قازاقستانعا بوكستان كۋبانىڭ ەرلەر قۇراماسى كەلدى

قازاقستانعا بوكستان كۋبانىڭ ەرلەر قۇراماسى كەلدى. بوستاندىق ەلىنىڭ بوكسشىلارى ەلىمىزدىڭ بىلعارى قولعاپ شەبەرلەرىمەن بىرگە وقۋ-جاتتىعۋ جيىنىنا قاتىسىپ، عالىم جارىلعاپوۆتى ەسكە الۋعا ارنالعان حالىقارالىق تۋرنيرگە قاتىسادى، دەپ حابارلادى قازاقستان بوكس فەدەراتسياسى.

قوناقتار قاتارىندا بارلىعى 9 بىلعارى قولعاپ شەبەرى مەن ەكى جاتتىقتىرۋشى كەلدى. ولاردىڭ اراسىندا الەم چەمپيوناتىنىڭ جانە پانامەريكالىق چەمپيوناتتىڭ قازىرگى فيناليستەرى، كوپتەگەن حالىقارالىق تۋرنيرلەردىڭ جەڭىمپازدارى مەن جۇلدەگەرلەرى بار. نەگىزگى ەكپىن وليمپيادالىق سالماققا اۋدارىلعان.

كۋبا قۇراماسىنىڭ باس جاتتىقتىرۋشىسى كارلوس مانۋەل پەرەس رەيەستىڭ ايتۋىنشا، ونىڭ بوكسشىلارىنىڭ اراسىندا تاجىريبەلى سپورتشىلار دا، جاستار دا بار.

ءبىز قازاقستانعا العاش رەت كەلىپ وتىرعان جوقپىز. بىزدە بوكستا ەلدەر اراسىندا جاقسى دوستىق بار. سوندىقتان، كوماندامىزبەن بىرلەسكەن وقۋ-جاتتىعۋ جيىنىن وتكىزۋ، سونىمەن قاتار عالىم جارىلعاپوۆتى ەسكە الۋعا ارنالعان ءداستۇرلى تۋرنيردە ءوز ونەرلەرىمىزدى كورسەتۋ تۋرالى شەشىم قابىلدادىق. مەن ءوز اتىمنان جانە كۋبا قۇراماسىنىڭ اتىنان قازاقستانعا شاقىرعاندارىڭىز ءۇشىن العىس ايتامىن، — دەدى ول.

قازاقستان قۇراماسىنىڭ باس جاتتىقتىرۋشىسى مىرزاعالي ايتجانوۆتىڭ تاربيەلەنۋشىلەرى مەن ازاتتىق ارالىنان كەلگەن قوناقتاردىڭ قاتىسۋىمەن قاراعاندى قالاسىندا 4-16 جەلتوقسان ارالىعىندا وقۋ-جاتتىعۋ جيىنى وتەدى.

17 جەلتوقساندا قاراعاندىدا قازاق كسر ەڭبەك سىڭىرگەن جاتتىقتىرۋشىسى عالىم جارىلعاپوۆتى ەسكە الۋعا ارنالعان ءحححىح حالىقارالىق تۋرنير باستالادى. ەرلەر مەن ايەلدەر اراسىنداعى ۇزدىكتەر 21 جەلتوقساندا انىقتالادى.