«توبىل» فۋتبول كلۋبىندا جانجال شىقتى  

فۋتبولدان قوستانايدىڭ «توبىل» كلۋبىنىڭ بۇرىنعى ديرەكتورى اندرەي كانچەلسكيس وتستاۆكاعا كەتۋىنە بايلانىستى مالىمدەمە جاسادى. ول Championat سايتىنا بەرگەن سۇحباتىندا «توبىل» كلۋبىنداعى قىزمەتىنەن كەتۋ تۋرالى ءوتىنىش جازباعانىن، 29 قاراشادا ەڭبەك دەمالىسىنان كەلگەننەن كەيىن كوماندانىڭ تەڭ توراعاسىن سوتقا بەرەتىنىن ايتتى.

مەن «توبىلدان» كەتكەن جوقپىن. ماعان ەشكىم ەشتەڭە دەگەن جوق. ەشقانداي قۇجاتقا قول قويعان ەمەسپىن. ول (كلۋبتىڭ تەڭ توراعاسى، — رەد.) مەنى الاياق دەپ جۇمىستان شىعارعىسى كەلىپ وتىر. كىمنىڭ الاياق ەكەنى سوتتا بەلگىلى بولادى. مەن ول سەكىلدى قولما-قول اقشا جاساۋمەن، لاس ىستەرمەن اينالىسپايمىن. 29 قاراشادا جۇمىسقا كەلگەندە دۇرىستاپ سويلەسەمىز. ەگەر جاعداي باسقاشا بولسا وندا مەن فيفا مەن ۋەفا-عا ارىز جازامىن. سوندا كىمنىڭ كىم ەكەنىن كورەمىز، — دەدى ول.

ونىڭ ايتۋىنشا، وتستاۆكا تۋرالى ول دەمالىستا جۇرگەندە ەستىگەن.

«توبىل» كلۋبىنىڭ ءباسپاسوز قىزمەتى 23 قاراشادا كانچەلسكيستىڭ وتستاۆكاعا كەتكەنى تۋرالى رەسمي تۇردە جاريا ەتتى. وسىدان كەيىن ونىڭ سۇحباتى جاريالاندى.

قوستاناي كلۋبىنىڭ باسشىلىعىنداعى وزگەرىستەر قازاقستان كۋبوگىنىڭ فينالىنان كەيىن باستالعان. سول كەزدە «توبىل» ەل چەمپيونى شىمكەنتتىڭ «ورداباسى» كومانداسىن 1:0 ەسەبىمەن جەڭگەن بولاتىن. وسى ماتچتان كەيىن سەربيالىق جاتتىقتىرۋشى ميليچ چۋرچيچ وتستاۆكاعا كەتتى. ال كانچەلسكيس كلۋبتىڭ ديرەكتورى بولىپ ءتورت اي جۇمىس ىستەدى. ونىڭ كلۋبپەن كەلىسىمى بيىلعى جىلدىڭ سوڭىنا دەيىن ەسەپتەلگەن بولاتىن.

داستان كەنجالين،

استانا