالاسىندا ورنالاسقان قالالىق مادەنيەت جانە دەمالىس ساياباعىن اباتتاندىرۋ بويىنشا ەكى جىلدىق جوبانىڭ جۇمىستارى اياقتالدى. جالپى ەل بويىنشا ۇكىمەت ينۆەستيتسيالىق جوبالاردى ۇزاق مەرزىمدى جەڭىلدىكپەن قارجىلاندىرۋ مەرزىمىن 7 جىلدان 10 جىلعا دەيىن كوبەيتۋ مۇمكىندىگىن قاراستىرىپ جاتىر.
سونداي-اق مينيستر قازىرگى تاڭدا قوستاناي وبلىسىنىڭ تۋريستىك الەۋەتى تولىق كولەمدە پايدالانىلماي جاتقانىن اتاپ ءوتتى.
ءبىز ەلىمىزدەگى بارلىق تۋريستىك مۇمكىندىكتى ءتيىمدى پايدالانۋىمىز كەرەك. ماسەلەن، تابيعات ەرەكشە سىي ەتىپ بەرگەن ەرتىس الابىنداعى تابيعاتى ەرەكشە، سۋى ەڭ كوپ توبىل وزەنى تۋريستەردى قىزىقتىرۋى كەرەك. بىرەگەي تابيعي لاندشافتتارى بار وزەن اۋماعىندا ەكسترەمال، ەكولوگيالىق جانە ەمدىك-ساۋىقتىرۋ دەمالىس ورىندارىن دامىتۋ قاجەت. بۇل اۋماق وتاندىق تۋريستەردى عانا ەمەس، سونىمەن قاتار شەتەلدىكتەردى دە قىزىقتىراتىن مەكەندەرىمىزدىڭ بىرىنە اينالۋى مۇمكىن. بۇگىنگى جيىنعا قاتىسىپ وتىرعان ارىپتەستەرىمنەن وسى ماسەلەگە ەرەكشە كوڭىل ءبولۋىن سۇرايمىن، –دەدى ەرمەك مارجىقپاەۆ.
ەسەپ بەرۋ كەزدەسۋىنەن كەيىن مينيستر ازاماتتارمەن وڭاشادا كەزدەستى. وندا ازاماتتاردىڭ سۇراقتارىنا جاۋاپ بەرىپ، ولاردىڭ ماسەلەلەرى مەن ۇسىنىستارىن تىڭدادى.
قوستاناي وبلىسىنىڭ تۇرعىندارى وڭىردە بىلىكتى جاتتىقتىرۋشىلاردىڭ جەتىسپەيتىنىن ايتىپ، ىشكى ساياحاتقا جەڭىلدىكتەر، جول بويىنداعى سەرۆيس پەن ينفراقۇرىلىمدى دامىتۋ سياقتى ماڭىزدى تاقىرىپتاردى قوزعادى.
