SportPress.kz قازاقستان سپورت جاڭالىقتارى
تۋريزم جانە سپورت ءمينيسترى اۋىر اتلەتيكا فەدەراتسياسىنىڭ باسشىلىعى مەن جاتتىقتىرۋشىلار قۇرامىمەن كەزدەستى.
جيىندا فەدەراتسيا وكىلدەرى سپورتشىلاردىڭ ازيا ويىندارىنداعى ونەرىن قورىتىندىلاپ، اۋىر اتلەتيكا سپورتىن دامىتۋ جوسپارىمەن تانىستىردى، دەپ حابارلادى ۆەدومستۆو.
حانچجوۋداعى ويىنداردا قازاقستان قۇراماسىنىڭ اۋىر اتلەتتەرى نەبارى 1 قولا مەدال ولجالاپ، جارىس الدىندا العان مىندەتتەمەلەرىن ورىنداي المادى. قىتايداعى دوداعا دەيىن ولار 1 كۇمىس جانە 2 قولا مەدال جەڭىپ الۋعا ۋادە بەرگەن ەدى.
ەرمەك مارجىقپاەۆ كەيىنگى جىلدارى اۋىر اتلەتيكا سپورتشىلارىنىڭ جاپپاي دوپينگ داۋىنا ۇشىراپ جاتقانىنا بايلانىستى وتكىر ماسەلە كوتەردى. 2022 جىلدىڭ باسىنان بەرى 43 سپورتشى دوپينگ قولداندى دەپ ايىپتالعان.
ازيا ويىندارى الدىنداعى دوپينگ ماسەلەسىنە بايلانىستى فەدەراتسيانىڭ باسشىلىق جانە جاتتىقتىرۋشى قۇرامى تولىق جاڭاردى. ناتيجەسىندە ۇلتتىق قۇراما حانچجوۋدا نەگىزگى قۇرامدا ونەر كورسەتە المادى.
ۇلتتىق دوپينگكە قارسى ورتالىقتىڭ وكىلدەرى سپورتتىق مەديتسينا جانە وڭالتۋ ورتالىعىمەن بىرلەسىپ، سپورتشىلاردى جاپپاي شەتتەتۋ سەبەپتەرىن انىقتاۋ ءۇشىن سپورتتىق تاماقتانۋ ۇلگىلەرى مەن فارماكولوگيالىق قۇرالدارعا زەرتتەۋلەر جۇرگىزەدى.
ەلىمىزدىڭ اۋىر اتلەتيكا سپورتىنىڭ تاريحى باي، جەڭىسپەن ورىلگەن تاماشا ءداستۇرى بار. قالىپتاسقان جاعدايعا بايلانىستى بۇل سپورت تۇرىنەن باس تارتۋعا بولمايدى. جاڭا باسشىلىق پەن جاتتىقتىرۋشىلار شتابى دوپينگ ماسەلەسىنە بايلانىستى دوپينگ سىنامالارىن ەگجەي-تەگجەيلى تەكسەرىپ، تىيىم سالىنعان قۇرالداردى قولدانۋعا نولدىك توزىمدىلىك بويىنشا ءىس-شارالار جوسپارىن ازىرلەۋى كەرەك. سپورتتان شەتتەتىلگەن ساڭلاقتارعا مۇنداي قيىن-قىستاۋ كەزەڭدە قولداۋ كورسەتىپ، ولارعا دەمەۋ بەرۋىمىز كەرەك، — دەدى تۋريزم جانە سپورت ءمينيسترى.
مينيستر سونداي-اق اۋىر اتلەتيكا فەدەراتسياسىنىڭ وكىلدەرىنە بىرقاتار تاپسىرما بەردى. اتاپ ايتقاندا، سپورتشىلاردىڭ سپورتتىق تاماقتانۋ مەن قالپىنا كەلتىرۋ قۇرالدارىن ءوز بەتىنشە ساتىپ الۋىن بولدىرماۋ، بارلىق مۇددەلى مەكەمەلەرمەن بىرىگىپ، فارماكولوگيالىق قۇرالداردى ساتىپ الۋ الگوريتمىن ازىرلەۋ، اۋىر سالماقتاعى سپورتشىلاردى دايارلاۋ جونىندەگى جەكە باعدارلامانى ىسكە قوسۋدى جۇكتەدى.
