«Tobyl» fýtbol klýbynda janjal shyqty  

Fýtboldan Qostanaıdyń «Tobyl» klýbynyń burynǵy dırektory Andreı Kanchelskıs otstavkaǵa ketýine baılanysty málimdeme jasady. Ol Championat saıtyna bergen suhbatynda «Tobyl» klýbyndaǵy qyzmetinen ketý týraly ótinish jazbaǵanyn, 29 qarashada eńbek demalysynan kelgennen keıin komandanyń teń tóraǵasyn sotqa beretinin aıtty.

Men «Tobyldan» ketken joqpyn. Maǵan eshkim eshteńe degen joq. Eshqandaı qujatqa qol qoıǵan emespin. Ol (klýbtyń teń tóraǵasy, — red.) meni alaıaq dep jumystan shyǵarǵysy kelip otyr. Kimniń alaıaq ekeni sotta belgili bolady. Men ol sekildi qolma-qol aqsha jasaýmen, las istermen aınalyspaımyn. 29 qarashada jumysqa kelgende durystap sóılesemiz. Eger jaǵdaı basqasha bolsa onda men FIFA men ÝEFA-ǵa aryz jazamyn. Sonda kimniń kim ekenin kóremiz, — dedi ol.

Onyń aıtýynsha, otstavka týraly ol demalysta júrgende estigen.

«Tobyl» klýbynyń baspasóz qyzmeti 23 qarashada Kanchelskıstiń otstavkaǵa ketkeni týraly resmı túrde jarııa etti. Osydan keıin onyń suhbaty jarııalandy.

Qostanaı klýbynyń basshylyǵyndaǵy ózgerister Qazaqstan kýbogynyń fınalynan keıin bastalǵan. Sol kezde «Tobyl» el chempıony Shymkenttiń «Ordabasy» komandasyn 1:0 esebimen jeńgen bolatyn. Osy matchtan keıin serbııalyq jattyqtyrýshy Mılıch Chýrchıch otstavkaǵa ketti. Al Kanchelskıs klýbtyń dırektory bolyp tórt aı jumys istedi. Onyń klýbpen kelisimi bıylǵy jyldyń sońyna deıin eseptelgen bolatyn.

Dastan KENJALIN,

ASTANA